1 Miiyo Paawulu, aswihaapa wa Yinsa Al-Masiihu khwa oruma wa Nnyizinku namuusuru etthu na wa Yinsa Al-Masiihu nroromelo etthu, 2 kiniwaatikhela weeyo Timootiyu, mwanaka w'eekhweele nkatthi wa tiini yoori rehema, huruma na heeri ya Nnyizinku papeetthu na ya Yinsa Al-Masiihu Mbwaneetthu, yiiye vamote na-weyo.

3 Nkhama etthiipo kaawuuziyeezo wakathi opule kaari weettaavo nti wa Masedoniya, yoori amana osala nti wa Efeeziyu owaahirimize atthu akina yoori ahikhanyarele osomisa mwentto woovonyeya. 4 Owoozaka theenya yoori alikhe olottela hantisi na waalaka mazina a marehemu. Epo zaya zintiisa onyakulisana na enlikhisa mwentto wa Nnyizinku onlottaniwaaye amini. 5 Maana a masomi aya apa ophetana wa rooho y'ookemaani, na ojuwa othawula yooshapweya vakatthi wa yootakhala, na amini yoohiiyi yoonaafikhi. 6 Akinoko ajilaziyeemo, arutelaka olottela vitthu zootakhala zoohiina fwayita. 7 Yo antakha ojiretta wiiya anamanozela a kano za Nnyizinku, ila khiniweeleya, wala epile anlupaazo na haakhi yaya khanjuwa.

8 Apha ninjuwacha yoori kano pi zooshapweya zirumeeyeliwaru khwa nanna zinlupaazo. 9 Nijuwaka etthiipo yoori kano khazaawaateeliye atthu apale aneettettelaaye shariya, ila zaawaateeliye apale oohiiyi a shariya na anamakhijili, zaawaateeliye makaafiri na anatwampi, zaawaateeliye anamatakhala-rooho na anamakufuru, zaawaateeliye apale aniwoolaaye apapazaya na amamazaya, zaawaateeliye apale aniwoolaaye azaaya, 10 zaawaateeliye anamajansili na apale aniwaalalanaaye alume azaaya, zaawaateeliye apale aniwaakholaaye atthu na owoozanyisa na anamahata, zaawaateeliye apale anlaphaaye eettaka ohata, na ooshi apale mwentto woozuri ahintakhaaye. 11 Mwentto opo ori nhapari zooshapweya zinlankhaaye nkatthi wa nuuru ya Nnyizinku wa parakha, kinkhiweeyo miiyo olaleya.

12 Yinsa Al-Masiihu Mbwaneetthu akinkhiyeeyo kuvu, Ye akoona wiiya ntthu wa waamineya, khukinkha onrumeeyela, kininshukhurwela. 13 Miiyo-ena omwanzo kaari namakufuru, namalupattha, namahusuti, wakathi aya opule miiyo akaarina amini, etthu kaari orettaaye akaari ojuwa, apha kooneliwa huruma. 14 Rehema yooziti ya Mbwaneetthu khukiishukhela, khukipatthisa ompheta na omwaamini Ye. 15 Mattakhuzi apa pi ookhweele na ansuhi okhupaleliwa: Yinsa Al-Masiihu ti ye aatiiyeeyo voolumwenku oteela owoosuru anatwampi, wootepacha waya ti miyo. 16 Ti eto kooneliweeyo huruma, yoori khwa miiyo, wootepacha waya, Yinsa Al-Masiihu akivilela yoori awaathoonyeze ooshi apale anttelaaye omwaamini apatthe ohaayi wa mileele. 17 Apho, Mfwalume wa mileele attottopeliwe na asifwiwe siikhu zooshi, Ye ahinifwaaye wala ahinooneyaaye, Nnyizinku mmote othuuto. Amiina!

18 Masomi atthaapo kinuutumerela weeyo mwanaka Timootiyu, nkhama khwa weyo yuulupeziyeezo Rooho Ttakatthiifu, wuupuwelaka mattakhuzi apa wuuziweeyo, onttela owahi wuumana viittha ya nnafusi, 19 ojilipisanaka amini na ojuwa othawula yooshapweya vakatthi wa yootakhala. Mwaasa woohitakhi othawula yooshapweya, atthu akina amini yaya apwetecha. 20 Akina aya ti Hemeeni na Alishantere. Yo kawaalikhela Epiliisi yoori awaahoowise, ajuwe ohikufuru.