1 Haenagaa Yisasia eteno agaienema tokaeya nemaiya anagaamogami amaule ma kava huno Taipiliasi tikotumo agegayalega evayi hu-maine. 2 Saimoni Pitaene, Tomasina nago agia Titimasie, tagai kefina kuyave nafane, Natanioloa, Kalili hanea kumala Kena kumate kanoene, tole Sepeti nafanelataa Yoniene, aganaamoene, tole Yisasina alevenia (11) anagaaene mainae. 3 Mainageno Saimoni Pitaa mage huno hama-pai-maine “Nagaya noyame kuya hugahe neue.” huno higeya mage hae “Kagaiene ugahune.” huya hapaiteya tipi kalefi hai-saga humaiya ani kegela vayanagi nagoke noyamea oalinae.

4 Oaligeno yagea hai vayi hugahe nehigeno Yisasia ti agegayalega he-ti-maiyanagi agaienema tokaeya nemaiya anagaamoya Yisasie huya agelama ohunae. 5 Agelama ohageno Yisasia mage huno hama-vige “Vae nafanenimogatama nagoa noyamea nealifi noaliye?” huno hamavi-gegeya “Aao noalune.” huya hapai-mainae. 6 Hapaigeno Yisasia mage huno hama-paiye “Tamakaya kukonagona tipi kalemona tamaga kaiyagamo haikanagati hagayu hutama malesayana noyamea aligahae.” huno hama-paigeya kukonagona ania huya hagayu hayana tusia noyame aligeno kanaage higeya alisaga hisaya yafena tusia ya hu-mainae.

7 Yisasienema tokaeya nemaiya anagapiti nehaiya kanoamoa Pitana mage huno hapaiye “Agaya Alatimoe.” huno hapaiye. Hapaigeno Saimoni Pitaa anima hia kea nehavino aupaa augafale anoya asagi-taleno aliyana nealileti eteno aupaa alino vai-lino tipina asaga hu-lavino Yisasitega nevie. 8 Vigeya ani tipi kalea alualelomagi vani hataleti (100) mita aupaale maineya nagoa Yisasienema tokaeya nemaiya anagaamoya kukonagona avayu huya ti agegayalega emainae. 9 Ti agegayalega me maleteya agayana ata nelegeno nago noyamene hame mayaene ani atafina hanegeya age-mainae. 10 Neagageno Yisasia mage huno hama-paiye “Menima aliya noyamefitila nagoa alitama eho.” huno hama-pai-maine. 11 Hama-paigeno Saimoni Pitaa tipi kalefi hai-saga hu-maino kukonagona avayu huno ti agegayalegama eana kasagoya noyame, vani hataleti fifiti talia (153) noyameyaga ani kukonagopina hiya hu-maiyanagi ani kukonagomoa ailagatoa ohune. 12 Yisasia mage huno hama-paiye “Tamakaya etama kavela me neho.” huno hama-paigeya agaienema tokaeya nemaiya anaga amamayoma aiya yafe “Kagaya lagae.” huya haviokenagi “Alatimo maine.” huyama amakesafinaga haviya yafe haviokenae. 13 Yisasia atale eayamo hame mayaene noyamene melino amamine.

14 Yisasina komufima he-vai-tageno etenoma he-ti-maineana tole yupa age-mainaleti eteno mani kavama hiana napa tali (3) kanale evayi higeya agaienema tokaeya nemaiya anagaamogata taulagafiti age-mainone.

15 Kavela netageno Yisasia Saimoni Pitana mage huno havige “Saimonigae Yoni nafanemoga kagaya ma vayala amakaseka nagoene kagua nenamino?” huno havige. Havigegeno Pitaa mage huno hie “E, Alaniamogae kagaya ago nehavine kagaifena nenahaiye.” huno higeno Yisasia mage huno hapaiye “Kagaya nagai sipi sipi nafaneyaga kavela amamio.” huno hapai-maine.

16 Hanepaino nagoene mage huno hie “Saimonigae Yoni nafanemoga kagua havika ago nenamino?” huno havigegeno Pitaa mage huno hapaiye “Kagaya ago nehavine nagaya kagaifena nenahaiye.” huno higeno Yisasia mage huno hapaiye “Kagaya sipi sipiyaganilela kava yagaiyo.” huno hapaiye. 17 Hapaiteno nagoene napa tali (3) kanale mage huno havige “Saimonigae Yoni nafanemoga nagaifena negahaiyo?” huno higeno napa tali (3) kanalema “Kagaya nagaifena negahaiyo?” hunoma havigea yafe Pita aipamoa kanaage higeno mage huno hie “Alaniamogae mukia yana ago havi-mainane. Nagaya kagaifema nenahaiya yafena ago nehavine.” huno hapaigeno Yisasia mage huno hie “Kagaya sipi sipiyagania kavela amamio.” huno hapai-maine. 18 Hapaiteno mage hie “Tamage-lafa huna kaha-pauve kagaya neyama maineka kamu nofila ki-takalo hu-maleteka ‘Visue.’ hukama hana kumatela nevananagi haenagaa kosunama lesanana kayana alisaga hu-linesanageya nagoa vayamoya kenaka fai-ga-teteya ‘Ougahuema.’ hukama nehisana kumatela afaa kavaleya ugahae.” huno hie. 19 Anima hia kemona aepaamoa mage huno hu-maine “Haenagaa kefo vayamoya katafa huya kahaesagekama falisana yateti Anumaya Kotina ala agi amigane.” huno aepaa huteno Yisasia Pitafena “Nakave eno.” huno hu-maine.

20 Yisasiene tokaeya nemaiya anagapiti hau ayamopafima hau-mainea kanoa kavema ne-mainaya yupa Yisasina avaale maineno mage huno havige-maineane “Alaniamogae kagaila kagesima huno kamema hu-ga-tesia kanoa hana kanomoe?” huno havigea kanomoa Yisasiene Pitagani anakave nevigeno Pitaa maiyahae huno age-maine. 21 Ageteno Pitaa Yisasina mage huno havige “Alaniamogae ani kanoa haenagaa hana augafa kava hugahie?” huno havige. 22 Havigegeno Yisasia mage huno hapaiye “Nakaima nahaisigenama ma mopafima etena esua yupa afaa mainesigenama esuana kagai yano? Kagaya nakave eno.” huno hapaiye. 23 Hapaiya kemoa anagaamogamipina mani kema hia kemoa ute ete higeya mage hae “Yonia ofaligahie.” huya hayanagi Yisasia “Ofaligahie.” huno hu-oa-tenegi “Nagaima nahaisigena ma mopafima etena esua yupa afaa mainesigenama esuana kagai yano?” huno hu-maine. 24 Ani kema hayana Yoninihe hu-maine. Nagaya mukia Yisasima hu-mainea kavafena tamaha-nepaina avona kae-malenoe. Nagayama nehua kea tamage-lafa huna havilinoa ke tamaha-nepauve.

25 Yisasia mukia alu ya alu yana hu-maineanagi nagoa vayamoya mani kema mukia nagoke nagoke avopima kayaleasina mani avoyagamoa kasago higeya malesaya kumamoa mukia ma kotega nagesa havuana hiya hileasine huna nehue.