JON
Kamambuno Wakai Jon muno boglkwa
Ka mongo yegl ende okuna ongwa
Jon yegl dungwa, “Yesus yene God kamo wu yomba pindre ana nono mina suna moglkwa.”
Jon pirkan orkwa i yomba eremogl God Wam Yesus pre pirngi dindre ana kor aimande moraglmedi pre ka i muno boglkwa. Te Yesus kor moglkwa enge kimagl merkinde orkwa, i ama muno boglkwa. Te kunda ikine undre Yesus sikane sindre ana endi-prak mina sigeglkwa. Ba Yesus gogltre ande enge suwota mina aglke andigl ukor ongwa. Te ka tau di simboglkwa i yomba nangino mina taragl kandre ana nendre erimara ipre ka dungo yegl pangwa. Nigl ya bret ya ken-lam ya endi wain ya te sipsip sugl yomba, ka i yene pre ka simbogl di muno boglko pangwa.
Te Yesus mina kor aimande meglkwa inaglkwa ipre Jon ka giglendi dungwa.
1
Ka wu yomba ongwa
1 Okuna imbo Ka i pai moglkwa. Ana Ka i God bogl moglkwa. Ana Ka i God moglkwa. 2 Ye okuna imbo God bogl moglkwa.
3 Ye mina taragl prapra God ere yongwa, taragl kanekane ere yongwa i ye moglko keunde ere yongwa. 4 Kor meglkwa ye mina yongwa ana kor-meglkwa i yomba ambuglangeno. 5 Ana ken i mim ormara suna ambuglange sungwa, ba mim i wu sigongonagledi orkwa manga.
6 Yagl ta wu pene pi moglkwa ye God diendungo ungwa, kangiye Jon. 7 Ye ken ambuglange kamo i dipene endinan ana ye mina yomba prapra pirngi dinaglkwa pre ye ka-singiye yomba ungwa. 8 Jon yene ken ambuglange ta moglkrukwa, ba ken ambuglange i kamo ana ye dipene endina pre ungwa. 9 Ana ken ambuglange kaima i ambuglangesi yomba makan uglo koglkoglo tenapre ungwa.
10 Ye makandle moglko ana ye mina God dumo makan koglkoglo ere yongwa ba makan yomba ye pirkanpogl sikrikwa. 11 Yene dumo makanmo mina ungwa. Ba yene yombama diwakai yeitekrikwa. 12 Yomba tau ye di-ingwa ana ye kangiye mina pirngi dingwa, yeglpre ye pra God nangiglma meglme dungwa. 13 God nangiglma i neno mano bormaino mina kugl yei kiurika te yomba ka dikogl erimere i manga te enene pirmere i manga ba God yene prumere ere i nangiglma endungwa.
14 Ana Ka wu yomba pindre nono mina suna moglkwa. No ye ambuglangemo kamga. Ana ambuglange i ye suwara, Nem diendungo ungwa. Yeglpre ye wakaimo ya Ka kaima ye mina kau sungwa. Ye God Wam kaima moglkwa.
15 Jon eremogl Yesus pre dinongugl endungwa, ye ka kande dindre dungwa, “Na yomba ipre dingra, na komnaiye winga ba yomba i na mokonamugl ungwa, ye okuna imbo mogltre ana mogl-mitna ende na engrukwa.” 16 Ye wakaimo kausi moglko i mina no prapra ere wakai ere mundu-mundu yumga. 17 God lomo Moses tongwa ba ye wakaimo ya ka kaima i Yesus Krais mina ungwa. 18 Yomba ta God kankrikwa, ba God Wam suwara ye Nem bogl akiye miurka pre ye mina Nem ombuno dipene endungwa.
Jon Baptais na Krais moglkriye dungwa
(Matyu 3:1-12; Mak 1:7-8; Luk 3:15-17)
19 Jerusalem dumo suna Juda yomba eremogl pris ya Levai wagle diende ana Jon ira moglmda krapogl piryo dingwa. 20 Ye uglmange erekre dinongugl ende dungwa, “Na Krais ta moglkrikwa.”* God yomba i-ikine endinambuka pre yagl ta pinde yungwa i, Grik ka mina ye, “Krais”.
21 Ana ye krapeglkwa, “Ene irane? Ene Elaija motno?”
Jon di ikine endungwa, “Na tamanga.”
Ana ye dingwa, “Ene Propet ta motno?”
Ye di ikine ende dungwa, “Na tamanga.”
22 Ana okuwo ye dingwa, “Ene irane? Dinotn no pi diendigo umga yomba ye ene ira motnga i ka mongo ditenamga.”
23 Jon eremogl propet Aisaia ka muno boglkwa i di ikine endungwa, “Makan waule suna yomba ta wiyau dungwa i na mina pai yungwa. Yaglkande pre konbo si-ake du endiyo.”✡ Aisaia 40:3
24 Parisi wagle yomba diendingo wingwa ikra 25 krapogl Jon teingwa, “Ene Krais mo Elaija, mo Propet ta moglkitn ana ene sraglpre yomba baptais tene?”
26 Jon di ikine ende yegl dungwa, “Na nigl mina baptais teinga, ba ene meglmara suna i yomba ta moglkwa ene pirkan erekrikwa. 27 Ye mokonamugl ungwa, na yomba wakai ta moglmbo kade ye kagle towo mina kan tonguma pangwa i na ta pirka sinaglka kuno erekrukwa.”
28 Taragl prapra plau dungwa i Jodan Nigle koglo imbo Betani makan Jon yomba baptais ere tomara igle.
Yesus, ye God Sipsipmo Nangigle
29 Ana enge tangina Jon kango Yesus ende ye moglmara ungwa. Ana Jon yegl dungwa, “Kaniyo, Yomba i God Sipsipmo Nangigle makandle yomba tandaglmeno koko endina pre ungwa. 30 Na ka dinga ikra yomba ipre mendigl digra, ‘Yomba ta na mokonamugl ungwa i mogl-mitna ende na engrukwa. Sraglpre na moglkriko ye okuna imbo moglkwa.’ 31 Na nana ye ira moglkwa i ta pir kanpogl sikrika, ba na mambuno ta pango wu nigl mina baptais teinga i Israel yomba meglmara igle wu pene enan kanaglkwa pre erika.”
32 Ana Jon yene mambunomo dipene ende tongwa, “Na kaninga Holi Spirit kua yumugl mereyegl heven imbo ende atne undre ye mina moglkwa. 33 Yomba i ira moglkwa, i ta pirkan erekrika, ba God na diende nigl mina baptais to dindre ana yegl dinarkwa, “Ene kanmin Holi Spirit ende atne wu yagl ta mina ake morambuka i ye yomba Holi Spirit mina baptais tenambuka. 34 Na i kandre, ana ye God Wam kaima moglme dinga.
Yesus disaipel 4 komuno pinde yungwa
35 Ana tangina Jon eremogl disaipelmo suwo bogl akiye aglke kordagl igle meglkwa. 36 Jon kango Yesus konbauna ende wongo ana ye dungwa, “Kaniro, i God Sipsipmo Nangigle.”
37 Ye disaipelmo suwo ka i dungo pirmbrika enge, ana Yesus omara mokomugl embrika. 38 Yesus kan ikine endungo yagl suwo i mokomugl embriko ana krapogl tongwa, “Ene aglokra moglpai etne?”
Ye dimbrika, “Rabai” (i mambuno yegl, Beke Notnga), “Ene yungu aglokra motne?”
39 Ye di ikine endungwa, “Ene undre, ana kanambrika.”
Yeglpre ye endpi moglmara igle kanbriko ana ande enge mundu ye akiye igle meglko ana ande kuiya 4 klok yongwa.
40 Ana Jon ka dungo pirtre, Yesus omara mokomugl embrika ikra ta Andru, ye Saimon Pita angigle. 41 Ana komnaiye Andru ta orkwa i, ye angigle Saimon doko kan indre ana ditongwa, “No Mesaia kan imbuglka.” (I mambuno Krais we dingwa.)
42 Ana Andru eremogl Saimon auro yu Yesus moglmara ungo ana ye Saimon kandre dungwa, “Ene Saimon, Jon wam. Ene kangin Sipas we dinaglkwa.” Sipas i Aram ka mina kangiye yeingwa, i Juda yomba kanno pangwa. Te Grik ka mina Pita.
Yesus eremogl Pilip ya Nataniel diyungwa
43 Ana tangina Yesus ende Galili kamun enagledi orkwa. Ye pi Pilip kan indre yegl ditongwa, “Na wimara wo.”
44 Pilip, ye Betsaida taun nem, dumo igle ombugl Andru ya Pita ye kamuno yongwa. 45 Pilip eremogl Nataniel kandre yegl ditongwa, “Yomba ta pre Moses lo mina pepa muno boglko te propet wagle ye pre ama pepa beglko pangwa ikra no kan yumga. I Yesus ye Josep wam. Nasaret kamun nem.”
46 Ana Nataniel ye ka kra yegl pogl tongwa, “Taragl wakai ta Nasaret kamun plau dinambo?”
Pilip ye di ikine ende tongwa, “Ene undre ana kano.”
47 Ana Yesus kango Nataniel ye moglmara ungo ana ye pre yegl dungwa, “Kaniyo, yagl i Israel yomba kaima, ye mina suna kakimbi ta paikrukwa.”
48 Nataniel kra yegl poglkwa, “Ene sraglmere na pirkan etne?”
Yesus di ikine endungwa, “Okuna imbo Pilip ene aglendi ikrukwa enge ene endi kogla mambuno mina mogl panga enge ikra, ana na ene kan-kondinga.” 49 Nataniel di ikine endungwa, “Beke Notnga, ene God Wam, Israel yomba Kingno.”
50 Ana Yesus dungwa, “Ene endi kogla mambuno mina motngo, ene kaniye dinga ikra pre ene pirngi dinga ba kanere yeglmere okuwo taragl giglendi ama kanatnga.” 51 Yesus ka ta aine yegl dungwa, “Na ka kaima ene diteinga, okuwo heven audinan ana Yomba Wam mina God angelomo ende mitna pi ende atne wu erimbi ene kanaglkwa.”