1 Haenagaa Poloa Atenisi kumala ataleno Kolini kumate umaine. 2 Anile maineno nago Yuta kanoa age-maine. Ani kanomo agia Akuilae. Kuma aepaa Potusi hanegi ani kanafina Palisilaa aamoene Itali kumateti emainae. Itali kumate kava kanomoa Kolotiusia mage huno kahegi malene “Mukia Yuta veamogatama Itali veamogami ala kumaamia, Lomua, neataletama viho.” huno humainea kehe Akuilaagi Palisilaagia ataleana Kolini umainaageno Poloa anakaitega umaine. 3 Uno monakeana nagoke aliyake hanegeno kena noma fakaniya mone nealiya aliya nealiageno monaketeno anakaiene tokaeno maineno ani aliyana ali-mainae. 4 Poloa mukia Sapati yupa Yuta vayamogami mono nopi haino tokiyaage kea huno Yuta vayaene Kaliki vayaene Yisasife amakupi malesayafe hamapai-maine.

5 Haenagaa Sailasiene Timotiene Masetoniati evayi nehaana Poloa alu aliya oalino mukia yupa Yuta veafena “Yisasie Anumaya Kotia lamaugafa aligatigahe hutenea kano maine.” huno hamapai-maine. 6 Hamanepaigeya agai kea hefalakiya hu-haviya havaya hutageno Poloa “Kefo kava nehae.” huno kenaale hanea kugukege yayaga aifopo huneataleno mage huno hamapaiye “Tamakaya Anumaya Kotitegati fananema hisayana tamakaitami yanagi nagai yana omalene. Menia nagaya tamatalena Isaleli veane omainaya veapi mo hamapaigahue.” huno humaine. 7 Huteno amataleno nago kanoa Anumaya Koti agi alisaga nehia kanomo nopi uno maine. Ani kanomo agia Titiusi Yasatusie. Ani kanomo nona Yuta vaya mono nomo avate hane. 8 Ani mono note soka kanomoa Kalisipusiene mukia agaia anagaaene Anumayamofe haviya amakupi malageya kasagoya Kolini mainaya veamogamina Poloa hamapaigeya Yisasife haviya amakupi maleya amametiti hutageno tina fale-matene.

9-10 Nago kegela Anumayamoa himonafi evayi huno Polofena mage huno hapaimaine “Kolia ohuka tokiyaage huka kea hamanepaika oatalo. Nagaya kagaiene mainoe. Maigahuanagino nago kanomoa hetino ali haviya huokategahayanagiya nagaini veala kasagoya mani kumatela mainae.” huno humaine. 11 Higeno Poloa ani kumatela nago kafugi sikisia (6) ikanagi huno ani vayapi maineno Anumaya Koti kea hamapai-maine

12-13 Hamapaiyanagi Kalioa “Kaliki kumate kava yagaiyo.” huya Lomu kava vayamoya hutageno kava yagaino mainea kanafina Yuta vayamoya alitalu huya Polona atafa huya Yasi kanomote avaleya mage huya mo hae “Ma kanomoa tagaila Lomu vayamogami kahegi kea atagaeno veafe mage huno nehie ‘Maa hutama Anumaya Koti agia alisaga hiho.’ huno humave-nelie.” huya hae. 14-15 Hageno Poloa kenonaamia hamapaigahe hianagi Kalioa mage huno hamapaiye “Yuta vayamogatama ani kanomoa tusia kefo kava hileasina kanale huna namena mailava huna mainena havuleasinagi tamakaya havige havage nehatagetama agilefe nehagi tamakaitami kahegi kehe nahavinegayanagi ani kea ohavigahue tamakaitami fako hiho. Nagaya naa augafa kema haviyafena nonahaiye” huno humaine. 16 Ani kea huteno kaiyeke havi nopitila hemanati-talene. 17 Hemanati-talegeya Yuta vayamogami mono note soka kanomona Sosetenesina atafa huya kaiyeke havi kumamo avate aiko-neliyana Kalioa “Aoteyamaae.” nehuno oagene.

18 Naama nehayana Poloa mukia kanafima nemaiya afuaganagamina amataleno Palisilaene Akuilaene anavaleno tipi kalefi haisaga humaiya Senikalia uteya Silia eneuya Poloa Anumaya Koti aufima hulokiya vaino kema humainea yafe aiyolagefa laga humaine. 19-21 Huteno Efesusi uvayi huteya Poloa Yuta vayamogami mono nopi hai-faleno Yuta vayaene huge havige nehigeya mage hae “Mani kumatela ayaaya kana maisane.” huya hayanagi “Aao.” nehuno amataleno ugahe mage huno hie “Anumaya Kotia haisigenahena haenagaa etena tamakaitega egahue.” huno humateteno Palisilaene Akuilaene neanataleno Efesusiti tipi kalefi asaga humaino elavi-maine.

22 Sisalia elavi-vayi huteno Yelusalemu haino Yisasi veane moli falu fala huneamateno Atioku lavi-maine.

23 Anile ayaaya kana maiteno neamataleno Yisasi veane ali lokiya vaimatetele huno alu kumate kumate vaiyatete huno mukia Kalesia kumateene Faligia kumateene ute ete humaine.

24 Nagola Yuta kanomo agia Apolosie kuma aepaa Alekasatalia kanogino Efesusi uvayi humaine. Ani kanoa kanaleya huno kea nehavia kanogino maineno Anumaya Koti autamafi hanea kea havilama huno havilinea kanoe. 25 Apolosia Anumayamo kea havilama hulineno aya mukiki huno kanale kavaage nehuno Yisasifena hamapaiyanagi Yonia tima falematenea yafeke havilinegi Yisasi agile ti falemate kavafena ohavine. 26 Yuta vayamogami mono nopi haino tokiyaage kea hamapaigeana Palisilaene Akuilaene haviteana avaleana vaayamogani Anumaya Koti auava yafena moli fatago huana aveli-mainae. 27 Aveliageno Apolosia Akaiya ugahe Yisasi anagaamoya aya huya Akaiya maineya Yisasi kema nehaviya veate avona kaeya mage hae “Apolosina avaletama falu fala huteho.” huya kae-malageno anile alino uvayi higeya Anumaya Koti kayone yamaaleti Yisasife haviya amakupi maleya amametiti humainaya veamogamina amaya humaine. 28 Mukia vea amaufina tokiyaage kea huno Yuta veamoya havilama ohunayafene huno Anumaya Koti autamafiti kea hapalino hamapaino “Yisasia Anumaya Kotima taugafa aligatigahe hutenea kano maine.” huno avopitila hapalino hamapaimaine.