1-2 Yisasia mage hie “Mukia kanafina nunamuna hiho. ‘Kasalo tahae.’ hutama oataleho. Ani kema havisaya yafe nagola huvame ke tamahapaigahue.” huno mage huno hie “Nago ala kumatela Yasi kanoa maine. Ani kanomoa veanehe agesa havioamamino Anumaya Kotifena kolia nohiane. 3 Nagola megusa alagino ani kumatela maineno mukia kanafina ani Yasi kanomote ete ete huno mage huno nehiane ‘Nago kanomoa ali-haviya hunategi kagaya kaiyekenia havika fatago ho.’ huno havige. 4-5 Havige havige maino higeno ani Yasi kanomoa hagote kanafina ‘Kaya ohugahue.’ huno hu-maineanagi eteno haenagaa agu agesamoa mage hie ‘Tamage huna nagaya Anumaya Kotifeene veafeene kolia nohuanagi ma megusa amoa nagaite ete ete hia yamoa onahaiyanagina afaa kaiyekea havina fatago hugahue. Ania ohisuana mukia yupa ete ete hisigeno tusia kasalo nahaegahie.’ huno humaine.”

6 Yisasia mage huno hie “Fatago kava ohunea Yasi kanomoma humainea kehena havilama hutama haviho. 7-8 Anumaya Kotima hisia yafena na tamakesa nehaviye? Agaia havinoma hapalimatenea veamoya nateene kegeene mage huya havinegae ‘Ali-haviya hulataya veamogamina ageteka fatago huka kaiyekea humato.’ huya havige havige hisageno ani kea havisio? E, afaa havigahie. Ayaaya kanagefa maiteno amaya hisio? Aao tamahanepauve ali-haviya hu-neamataya veamogamina aupaa anonaamia humategahie. Nagaya ikapinagati emainoa kanoa vayamo natenea kanomona etena esuana nagaifema haviya amakupi maleya ametiti nehaya veanea ma mopafina mainesao omainegahao?” huno humaine.

9-10 Nagoa veamoya amakaiami amaku amakesafiti “Kanale kava nehunageya nagoa veanea kefo kava nehaya anaga mainae.” huya nehaya veamogamifena Yisasia avame ke huno mage huno hie “Tole kanolatamogania nunamu hugahe mono nopi haiana umainae. Nago kanoa Falasia kanoe. Nago kanoa musufaya huno vaya amaugafaleti takisi mone aliliteno nehia kanoe. 11 Falasia kanomoa amunote mo hetino maineno Anumayamotega agaiahe mage huno hie ‘Nagaya nagoa veamoya nehaya kavala nohue. Musufayama haya kavala nohue. Fatago ohunaya veamogami augafa kavala nohue. Anele kumai nehaya kavala nohue. Mama mainenoma vaya amaugafaleti takisi mone aliliteno nehia kano kana ohunoe. Ani yafe musekaa nehue. 12 Mukia sotamo aliyapina nagaya tole yupa kavela mosina mainena mukia nealua yapitila teniama (10) malenofitila nagoke alitayena negamuane.’ huno hie.

13 Hianagi vaya amaugafaleti takisi monema aliliteno nehia kanomoa aluale maineno Anumaya Kotitega ke huno havigegahe hetimaineno ‘Nagaya kefo kano mainoe.’ huno ikapinaga agesaga ohuno ape huno havi kafa yonegino Anumaya Kotitega mage huno havige ‘Anumayamogae nagaya kefo kava hume hume nehauva kano mainoe. Nagaifena kalagi ainateka kahau hunato.’ huno havige.” 14 Yisasia mage huno hie “Nagaya tamahanepauve anima musufayama huno takisi monema aliliteno nehia kanomofena Anumaya Kotia ‘Fatago kano mainane.’ huno hutegeno nomaalega eteno umaineanagi hagote kanomofena ani kea hu oatene. Nagoa veamoya amakaiami amaugafa aliya haisayana Anumaya Kotia ‘Osi veane kanoa mainae.’ huno humategahianagi nagoa veamoya ‘Osi veane kanoa mainone.’ huya hisayana Anumaya Kotia amakia alisaga hugahie.” huno humaine.

15 Nagoa veamoya osi osi nafaneyaga Yisasite “Aya malesie.” huya amavaleya neageya agaiaene tokaeya nemaiya anagamoya ageteya “Naa kavala ohiho.” huya kemamaki-mainae. 16 Kemamakiyanagi Yisasia ani nafaneyagahe mage hie “Amatalegeya nagaitega eho.” higeya ageno mage hie “Nafaneyaga nagaite esaya yafena kahegi oamateho. Naa huya nafanemogami avamete maisaya veamoya mage hugahae ‘Tagaya tokiyatia omalenegi Anumaya Kotiga kava yagailato.’ huya hugahae. 17 Tamagelafa huna tamahanepauve nagoa veamoya nafane mainaya avamete maisaya veamoya mage hugahae ‘Tagaila tokiyatia omaleanagika Anumaya Kotiga kava yagailato.’ huya ohisayana Anumaya Kotima kava yagaisia kumatela ougahae.” huno hie.

18 Nago kava kanomoa mage huno havige “Kagaya kanaleya huka humavenelina kanomoga nagaya hanaa hutena agola maige maige hisua nahaimula alisue?” huno havige. 19 Havigegeno Yisasia kenonaa mage huno hie “Naa higeka nagaifena kanale kanoa mainane huka nehane? Anumaya Kotia agaiage kanale kanoa maine. 20 Kagaya Anumaya Koti kahegi kea ago havilinanagi ani kemoa mage huno humaine ‘Kumai he yana ohuo. Vayala hamaegeya ofaliho. Musufayana ohuo. ‘Ma kanomoa havi kava nehie.’ huka havigea huoato. Itakafokamo kea oatagaeka anakia alisaga huo.’ huno humaineane.” huno hie.

21 Higeno ani kanomoa mage hie “Nagaya nafanema mainoa kanaleti aepa hena mukia ani kema hana kea akave nemaloane.” huno hie. 22 Higeno Yisasia ani kea haviteno mage huno hie “Nago kavaene huo. Mukiama malenana mone fenoyayagaka alika fako faka huka moneamima omalenesia veane amamisanageno Anumaya Kotia ikapinaga hanea afenoyana kagaila kamigahie. Afenoyayagaka fako huka amamite amamite huteka nakave eno.” huno humaine.

23 Higeno ani kanomoa ani kea haviteno mone fenomaamoma kasagoma humainea yafe oatalesia agesa haviteno aipamoa tusi kanaage humaine. 24 Kanaage higeno Yisasia ageteno mage huno hie “Mukia mone fenoyaamima hanesia veamoya tusia kasageke huya ‘Anumaya Kotife kava yagailato.’ huya hugahae. 25 Nagola pulumaka kana afumo agia kemolomoa nekayamo kapima hai falesiana afaa yoyo huno hai falegahianagi mukia mone fenoyamaa hanesia kanomoa Anumaya Kotife ‘Kava yagainato.’ huno kasageke-voke hugahie.” huno humaine.

26 Higeya ani kea haviteya veamoya mage huya hae “Naama hu-mainesiana Anumaya Kotia hana veamogami amaku amamemaa aligatigahie?” huya hae. 27 Hageno Yisasia mage hie “Veamogamina himamuamia omaleneanagiya ohugahayanagi Anumaya Kotia mukia kava hisia himamua haneanagino afaa aligatigahie.” huno hie. 28 Nage higeno Pitaa mage huno hie “Havio tagaya mukia yatia ataleteta kagai kakavela neone.” huno hie. 29-30 Higeno Yisasia mage huno hamapaiye “Tamage huna tamahanepauve mukia veamoya Anumaya Kotia kava yagaisia kea veanema mo hamapaigahena noamiene aamiene amasaamiene nepuamiene itaafoamimoene nafaneamiene amataleya visagenoa Anumaya Kotia mopalema mainaya kanalema atalenaya yaene nagoene nagoene anonaa ohavunamaa ya amamiteno haenagama falote hisia kanafina maige maige hisaya hamaimuene amamigahie.” huno humaine.

31 Yisasia agaiaenema tokaeya nemaiya anagala hamaote amavaleno momateneno mage huno hie “Haviho tagaya Yelusalemu haisunageya mukia Anumaya Koti amaune vayamoya ikapinagati emainoa kanoa vayamo natenea kanomonihema kae-malenaya kemoa efalote huno tamage hugahie. 32 Nagaila natafa huya Yuta vea omainaya vayate navaleya momamisageya nagaye hisifa kea hunateya hu-haviya hunateteya amavetuna henategahae. 33 Hegi kayoteti nahaeteya tavata nahaesageya hevainatesagena tole yupa komufina maitena tagufa kanale fali-mainesufitila etena hetigahue.” huno hie. 34 Hianagi Yisasiene tokaeya nemaiya anagamoya kea haviyanagi ani kemo aepamoa falaki-mainea yafe havilama ohunae.

35 Yisasia Yeliko kumate uvayi hugahe mo aupa higeno nagola aulaga asu humainea kanomoa kate mopale maineno monehe aukaya hie. 36 Aukaya maino nehigeya mukia veamoya agaseya eutele haya yafe “Naa higeya mukia veamoya nagaseya enevae?” huno hie. 37 Higeya “Nasaleti Yisasia neegeya kagaseya enevae.” huya hae. 38 Hageno ala kegefafiti mage huno hie “Yisasiga Tevitina aginagomogae nagaila kahauna hunato.” huno hie.

39 Higeya aulegama mainaya veamoya kemakiya “Ke ohuka maiyo.” huya hayanagi nagoene ala kefiti keha keha hie “Yisasiga, Tevitina aginagomogae kahauna hunato.” huno keha keha humaine. 40-41 Higeno Yisasia haviteno anile heti-maineno “Avaletama nagaite eho.” huno higeya avaleya ageno Yisasia “Naa hugatesue hugeka nehane?” huno havigegeno “Musekaa nehue nagaya etena naulaga agesua yafe nehue.” huno hie. 42 Higeno Yisasia agaifena mage hie “Kaulaga agegali huo. Nagaifema havika kagupi maleka kametiti hanafe kaulagamoa ago kanale hugate.” huno hie. 43 Higeno aupaa ani kanomoa agegali nehuno Yisasi akave neeno Anumaya Koti agi alisaga nehigeya mukia anile alitalu humainaya veamoya ageteya Anumaya Koti agia alisaga humainae.