Mbeɗe sáka kuni fie Galasiri 1

Galasiri

Mbeɗe ká Pol ɗaa / ha̰ nzoɓ mbika lawri ká Galasi

Ɓay ká se tul feri ká ɗo ɓil mbeɗe ni key

Mbeɗe key na, Pol ɗaa ɓay bákake nzoɓ mbika lawri ká i mbṵ tul kḭ ɓáy zaɗri ɓoɗ ɓoɗ ká kuɗu zaɗ ká Galasi, ɓay tul fe ɗáa nzoɓ ha̰nɛri ká i vi saa zaɗ kḭ a í rìi sakra nzoɓ mbika lawri í fere nzoɓri fe ká ɗo ɓoɗ ɓáy taa ha̰y ká Pol fere ri na. Nzoɓkeri ku na, i tuŋ hṵrusuo káʼa ɗǒke ɓa nzoɓ ndáy nzaapeɗ na í ɓaa mii, nzoɓri ká i ɓa Ziɓ ya na Ŋgɛrɛwṵru a náa ɓay ká tul-ri, roo lɛ, zaɗka i ɗaa vu mbom ɓo tul bol kusol Moyze na nda̰w rɔ! Pol yḭiŋra ɓáy ɓay ɓa vaa a ɓaa mii, ɓeri vi ɓa nzoɓ ndáy nzaapeɗ ɓáy faa ɗiw ká Krisi kḭ sùo-ɛ ɗi ɓeri ɓayke. Ka ɓaa nda̰w mii, Ŋgɛrɛwṵru ya̰a nzoɓ a naa ɓay ká tul-e ɓáy fe ká Zezu Krisi ɗaa ɓo, ɓáy faa ɗáa bol kusol Moyze ya. Krisi na tina nzoɓ mbika lawri saa ɓil koy bol kusol, a timbɛɗɛ key na, ɗo nun haŋa nzoɓri kɔ fe ɗáa kere Tem Law Pie na ká ɓil simseɗ ɓari.

Ɓay ká ɗo ɓil mbeɗe ni key na, rìi kḭ ɓáy ɓay ha̰nɛri ká Pol ɗaa ha̰ nzoɓ mbika lawri ká Rɔm.

Máa ɓayri ká ɗo ɓil-e

Pol ɓaa sa̰w fe ká se tul hṵrusuo káʼa ɗǒke ɓa nzoɓ ndáy nzaapeɗ: 1–2

Ŋgɛrɛwṵru naa ɓay ká tul nzoɓri ká i ɗaa law-ri ɓo tul Krisi: 3–4

Tḭ́i saa ɓil koy bol kusol, ɓáy peɗ ɗáa nzoɓ mbika lawri: 5–6

Soko ká Pol hii ha̰ yṵ-ɛri

1-3 Ɓaarì yṵ-iri ká ì ɓa nzoɓ mbika lawri ká ì mbṵ tul kḭ ɓoɗ ɓoɗ ká kuɗu zaɗ ká Galasi na, ɓúru yṵ-iri riw bele ká i ɗo ziŋ mì key na, ɓuru hii soko ha rì. Mbeɗe key na, ɓi Pol ze mì ɗaa ha rì. Mì ɓa nzoɓ ndáy nzaapeɗ taa nzoɓ ya nda̰w, nzoɓ rɔɔ píe mì ya nda̰w, roo lɛ, Zezu *Krisi kḭ sùo-ɛ ɓáy Bǎa naari Ŋgɛrɛwṵru ká tina ni saa luɔ huɗ, a ha̰ ni kaw ɓáy kumnun ze píe mì. Ndaɗ ɓay haŋa law huoke ɓáy ɗɛkɛkɛ Ŋgɛrɛwṵru Bǎa naari ɓáy Ŋgɛrɛmbay Zezu Krisi ka sáɗ ziŋ rì. 4 Krisi na pɔŋ sùo-ɛ ha̰ huɗ ɓay tína naari saa ɓil koy feya̰ari, ɓay haŋa ɓo fe ndayari ká tusiri key na, i ɗo ɓáy hṵrusuo ká tul naari mbǎa. Ka ɗaa munu, ɓay ḭi lɛ, Bǎa naari Ŋgɛrɛwṵru hii ɓay haŋa ni ka ɗaa. 5 Riŋ ɗika ɓa taa Ŋgɛrɛwṵru mbiimbam ɓáy mbiimbam ɓaŋguɔ! Amɛm! Ndaɗ ɓay haŋa ni ka ɗo munu na kḭ.

Káa Ɓay Kere na mbḭw hɔy

6 Yṵ-iri, Ŋgɛrɛwṵru ɗí rì ɓáy faa law kere *Krisi. Roo lɛ, timbɛɗɛ key na law-i kuŋ mbii gbaɗ, ɓay ḭi lɛ, ì pɔŋ ni yak a í fɛrɛ sùo-rì ɓay láa káa ɓay kḭ ká ɓoɗ ro. 7 Tusuɛke lɛ, Ɓay Kere kḭ ká ɓoɗ na tiya. Roo lɛ, mì ɓaa mini ha rì, ɓay ḭi lɛ, mì kɔ ku na, nzoɓ ha̰nɛri fɛrɛ tul-rì a í nzaa faa ɓay fɛ́rɛ káa Ɓay Kere Krisi key na ɗo fi mbḭw. 8 Ze, zaɗka ɓuru kḭ, mase leɗ nzaapeɗ ká nulue hɔy ví ka-káa Ɓay Kere key na ha̰ ni ɗo ɓoɗ ɓáy taa ha̰y ká ɓuru ɓaa ha rì na lɛ, faɗi Ŋgɛrɛwṵru ka mgba ni. 9 Munu ká ɓuru ɓaa ha rì pola ro na, mì ka̰y mí ɓaa timbɛɗɛ key na rɔɓay: zaɗka nzoɓ kḭ ze ví ka-káa Ɓay Kere key na ha̰ ni ɗo ɓoɗ ɓáy taa ha̰y ká ì ya̰a ká luo ɓuru key na lɛ, faɗi Ŋgɛrɛwṵru ka mgba ni. 10 Wa̰a, ì ker mina ro lɛ? Timbɛɗɛ key na, mì nzaa faa ɓay ɗáa fe ká rii law nzoɓri, mase fe ká rii law Ŋgɛrɛwṵru lɛ? Mì hii ɓay haŋa Ŋgɛrɛwṵru ze ka kɔ mì rii law-ɛ. Wa̰a, mì nzaa faa ɓay ndáɗ ká nun nzoɓri zu lɛ? Munu ya! Zaɗka mì nzaa faa ɓay ndáɗ ká nun nzoɓri rɔɓay lɛ, mì ti ɓá nzoɓ peɗ taa Krisi ya.

Pol vi ɓa nzoɓ ndáy nzaapeɗ

11 Yṵ-iri, mì ɓaa ha rì ta-taŋ: káa Ɓay Kere ká mì kaa ha rì na, ɓa kér ɓay nzoɓ ya. 12 Mì ya̰a ká luo nzoɓ ya nda̰w, a nzoɓ mbḭw mini kara fere mì ya nda̰w, roo lɛ, ɓa Zezu *Krisi kḭ sùo-ɛ ze kiɛ mì ha̰ mì kɔ. 13 Ɓaarì na, ì laa ɓay simseɗ ɓi ká pola ká mí tɔ́ŋke fal fe ɗáa Ziɓri ká ɓa kóɗ Ŋgɛrɛwṵru na. Faa ká mì ɗaa sùo-i tuŋ kḭ mí ɗáake nun nzoɓ mbika lawri tuɔ síe taŋ kɔ́kɔ nun síe ɓari ɓay ɓíɛ ri na, ì kɔ nda̰w. 14 Nzoɓri ká i ɓa bǎw ɓiri ɓáy sa̰w ɓiri ká i tɔŋ fal fe ɗáa Ziɓri ká ɓa kóɗ Ŋgɛrɛwṵru na, mì nduɔ kiyaw kiyaw ká ɗi mí mba tul-ri riw bele.

15 Roo lɛ, pola rɔɔ ɓay haŋa ri mbóŋ mì na, Ŋgɛrɛwṵru náa mì ɗo ɓoɗ, a ɗí mì ɓáy faa law kere ɓe ɓay haŋa mì vi ɓa nzoɓ peɗ ɓe. 16 Ze nam ká Ŋgɛrɛwṵru hii na vi báyḭi lɛ, ka kiɛ mì Vi-e na, ɓay haŋa mì ka-káa Ɓay Kere ɓe na ha̰ nzoɓri ká i ɓa Ziɓ ya, ká i kɔ Ŋgɛrɛwṵru ya na ha ri laa. Lɛɛ, mì se mí vbi nzaa ɓoko ká luo nzoɓ mbḭw ya, 17 a mí se Zuruzalɛm luo *nzoɓ ndáy nzaapeɗri ká i ɗo pola ha̰ mì na ya nda̰w, roo lɛ, mì zɔl ɓa vaa hɔy mí se tusiri Arabi. Falɛ ku rɔɔ, mì yḭ̀i mí se Damas ɓáy. 18 Falɛ ku ká ɗaa mbiimbam say nda̰w rɔɔ, mì se Zuruzalɛm ɓay kɔ́kɔ Piyɛr, a mí ɗaa nam duɔ falɛ ndeɓe hɔy ziŋ ni. 19 Mì ziŋ nzoɓ kḭ mbḭw mini ká ɓa nzoɓ ndáy nzaapeɗ ká ɗi ya, roo lɛ, ɓa Zak huo-ɛ kḭ hɔy ká ɓa yṵ Ŋgɛrɛmbay ze mì ziŋ ni. 20 Ɓay ká mì vbie ɗo mbeɗe ha rì key na ɓa sùo ɓay kḭ. Ŋgɛrɛwṵru ɓa nzoɓ ɓay nasi ɓi, mì kuɗ ɓay ya. 21 Falɛ ku rɔɔ, mì zɔl mí se tusiri Siri ɓáy Silisi. 22 Ɓil sewke ku na, nzoɓ mbika lawri ká i mbṵ tul kḭ ɓoɗ ɓoɗ ká kuɗu zaɗ ká Zude na, i kɔ mì ya rɔɓay. 23 I laa ɓa soro ɓay ɓi hɔy mii: «Ɓe káʼa ɗaa nun nzoɓ mbika lawri tuɔ síe ɓamba ká pola na, ka ɗo ɓoɗ ro. A timbɛɗɛ key lɛ, ka ka-káa Ɓay Kere taa mbḭwke káʼa ɓiɛ ɓayke ká pola na ha̰ nzoɓri ɗáake law-ri ɓo tul Krisi.» 24 Lɛɛ, i písike Ŋgɛrɛwṵru ɓay tul-i.