1 Vaya amaugafaleti takisi mone huhatiya aliliteya huya musufayama nehaya vayaene kefo yama hume hume nehaiya veanene Yisasi ke havigahe avate emainae. 2 Emainageya Falasia vayamoyaene kahegi kema havilinaya anagamoyaene ageteya mage huya ke vaimainae “Ma kanomoa kefo ya nehaya vayaene tokaeno maineno kavela nene.” huya hae. 3-4 Nehageno Yisasia avame kea mage huno hamapaiye “Hana kanomoga tamakaipitila vani hataletia (100) afua mainefiti nagola fanane higeno ani afumona nefaa mukia afua talapinaga amataleno viayamo nagokema fanane humainea afuahe atiyeno yeno ageno ali falote hisifi? E, fananema hisigeno ania huno ati ayegahae. 5 Atiyeno agefalote huteno tusia muse huno ageyafi aigagino avaleno umaine. 6 Kumate uvayi huteno vayaahe ke higeya melitalu hageno mage hie ‘Fananema humainea afua ago agefalote huafe tamakaiene nagaiene muse hisune.’ huno humaine.”

7 Yisasia hufalote huno mage hie “Ani kava huno mukia vani hataletia (100) veamoya kefo yafe amakua aiyahae huya fatago kava nehaya veafena Anumaya Kotia muse hugahianagi nagoke kanomoa kefo yama hume hume nehaisiletima ‘Kefo yania atalena nagaye higena aigagina Anumaya Kotitega etena nagua amigahue.’ hunoma hisigenofena Anumaya Kotia tusia muse hutegahie.”

8 Nago amoa teni (10) kina malenefiti nagola fanane higeno lamua hanagaliteno nomaafina halafi huno atiyeno yeno ali falote humaine. 9 Ali falote huteno vayaahe ke higeya melitalu hageno mage hie “Tamakaiene nagaiene muse hisune. Monenima fanane humainea monea ago atiyena yena ali falote hue.” huno humaine. 10 Yisasia hufalote huno mage hie “Nagaya tamahanepauve ani kava huya Anumaya Kotina ensole vayaamoya nagoke kanomoma kefo yama hume hume nehaisiletima ‘Kefo yaniahena nagaye higena aigagina Anumaya Kotitega etena nagua neamue.’ hunoma hisigenofena ensole anagamoya tusia muse hutegahae.”

11 Yisasia amakaifena mage huno hie nago kanomoa nafanelatamaa tole mainae. 12 Mainaanagino haenaga nafanemoa nefafe mage huno hapaiye “Nenafagae falisanana nagai ya hapaegahie huka hunatenana yana ago namio.” huno higeno nefaa mukia yamaa alino fako huno tole nafanelatamaamokani anamine.

13 Anamitegeno haenaga nafaneamoa osi kana kanoa maiteno mukia mone afenoyamaa alino ayaaya kotega umaineno hu osuyate mone afenomaa motale metale huno age haye hu yateene mone afenomaa mukia atale hano humaine. 14 Mukia yamaa hano higeno ani kumatega ala kafu haya kanamoa falote higeno nagoa nesia yana omalegeno tusia agatemaine.

15 Agategeno nagola ani kumate kanomotega viayamo “Aliyakaa alisue.” huno havigegeno “E.” huteno talapinaga hutegeno viayamo afuale kava yagaino maineno kaveamia amamine. 16 Neamamino mage hie “Vae nesua kavela omaleanagina afumo kavepiti haletinaa nesue.” huno humaine. Hianagi nago kanomoa nesia yana oamine. 17 Oamigeno agesamoa hao higeno agesafinaga mage huno hie “Mukia nenafa aliya veamoya amamu hia no maineya kasagoya kavela nenagena nagaya nagala legena maa huna falisua kavala nehue. 18 Nehuafe hetina nenafatega una mage huna hapaigahue ‘Nenafagae nagaya kefo ya hugatenoe. Kagaiene Anumaya Kotiene kefo ya hulanatoe. 19 Nagaila natenana nafanekamonae huna hisuana onategahianagina musekaa nehugi aliya kanokaa maisua yafe navalo.’ huna hugahue.” huno agesa havimaine.

20 Haviteno nefatega neeno aluale neegeno nefaa ageteno kalagi aino aiyayeno monukino atako humaine. 21 Atako nehigeno nafaneamoa agaifena mage huno hie “Nenafagae nagaya kefo ya hugatoe. Kagaiene Anumaya Kotiene kefo ya hulanatoe. Nagaya natenana nafanekamonae huna hisuana onategahie.” huno hie. 22 Higeno nefaa aliya veaamofena mage huno hie “Aupaa utama kanaleyama humainea kukena alitama me vaiteho. Ayapi vaisia kihana vaitetama aiya noene vaiteho. 23 Ala pulumaka afovaagema humainesia afua hetama kisageta neneta musekase hutesune. 24 Ma ma mainea nafanenimoa fali-mainefiti hetia yafeene fananema hu-mainefiti efalote hia yafeene musena hutesune.” huno higeya aepa heya tusi muse hutenae.

25-26 Huneatageno yage nafaneamoa hoyafinagati eno note evayi nehuno haviana yagame haya yaene amo ayaya kene me haviteno aliya kanomofena ke higeno egeno mage huno havige “Na kava nehae?” huno havigemaine. 27 Havigegeno mage hie “Kaganakamoa ago emaine. Augafamoa kanaleya higeno ea yafe negafaa afovaage afua hegeya neneya hafali ateya mainae.” huno hie. 28-29 Higeno nepuamoa aipa haviya higeno “Nagaya nopinaga ohaigahue.” huno higeno nefaa nopinagati eno mage hie “Musekaa nehugi ehaiyo.” huno tutu higeno nefafe mage huno hapaiye “Havio nagaya kasagoya kafua kagai aliya alige-lige huna kekaa nago kanafina ‘Aao.’ huna ohunuanagika vayaniamogamiene muse hisuna yana nagoke meme ataaua heka onamitafa hu-mainanane. 30 Onaminana yana ma nafanekamoa mone fenoyagakaa alino kumai anele momi memi higeno monekaa hano higeno emainegeka afovaage afua heka musekase huneatane.” huno hapaiye.

31-32 Higeno nefaa mage huno hie “Nafanenimogae mukia kanafina nagaiene nemainanagino mukia yania kagai ya hanegi kaganakamoa falino fanane humainefiti evayi hianagita muse huta taipamoa kanale hinageta maisunana ani yamoa kanale hulatesie.” huno hapaimaine.