18
Bebilon taon qasoqa
1 Taqa zita-te, no enzol ezoqa nøme no-omét. Yan-té gendovís. Ndego bazaføgakh kandambá neka waev bæbæs-qapé. Ta waev ndøgo, manqei-qape, sùgumu-gutavát. 2 18:2-3 Veve 14:8; Isa 13:21; 34:11-14; Jer 50:39Yaq ndego kandambaqapé møndæ-akhá. Āv gene-akhá nqǽgo,
“Mø̀ndøbøí. Bebilon taon kandambaqape, mø̀ndøbøí.
Gevøgev nekā nqova soqøsoqa, mø̀ndømø-tiqá-khóev.
Gekha pipisi neka søvakha gigiāp ndigu,
Mbumbukiam-qa bøi-te soqain ndigu, ndego ndesanqaza,
ndǿgo tiyagé.
3 Zapa ndǿgo, Bebilon taon,
ndøgo ande sævam me nduigu,
bawabawan ate ndægo,
tuqa mambe matev waen ndø-izumám, kawa vøzø̄-okɨvam.
Até manqei-qape kawakawa-zá-ya, tu namba mambe matev vø̄egoam.
Neka bisnis ezoqam, manqei-qape-te ngiyage, tu zapaya, gèmø-moni-kopoav-ezoqam-éz.
Zapa ndǿgo, ndugu gigiap møqǽ.”
4 18:4 Isa 48:20; Jer 50:8; 51:6, 45; 2 Ko 6:17Yaq no manqat nøme nø-ewág. Yan-té qando-fakhán. Āv qande-eín nqǽgo,
“Nogi ezoqam! Mòzotøndo-fakház.
Vø̀ndo-fakház, zo Bebilon taon mokho-te ndozotu꞉gu.
Soqaín ndøgo,
zo tu namba manqa-zapa gone-te tozo-khokhombupat.
Neka soqaín ndøgo,
tu namba yaq-fia nqosøgeap sa tozotumu-upøgim.
5 18:5 Gen 18:20-21; Jer 51:9Tuqa manqa-zapazapa, khàpumu-kapuiám, yan vømø̄khanaz.
Mbumbukiam tuqa matev soqøsoqa, manqa mate navøepøteáv.
6 18:6 Psa 137:8; Jer 50:15, 29; 2 Tes 1:6Zo yaq āv tømbøe-matønømém, av zo guzømbe-matønumam.
Zo tu-te yaq-fia menás sozó-taném, av matev guimatønumam.
Waen føgakh soqaqape guzø-etoam, yaq menás sozombó-etøomém.
7 18:7 Isa 47:7-9Av ndugu gui-khambuvupam
neka gigiap kopoav-qape qambøegoam,
yaq zo nqosøgeap neka mbøni vaev matev,
āv tozombøé-etøomém.
Ndugu mokho-mba,
āv guni-manqaté nqǽgo,
‘No kawa sævam noqomát.
No ngæmám mbá. No ambá av nqǣgo, anganeam genønanīm.
Matev soqain genǿ-fakhanák. No mbøni genǿvayák.’
8 18:8 Veve 17:16Geté ndugu av nduikhambuvap,
ta zapaya ndøgo, matev soqøsoqa vinivinimba, khøuwa kopo-té segembøé-fakhanám,
løvøte neka mbøni vaev neka ifin matev.
Yaq ndugu gøinám guní-lonqotøvém.
Zapa ndǿgo, Evezøza Mbumbukiam, ndugu yaq-fia nqosøgeap ndembo-etoam,
ndego bazaføgakh-qapé.”
9 18:9-10 Ezek 26:17; 27:30-35Yaq manqei-qape kawakawa-za, tu namba mambe matev gi꞉goam neka tuqa gigiap kopoav qazøgoupam, ndigu gé-eivám, mbøni vøzǿ-nqosøgīm, khøifa tiqeivim, tutuavet. 10 Ndigu qambaqapé segendó-waniapét. Gó꞉khouwaném, matev soqaqape tiqeivim, tu-te tøfakhan. Yaq āv giní-ugufømém nqǽgo,
“Hao, ú꞉-ā꞉!
O Bebilon taon kandambaqape, bazaføgakh-qape.
Qoqa manqa-zapa-qa yaq-fia, nakhamas-té qanøqa-fakhán.”
11 18:11 Ezek 27:36Neka bisnis ezoqam, manqei-qape-te, gé-eivám neka tu zapaya mbøni vøzǿvā. Zapa ndǿgo, ezoqa nøme mbaín, tiqa gigiap tiwiat. 12 18:12 Ezek 27:12-13, 22Ezoqa tiqa gigiap sekemba géwiák, kopømba ande av gol neka silva neka nandi qaniqanimav-qape neka aqeing agiwa-qasis, neka ndabua mbomømboma køkø-køkouk neka khagi vinivinimba, neka tae vinivinimba fia kandakanda, neka gigiap ndøgo, søvakha gigiap-gi khayam khakheitap, neka tae ndis fia kandakanda, neka gigiap ndøgo, auli neka nandi khakheitap. 13 Neka ezoqa nøme mbaín, tiqa gigiap tiwiat, kopømba ande av lou mokhov eqeieqei nonqo, neka gigiap sisip mbomømboma, toqo-mboqotumat, neka nøme ndøgo, kha-te toqo-gɨ꞉mat, neka waen neka oliv oil, neka flawa, neka wit, neka kao, neka sip, neka hos, neka manqei khagua, neka até ezoqam-aním-a.
14 Ndigu bisnis ezoqam, āv giní-einím nqǽgo, “Bébilon. Gigiap ate ndægo, qo møqæ qaqagoam, qo mø̀ndø-qøuváq. Qoqa gigiap qaniqanim neka fia kandakanda mø̀ndøqa-navøém. Qo nango geqá-fakhanák.”
15 18:15 Ezek 27:31, 36Ndigu bisnis ezoqam, tu mokho-te gimø-gigiap-kopoav-ezoqam-ez, ndigu qambaqapé segendó-waniapét. Gó꞉khouwaném, matev soqaqape tiqeivim, tu-te tøfakhan. Ndigu gé-eivám neka mbøni vøzǿ-nqosogīm. 16 18:16 Veve 17:4Yaq āv giní-ugufømém nqǽgo,
“Hao, ú꞉-ā꞉!
O taon kandambaqape, bazaføgakh-qape,
qo ndabua mbomømboma papaqa-papaqa neka køkø-køkouk neka kiki-kikis qoqo-uzumam
neka qoqa kha, gol neka nandi mbomømboma neka aqeing agiwa-qasis voqotē-khakheinumam,
17 18:17 Isa 23:14; Ezek 27:27-29qoqa gigiap mbomømboma, ate qaqambe-goam,
nakhamas-té qanøqa-soqøsoqøám.”
Palai khagua nøzøgim ezoqam ate ti꞉goat neka ezoqa ewaqape, khagua-te, manqei nøme-te tiguvimat, neka ezoqa ewaqape, khagua-te tisasaetat neka gekha ezoqām ndigu, ndaola-te yage tindapat, ndigu qambaqapé segendó-waniapét. 18 18:18 Ezek 27:32Yaq khøifa tiqeivim, ndugu tutuavet, yaq āv giní-akhaemém nqǽgo, “Gê, taon kandambaqape nøme tǿgo, av nqanek taon qægoam? Mbaín.”
19 Yaq ndigu gè-akhaemém, neka gè-eivám. Neka tiqa mbøni nqosøgeap-te, ekeza kawa-te, pakhakh ndønqagimám. Yaq āv gini-einím nqǽgo,
“Hao, ú꞉-ā꞉!
Taon kandambaqape. Tu mokho-te, palai khagua evøndipakha ate ndi꞉gu, ndaola-te gibøetam,
ndigu mø̀ndømø-moni-kopoav-ezoqam-eztám, tiqa gigiap guwiam.
Geté ndugu nakhamas-té gunø-soqoév.”
20 18:20 Isa 44:23; Deut 32:43; Jer 51:48“Geté zo yan-te ndozoyage,
neka zo Mbumbukiam-gi ezoqam,
Keliso-gi u-anim neka Mbumbukiam-gi manqa vevezam ezoqam namba,
zo khanakhanakh bezøgó, tu zapaya.
Zapa ndǿgo, matev soqøsoqa, zo guzø-matønumam,
Mbumbukiam Bebilon-te, yaq-fia me꞉tá.”
21 18:21 Jer 51:63-64; Ezek 26:21Yaq enzol ezoqam bazaføgakh-qape, nandi kandambaqape ndøndapáz. Kandambá tintív. Tiqa khouwezat, andé wit mivitøzat nonqó. Yaq ndaola-té genø-ogezó, gendo-ein,
“Taon kandambaqape, Bebilon, āv tøné-ogí.
Bazaføgakh-ús.
Yaq ezoqa nango géqeivimák.
22 18:22 Isa 24:8; Ezek 26:13Qo mokho-te,
gita khaneam ezoqam-qa khaneam neka ouv qaqayam ezoqam-qa wag neka ndigu pøinda o kipi gikhambøematun, taqa wag,
ezoqa nango géyogemák.
Neka qo mokho-te,
sasae vinivinimba zøtezat ezoqam, nango gégoák.
Neka ndigu wit nandi gi꞉mivisumatun,
ezoqa taqa u, nango géyogemák.
23 18:23 Jer 7:34; 16:9; 25:10Neka qo mokho-te, lampa waev nango gékhayák.
Neka qo mokho-te, sakheis neka angana, ndigu tinøkem,
tiqa khanakhanakh manqat, ezoqa nango géyogemák.
Matev āv taqambé-fakhán.
Zapa ndǿgo, qogi bisnis ezoqam, manqei-qape-te ate nqægo, āv gini-khambuvupám nqǽgo,
‘Ni bisnis ezoqam kandakandá.’
Neka qoqa manqa-sisi matev,
qo bawabawan ate ndægo qote-tubumám.
24 18:24 Jer 51:49; Veve 17:6Mbumbukiam-gi manqa vevezam ezoqam neka Mbumbukiam-gi ezoqam ate ndi꞉gu,
tiqa kouk, Bebilon taon-té giqeivím.
Ndøgo tuqá manqa-zapá, ndigu gizitagat, vø̄pakhaetat,
ezoqa ewaqape nøme namba, manqei-qape-te gizitagat.”
18:2 18:2-3 Veve 14:8; Isa 13:21; 34:11-14; Jer 50:39
18:4 18:4 Isa 48:20; Jer 50:8; 51:6, 45; 2 Ko 6:17
18:5 18:5 Gen 18:20-21; Jer 51:9
18:6 18:6 Psa 137:8; Jer 50:15, 29; 2 Tes 1:6
18:7 18:7 Isa 47:7-9
18:8 18:8 Veve 17:16
18:9 18:9-10 Ezek 26:17; 27:30-35
18:11 18:11 Ezek 27:36
18:12 18:12 Ezek 27:12-13, 22
18:15 18:15 Ezek 27:31, 36
18:17 18:17 Isa 23:14; Ezek 27:27-29
18:18 18:18 Ezek 27:32
18:20 18:20 Isa 44:23; Deut 32:43; Jer 51:48
18:21 18:21 Jer 51:63-64; Ezek 26:21
18:22 18:22 Isa 24:8; Ezek 26:13
18:23 18:23 Jer 7:34; 16:9; 25:10
18:24 18:24 Jer 51:49; Veve 17:6