1 Yisasia sikisia (6) kana maiteno Pitana Yemesina Yonigamina amavaleno ayaaya agoyafi hai-mainae. 2 Haiya mainageno Yisasina augosamoa alino alu augosa kaligeno augosafitila yage kana huno ai-vasa nehigeno kenaamoa efeage huno alave alave hu-maine. 3 Ageho tole kanolana nayoma fali-mainaa kanolana Moseseene Ilaiyaene Yisasiene kea kea nehae. 4 Nehaageno Pitaa Yisasife mage hie “Anumayamogae tagaya male maunana kanaleya hie. Kahaisigekahena katega nona talia (3) ki-lama-tesue kagaila nagolagi Mosesena nagolagi Ilaiyana nagolagi huno hanesie.” huno hie. 5 Ani kea hanepaigeno nagola hale yamaaene siamoa evayi huno alino aiso hu-mategeno siapinagati ala kefiti age aino mage huno hie “Mani kanoa nagai nafanegi nahau nayamopafi nenagea kanogi agaifena aluya huno nenahaigi agai kea haviho.” huno hie. 6 Higeya agaiaenema tokaeya nemaiya anagamoya koli huya amamayo aigeya mopafi amakoya aiye-mainae. 7 Amakoya aiyeya mainageno Yisasia avate eno mage hie “Kolia ohiho. Hetiho.” huno hu-maine. 8 Higeya age-saga huya agayana Yisasia agaiage mainegeya age-mainae.

9 Ageteya agoyafiti enelaviya Yisasia kahegi mateno mage huno hie “Anima agaya yafena nagoa veanea hamaopainegena ikapinagati emainoa kanoa vayamo natenea kanomona fali-mainesufiti hetisua yupa hama-paigahae.” huno hie. 10 Higeya agaiaenema lokaeya nemaiya anagamoya mage huya havigae “Naa higeya kahegi kema havilinaya anagamoya ‘Ilaiyaa hagoteno neesigeno Anumaya Kotia taugafa ali-gatisia kanoa egahie.’ huya nehayane?” huya havigae. 11 Havigageno Yisasia mage huno hie “Tamage Ilaiyaa hagoteno egahianagino mukia yana alino kanaleya huno talo tala hugahie. 12 Hugahianagi tamaha-nepauve Ilaiyaa ago emaineanagi agaila age-lama ohuya hamaiya kava huya agaila havi kava hu-tenaya kavala ania huya ikapinagati emainoa kanoa vayamo natenea kanomonina ali haviya hu-natesageno naugafa nagata aigahie.” huno hie. 13 Mani kema hiana “Yonia tima fale-neamatea kanomofe hie.” huya hu-mainae.

14 Yisasiene agaiaenema tokaeya nemaiya anagamoya mukia veala melitalu huya mainale evayi hageno nago kanomoa Yisasite mepe hu-maine. 15 Yisasifena mage huno hie “Anumayamogae kagaya nenafanenimona kahau huto. Ani nafanenia mananiya neagegeno augafamona ali haviya nehigeno mukia yupa ata tanekino tipi asaga hu-nelavino nehie. 16 Naa nehigena kagaiene tokaeya nemaiya anagakamogamite avalena oana aliya kanale hu-tesaya amukoamia omalene.” huno hie. 17 Higeno Yisasia mage huno hama-paiye “Vae tamakaya meni kanafima mainaya veamogatama nagaifena havitama tamakupi maletama tametitia ohutama fatago hutama nomaiye. Ania haya yafe kasalo nenahaegi namagi yupa tamakaienena mainesugetama nagaifena havitama tamakupina malegahae? huno nehuno ani nafanemo nefafe ‘Nafanekaa avaleka eno.’ huno hie. 18 Higeno avaleno egeno Yisasia anima agupi mainea Kefo Avamufena ke-makino ‘Ataleka hati-lavio.’ huno hutegeno hati-lavigeno aupaa ani nafanemona kanale hu-tene.”

19 Yisasiene tokaeya nemaiya anagamoya amakaiamige Yisasite mage huya me havigae “Tagaila naa higeno Kefo Avamuma anatisuna amukotia omale?” huya havigae. 20-21 Hageno Yisasia mage huno hama-paiye “Nagaifema havitama tamakupi maletama tamametiti haya yatamimoa osi hu-mainea yafe ani kava hisaya amukotamia omalene. E, nagaya tamage-lafa huna tamaha-nepauve tamakaya osi kanoa oagemo avina kanoa Masatati avinamoma hia kava hutama nagaifena havitama tamakupi malaleasina ma agoyamofena mage hutama hapaisagenoa ‘Hetika alule vuo.’ hisagenoa ani agoyamoa agola vileasine. Nagaifema havitama tamakupi malesayana tamakaya nago aliyafena ‘Amuha ohunone.’ hutama ohugahagi mukia tokiya kavala iohugahae.” huno hu-maine.

22 Kalili kotega alitalu huya mainageno Yisasia agaiaenema tokaeya nemaiya anagafe mage huno hama-paiye “Osi kanaa maitesugeno nago kanomoa nagesi huno ikapinagati emainoa kanoa vayamo natenea kanomonina kame vayamogami amayapi navaleno nategahie. 23 Natesigeya nahaesagena falisugeya he-vaina-tesagena tole yupa komufi maitena tagufa (3) molisia kanale etena he-tigahue.” huno higeya ani kehena agaiaenema tokaeya nemaiya anagamoya havigeno kanaage hamau-maine.

24 Nago yupa Yisasiene agaiene tokaeya nemaiya anagamoya Kapaneamu evayi hageya mono noma ali fatago hisaya monea vaya amaugafaleti takesi nealiya vayamoya Pitate mage huya me havigae “Tamakaila hu-lamave-nelia kanomoa ani mono note monea neataleo.” huya hae. 25 Hageno Pitaa mage hie “E, ani monea neatale.” huno nehuno nopinaga hai-falegeno Yisasia hagoteno mage huno havige “Saimonigae naane kagesa nehavine. Ma mopale sauve vayamoya vaya amaugafaleti takesi monea aliya tagami neamamiye? Mukia amakaiami kotega vayateti nealio ifi alu vayamogamiteti nealiyo?” huno havige. 26 Havigegeno Pitaa mage huno hie “Alu vayatetila afaa nealiye.” huno higeno Yisasia mage hie “Tamage hane. Ania huya amakaiami kotega vayamogami amaugafaletila takesi noaliye. Ania huta lagaya Anumaya Koti anaga mainonagi tagaitetila takesia oalisae. 27 Oaligahayanagi havigu naa hisunageyahena amaipamoa haviya hugahayanagika kagaya ti kotute visanaamoga noyame hukua atalesanageno tavisigeka hagote noyamema avayuma hinuka avaya ali aka hu-lineka nagola monea agegane. Ani monea alika ani vayala memamisanageya tolemogatia taaugafaleti takesi monea aligahae.” huno hu-maine.