1 la nam i ga laun amana iat ra vunapaina, nina ba ave ga valongore, nina ba ave ga giragire ma ra kiau na mata i vevet, nina ba ave ga bobobe bulbulu ia, ma ave ga bili ia ma ra lima i vevet ure ra Tinata na nilaun 2 (ma di ga vaarike ra nilaun, ma ave ga gire, ma ave ga varve tar ra nilaun tukum ta vavat, nina dir ga ki guvai ma Tama, ma di ga vaarike tar ia ta vevet); 3 nina ba ave ga gire ma ave ga valongore, ave ve avat bula tana, upi dat a bartalaina ma avat, da avet, ave bartalaina ma Tama, ma Natuna Iesu Kristo; 4 ma go ra lavur magit ave tumu ia, upi da pait ot pa kada gugu tana.

5 Ma go ra varvai ave ga valongore tana, ma ave ve tar ia ta vavat, ba God ia ra kapa muka ma pa ta ik a matmat na bobotoi i tur pirana. 6 Ona da biti ba da tar bartalaina me, ma da vanavana ta ra bobotoi, da vaongo ko, ma pa da pait ra dovotina; 7 ma ona da vanavana ta ra kapa, da ia i ki ta ra kapa, da tar bartalaina vargil, ma ra gapu i Iesu, Natuna, i dalu vue ra varpiam parika kan dat. 8 Ona da biti ba pa ta varpiam i tur pire dat, da tuam pa mule Ke dat, ma ra dovotina pa i ki ta ra bala i dat. 9 Ona da tata kapa ure kada varpiam, ia iat i dovot ma i takodo upi na pun vue kada lavur varpiam, ma upi na vagomgom dat ta ra lavur magit ba pa i takodo. 10 Ona da biti ba, pa da ga pait ra varpiam, da vatang vaongo pirana, ma kana tinata pa i ki ta ra bala i dat.