1-2 A nig ved Thaer khuhq par Ghig sa he lehq a nig ved duhd law kig phehq che Yer suq Khreq tawd pid lar che heh, Yer suq Khreq ve cuh yad phehq che ngag Pawd loq awr lehr, yonr che awg khuhn lo ngag ved yad awg cehg mag phehq che, Tiq mod ser haq liq che ve buhq fea che yaog. Awr pa Ghig sa he lehq a nig ved Jawd mawd Yer suq Khreq ve awg bon awg sinx, har kax vix che ted ceng he lehq duhd sa gad sa che ted ceng nawg geh cawg vid-oq.

3 Ngag Mar ker dawd niq muhd mig lo kae che te yand, Ed fed suq med khuhn nawg chehd lar haz tug a meha liz ngag nawg haq kawq lawg khawx che yaog. Maq sur daq che yonr khad teq pa haq i hehd teq pa maq gha mar vid tug, su haq mar vid tug awg pun ngag nawg haq chehd cuh vid lar haz che yaog. 4 Kheh te lehq, kad phed kad lao teq pa haq lehd ma koz, awg ceng awg khad teq cax peg teq cax ve haq koz daq lehq peg kig leh kig mad cawg che teq pa haq lehd ma koz, maq gha tar ir tug i hehd maq gha te soq saq tug, tawr vid tug awg pun liz, ngag nawg haq chehd cuh lar haz che yaog. Awg ceng che ve teq pa awr lehr, tawd ghawg daq che ted ceng haq lehax te tuhaz che yaog. A nig yonr che haq te lehq sir lar che Ghig sa duhd lar che thaer khuhq che ted ceng haq te tuhaz vid che ma hez hawg. 5 Ngag che kheh koz che awr lehr, i hehd awg khuhn haq pehnd che cawg vid tug haq ngag duhd law che yaog. Haq pehnd che ted ceng awr lehr, daq kehg che ni ma, vend bax tar kig mad cawg che ni ma he lehq awg cehg mag yonr che ni ma, che ve teq pa awg khuhn tuhaz che yaog. 6 Chaw ted pehg pehar vawr,* 1:6 Chaw ted pehg pehar vawr Maq sur daq che yonr khad teq pa haq yonr che chaw haq koz che yaog. awg ceng che ve teq pa haq chid bag lar haz lehq, awg bon mad cawg che awg lawn haq lehax koz daq chehd che yaog. 7 I hehd awr lehr, awg lid cuh kar var te gad liz, i hehd a thoq koz chehd che haq lehd ma koz, i hehd ni ma tar che khuhn koz chehd che tawd khuhd teq pa haq lehd ma koz, i hehd maq sir che yaog.

8 Awg lid tawd khuhd awr lehr, thed che cawd che khuhn yehd vix ver, daq che yaog, lehz a nig sir chehd che yaog. 9 Awg lid tawd khuhd ted ceng awr lehr, thed che cawd che chaw awg pun teh lar che ma hez. Ma thed ma cawd che haq te che chaw, maq na yug vix che chaw, Ghig sa haq ma yawz maq yan te che chaw, vend bax te che chaw, mad daq mad kehg che chaw, bon lid sinx khad haq maq ca che chaw, awr pa awr ye haq dawz vehr che chaw, su haq dawz vehr che chaw, 10 hax chawd hax paz te che chaw, haw khaz chawd-ad haw khaz duhd cawd daq lehq te che chaw, chaw haq khuhd yug huhd che chaw, her ka che chaw, ma hez che khuhn sax khiz khanr che chaw he lehq Ghig sa ve thed che cawd che mar khad haq tawr che chaw, chaw che ve teq pa awg pun awg lid tawd khuhd teh lar che yaog lehz a nig sir che yaog. 11 Ngag che kheh koz che awr lehr, ha lehg che bon khuhd haq hawr daq che yaog. Ha lehg che bon khuhd u ve awr lehr, ngag haq pehar lar che awg mig awg phond ir jad che awg bon che Ghig sa ve ha lehg che bon khuhd phehq che yaog.

12 Ngag haq awg ghad pehar che a nig ved Jawd mawd Yer suq Khreq haq ngag chid muh che yaog. Awg lawn ghod ver, ngag kar tiq yeg che yaog lehz, yawd sawnr lar lehq kanx che ve haq te tug ngag haq lez yug lar che yaog. 13 Ngag awr lehr pong lag thad ver, Yer suq haq maq sawnr ma caz koz lehq, yawd ved chaw haq du deh lehq, khang gid koz gid liz, ngag maq sir ser lehq maq yonr ser che khuhn te cheaq te lehq, Ghig sa ngag haq har kax ax che yaog. 14 Yer suq Khreq awg khuhn cawg che yonr che he lehq haq pehnd che awg ceng geh teq geha, a nig ved Jawd mawd Ghig sa ve awg bon haq, ca koz mad peg thad kha gag ngag gha che yaog. 15 Tawd che te khuhd awr lehr, awg cehg mag yonr gha lehq kar tiq yeg che tawd khuhd phehq che yaog. Yer suq Khreq awr lehr, vend bax yad teq pa haq thaer khuhq vid tug mig gig thag lo lag che yaog. Vend bax yad teq pa awg khuhn ngag awr lehr, suaq keh vend bax ir jad che chaw te ghad phehq che yaog. 16 Kheh ma khuhd, Yer suq Khreq awr lehr, yawd khawd-ehg taw maq yeg khanr vix jad che haq pheq mar vid tug awg pun, ngag su haq keh vend bax ir jad che chaw te ghad phehq che liz, ngag haq har kax ax che yaog. Kheh te lehq, yawd haq yonr che awg khuhn co tiq ha tiq gha che chaw teq pa awg pun ngag awr lehr, hend yug jawg yug kig phehq che yaog. 17 Co co tar taer uq penr che Jawd mawd Ghig sa, mad lug maq suh vix lehq, chaw yad te ghad-eq liz ngawx mad mawg che, Ghig sa te ghad lehax cawg che haq co co taer taer chid ir chid muh lehq awg mig awg phond cawg vid-oq. A meng.

18 Ngag ved yad Tiq mod ser-og, pong lag thad su Ghig sa awg tan te lehq, nawg haq caz daq che Ghig sa ve tawd khuhd khuhn koz lar che heh, ngag nawg haq tawd u ve heh te pehar che yaog. Pong lag thad huh koz lar che teq pa haq cud lehq, daq che awg pun tawr daq bawz daq-oq. 19 Vend bax tar tug mad cawg che ni ma haq chaw ted pehg pehar chid bag vehr che haq te lehq, huh lawd kor lug vehr che heh te lehq, i hehd ve yonr che ni ma liz lug vehr che yaog. Daq che bawz daq tug nawg yonr che haq gha yug cid lar lehq, vend bax tar tug mad cawg che ni ma gha cawg che yaog. 20 Chaw u ve teq pa awg khuhn, Hur mer nehd he lehq Ar ler sar duq liz chehd che yaog. Ix mag Ghig sa haq maq sawnr ma caz maq gha koz gid vid tug awg lawn haq hend yug tug, Sar tanr ve laq kuhr khuhn ngag ix mag haq chid aq vid lar peg che yaog.