1 Yisasia mage huno hie “Nagaifema tamakupima ago malenaletima neataletama alu kate ovisaya yafe mani kea tamaha-pai-mainoe. 2 Amakaya tamakaila mono nopitila tamavaleya tamanati-talegahae. Ani kanama esia kanafina nagoa veamoya tamakaila nelamahaeya ma amakesa havigahae ‘Mani kavama nehunana Anumaya Kotina akave nemalone.’ huya hugahae. 3 Nenafaene nagaienema amakua otaaminaya yafe ani kavala hu-lama-tegahae.

4 Ani kanama falote hisia kanafina tamaha-pai-mainoa kemoa tamakesa ai-hagalo hinagetama havilama hisaya yafe menia mani kea tamaha-nepauve. Ehe kanafina tamakaienema mainoa yafe nayona ani kea tamaha-opainoane.

5 Nagaima hu-na-tegena emainoa kanolega menia etena ugahuanagitama nago vekamoga nagaifena ‘Hanatega nevane?’ huka nahavi-nokane. 6 Nahavi-nokayanagi nagayama tamaha-pai-mainoa kehe tamakesa havitama tamahau nehae.

7 Tamahau nehayanagi tamage-lafa huna tamaha-nepauve nagayama ovisuana tamaya hisia kanoa omegahigi nagayake utena tamaya hisia kanoa hu-tesugeno tamakaitegama esiana kanale kanaa falote hu-lama-tegahie. 8 Efalotema hisiana tamaya hisia kanomoa mukia ma mopale veamogami kefo yama nehaya aepaamiene kanale kavama nehaya aepaamiene Anumaya Kotia kaiyekema hu-ma-tesia yamo aepaaene hu-falote hisigeya haviteya agegahae. 9 Kefo yamo aepamofena tamaya hisia kanomoa mage huno hugahie ‘Yisasifena havitama tamakupi maletama tamametiti nohaya yafe kefo yatamia hane.’ huno hugahie. 10 Nagaya Nenafa mainelega etena ugahuanagitama nagoene nagaila onagesayafe tamaya hisia vekamoa kanale kavama hisaya yamo aepaa hu-falote hinagetama havitetama agegahae. 11 Anumaya Kotia ma mopale kava kanoa, Satanina, ago kaiyekea hu-tenea yafe tamaya hisia vekaa Anumaya Kotima kaiyekema hu-ma-tesia yamo aepamoa hu-falote hinagetama havitetama agegahae.

12 Nagaya kasagoya kea tamaha-paigahe nehuanagi kanaage hu-mainea yafe tamakaya havilama hutama ohavigahae. 13 Ohavigahayanagi Anumaya Kotina tamageage nehia Avamuamoma esiana agaialegati mukia Anumaya Koti tamageage kea tamaha-paigahie. Agesafiti kea tamaha-opaigahianagino nehavia keageene haenagama esia kanafima falote hisia yamo kene tamaha-paigahie. 14 Tamaha-painageno ani kanomoa nagayama hu-mainoa kea tamakaila tamaha-paisia yafe nagai nagia tusiya huno ali-saga hugahie. 15 Hugahianagi mukia Nenafama malenea yana nagainia yamaage fatago huno hanea yafe mage hu-mainoe ‘Alu Aotage Avamumoa amisua kea alino tamakaila me lamaha-paigahie.’ huna hu-mainoe.”

16 “Osi kana kanoa nagoene onagegahagi osi kana kanoa maitetama etetama nagegahae.” huno hie. 17 Higeya nagoa agaiaenema tokaeya nemaiya anagaamoya amakaiamifina mage hae “Osi kana kanoa onagegahae huno nehuno etetama osi kana kanoa nagegahae huno nehunoma nehia kemona aepaamoa hanaa hu-maine? ‘Nenafatega visua yafe nehue.’ huno nehia kemona aepaa nohavune. 18 Osi kanaaema hia kemona aepaa naane huno nehie? Tagaya agayama hia kea nohavune.” huya nehae. 19 Nehuya havigegahema haya kea Yisasia ago aguafinaga haviteno mage huno hie “Hua kemoa ‘Osi kana kanoa nagaila onagegahagi etetama osi kanaa maitetama nagegahaema.’ hua kehena tamakaya lamakaya tamakaitamifina mani kemona aepaahe huge havige nehao? 20 Tamage-lafa huna lamaha-pauve tamakaya tamatalenama visua yafena avia ategahayanagi ma mopale veamoya muse hugahae. Tamakaila hagoteno tamahau hu-tesigetama haenagaa ai-yahae hutama muse hugahae. 21 Amoma nafanema ategahema nehuno agatama aisia kana falote hisia yafe hauna hianagi nafanema ago atetenoa ‘Nafanea ago atoe.’ huno muse nehuno agatama ai-mainea yafena age-kani-maine. 22 Ani kanamoa tamakaipina hane. Menia tamakaya tamahau nehayanagi etena tamakesugenoa tamakupina muse yamoa hiya hinageno nago kanomoa ani muse yana tamaha-ofalegahie. 23 Ani kanama evayima hisiana tamakaya nagaila nago yafena nahavi-okegahae. Tamage-lafa huna tamaha-pauve nagaifema hutama nagai nagima ayetama nago yafema Nenafama havigesayana mukia havigesaya yana afaa tamamigahie. 24 Nayoene meniene nagaifena nehutama nagia ayetama nagoke yafena Nenafana haviokenayane. Nagi menia muse yatamimoma tamakupina hiya huno hanesia yafena nahavigegena tamamino.”

25 “Mani kea tamakaila avame kefi hu-malena tamaha-nepauvanagi haenagaa mani avame kea nagoene ohugahuanagina hu-falote huna Nenafafena tamaha-paigahue. 26-27 Hu-falote hisugetama ani kanafina nagai nagile havigegahagi nagaya ‘Tamakaifena Nenafana havigegahue.’ huna ohunogi tamakaya nagaifena tamahau tamayamopafi nelamahaiya yafe Nenafaa tamakaifena hau ayamopafi nehainageno havigesaya yana agaia tamamigahie. Nagayama Anumaya Kotitegati emainoa kema tamakupi malenaya yafe Nenafaa tamakaifena hau ayamopafi nehaiye. 28 Nagaya Nenafaene mainoleti ma mopafina emainoe. Menia nagaya mani mopa atalena Nenafatega ugahue.” huno hie.

29 Higeya agaiaenema tokaeya nemaiya anagamoya mage hae “E, avame kefiti menia nohanagi hu-falote huka nehane. 30 Menia tagaya havunana kagaya mukia yana havimalenane. Mukia veamoya amakupima haviya yana ago havimainana yafe nago kanomoa nago yafena kahavi-okesie. Mukia yana havimainana yafe tagaya kagaifena Anumaya Kotitegati emainane huta tagupi malenone.” huya hae. 31 Yisasia kenonaamilela mage huno hie “Meni tamakaya havitama tamakupina nemaletama tamametiti nehafio? 32 Haviho nago kanamoa aupaa egahema hia kanamoa ago efalote hu-maine. Ani kanafina nagoke nagokemogatama nataletama kumatamile ute ete hugahae. Nataletama visagena nagainige maigahuanagi Nenafaa nagaienena maine. 33 Tamakua namitetama tamaipa falu hutama hilato hutama maisaya yafe mani kea tamaha-pai-mainoe. Ma mopale mainesageno nago kanaage yamoa falote hugahianagi kolia ohiho. Nagaya ma mopafi auava yana ago agasena kava yagai-mainoe.” huno hu-maine.