1 Wakathi aattameliyeevo Yeruzaleemu, khufiya Betifwaaje na Betaaniya, kharipu ya mwaako wa oluveera, Yinsa khuwaaruma anakhiyoni awe awiri, 2 khuwooza yoori: “Mwilawe mmuti mpho mwaattameliyeemo, mwifiyaka mwininsikana mwaana wa puuru afukiwe ahinaweliweke ti hatha ntthu. Mwinfukule mwintiise. 3 Amana apuwa ntthu awuuzelani yoori: ‘Mwaasa niini mwirettaka vitthu epo?’ Mwinjipu yoori: ‘Mbwana ontta onhithajiya na oninrutisa nasaapi.’ ” 4 Yo khulawa khunsikana mwaana wa puuru afukeleliwe, vanlako nwulu wa ntarikhi ya vaje, anfukulaka. 5 Atthu aari attaaphale khuwoozela araka: “Eto mwinrettaaye niini ya onfukula mwaana wa puuru oto?” 6 Anakhiyoni apale khujipu etthiipile Yinsa awooziyeeyo, na ye khuwaalikha olawana. 7 Khuntiisela mwaana wa puuru otule Yinsa, khutthaavo kuwo zawe na khuwela. 8 Atthu awaatta khusala attattikha kuwo zaya ntarikhi na akina khusala atthaamo virapi aashijiyeeyo ntthuttu. 9 Apale aalokoziyeeyo na apale aari onlottaaye khusala anyakula araka: “Hosaana!” Wooparikhiyiwa ti otule antaaye khwa nzina la Mbwana!” 10 Wooparikhiyiwa saana ofwalume ontaaye wa papeetthu Daawuuda!” Hosaana pinkuuni!” 11 Yinsa khufiya Yeruzaleemu na khulawa mpakha nnyupa woosifwiwamo. Khoona zooshi na wiiya waaripiye, khulawa Betaaniya na anakhiyoni awe apale khumi na awiri.

12 Mmeesho mwaya, wakathi aari olankhaaye Betaaniya, Yinsa khunkhola jala. 13 Ari peetiwene, khoona muutthi wa mfikeera wooripelela mathapa, khulawa woona nkhama aari osikanamo nshumo. Wakathi aattameliyeeyo, khuhisikanimo hatha etthu, woohiiyi mathapa, maana khawaari wakathi wa wiima fiiku. 14 Aphano khuuza mfikeera opule yoori: “Khina anttelaaye oja theenya mishumo khwa weeyo.” Anakhiyoni awe khusiila alupaka mattakhuzi apale. 15 Yinsa khufiya Yeruzaleemu, khuvira nnyupa woosifwiwamo na khwaaza oweekara apale aari wuuzanyisaaye na apale aari wuuzanyaaye. Khupwalula khukulu za anamapatilisa nzurukhu na za apale aari wuuzanyisaaye jiwa. 16 Khaari ontakhela ntthu oviranamo etthu yawuuzanyisa nnyupa woosifwiwamo. 17 Khusala asomisa araka: “Khayaatikhiweeni yoori: ‘Nyuupa yaka enttela wiiya nyuupa yoolompiwamo khwa atthu ooshi ila mweeyo mwarettisa wiiya likurakuza la manantarawu.” ’ 18 Mahaakhimu a tiini na anamanozela a kano khusiila mattakhuzi apale na khwaaza weekesa nanna ya omuula, maana eetta omoova, mwaasa wa khuntti khuluyeene yaari oshankisiwa pi masomi awe. 19 Weettelaka oripa, yo khulaamo nsitati mphule.

20 Mmeesho mwaya supuyeene, khoona mfikeera opule ori wawuuma mpakha na mitathaari zaya. 21 Pheeturu khuupuwela na khumuuza Yinsa yoori: “Mwaaliimu! Woone mfikeera opule waalaaniyeeyo wooma.” 22 Yinsa khunjipu yoori: “Wiiyane amini khwa Nluku. 23 Miiyo kiniwuuzani khweele yoori, wakhula otule anttelaaye wuuza mwaako opu yoori: ‘Okhuleyevo apha waajeeselele mpahari,’ na khuhiina hatha nshikili nroho mwawo, ila khukhupalela yoori enrettikhana etile olupiyeeyo, entta oretteya. 24 Apho, miiyo kiniwuuza yoori, zooshi weeyo onvekaazo khwa lompa, khukhupalela yoori apwekherela, onteela opattha. 25 Na amana olompaka, khwiiyana nzaawo okosiyeeyo, onswaamihi, yoori naye Paapa wa pinkuuni oswaamihi twampi zawo. 26 Ila mweeyo amana mwihiswaamihi, na mweeyo Paapa wa pinkuuni khanswaamihi twampi zenu.

27 Khufiya theenya Yeruzaleemu, wakathi Yinsa aari oviraaye nnyupa woosifwiwamo, khususeliwa ti mahaakhimu a tiini, anamanozela a kano na attunkhulu a tiini, 28 khusala amuuzela yoori: “Vitthu epi, onrettana ofwalume waani? Paani awinkhiyeeyo ofwalume wa orettana?” 29 Yinsa khujipu yoori: “Miiyo kintakha kiwuuzele, amana okijipu, kintta owuuza ofwalume kinrettanaaye vitthu epi. 30 Nkakuuze, woosa wa Yaahaya waari wa pinkuuni ama waari wa anaatamu?” 31 Yo khusala anyakulisana araka: “Amana niri ‘ti-ya pinkuuni,’ ontta onuuzela yoori: ‘Aphano mwaasa aya niini mwihinkhupalelaka?’ 32 Ila nihijilipisane olupa yoori waari wa atthu!” Maana yo aari owoova atthu, weekhweele atthu aari ookhupali yoori Yaahaya aari napiyu. 33 Aphano khunjipu Yinsa araka: “Khanijuweeni.” Yinsa zwaamu yawe khujipu yoori: “Hatha vattitthiiru, miiyo akiniwuuzani owahi kinrettanaaye vitthu epi.”