1 Nago kanoa Ananaiyasie aamo agia Safailae ani alavelatamogania nago mopaania alu kano neamiana mone ali-mainae. 2 Aliteana Ananaiyasia kesi nagoa monea agaia alino fala-kigeno aamoa anima alia monea ago age-maine. Ananaiyasia nagoa monea alino Aposolo vaya momamine. 3 Amamianagi Pitaa agaifena mage hie “Ananaiyasigae Satania kefo kagu kagesa kamigeka kagaya ‘Mukia monea mama hane.’ huka nehanagi nagoa monea ali fala-negika Alu Aotage Avamumofena havige huka ayevataga nehane. 4 Mani mopa kagaika mopagika ‘Alu kanomo alisie.’ huka monea nealika ania huka kagaika monegi naa higeka ‘Havigea huna ayevataga hugahue.’ huka kagu kagesafinaga nehane? Vayamona ayevataga ohunanagi Anumaya Koti ayevataga humainane.” huno nehie. 5-6 Higeno Ananaiyasia ani kea haviteno ailakatino fali-maine. Faligeya neyavemoya nago kena moliya haya kiteteya aliya komufi mo hevaitenae. Hevaitetageya ani kanoma fali-mainea kea mukia veamoya haviteya tusia lagi tagiya amake-mainae. 7-8 Haenagaa talia (3) aova hanoma nehiana aamoa ani fali-mainea kea ohavino egeno Pitaa agaife mage hie “Manima hanea monea mopaletila hai ani kanoa ali-mainao?” huno higeno “Tamage ani kanoa al-imainoe.” huno humaine. 9 Higeno Pitaa mage huno hie “Naa higetana tanakaya tokaetana kea hutetana ‘Alu Aotage Avamumona ayevataga hugahue.’ hutana haane? Agego anaukamoma agoma aliya mo hevaitaya vayala eteya fiate me heti-maineya kagaienena falisanageya aliya mo hevaigategahae.” huno humaine. 10 Nehigeno aupaa ani amoa Pita aiyafi ailakatino agoya faiteno faligeya neyaveyagamoya haiya mogayana ani ala ago fali-mainegeya moliya anauamoma hevaitale mo lokaeya hevainatenae. 11 Hevainatageya Yisasina amakuama aminaya veaene mukia ani kema haviya veamoyaene tusia lagitagiya amake-maine.

12 Aposolo vayamoya mukia vea amunopi kasagoya tokiya avame yayaga hageya age-mainae. Ageteya Yisasina amakuama aminaya veamoya nagoke amaku amakesale maineya ala mono nomo haupale yasi alisia ya ayekalo humalenea nomo agia Solomoni none ani nopi mukia kanafina molitalu humai humai nehayane. 13-14 Nehageya nagoa veamoya kolima haya yafe amakaienena mo lokaeya uomainagi ani veamogami amaki alisaga humainae. Mukia veamoya Yisasi kema haviya amakupi maleya amametitia huteya amakaiene mainae. 15 Tokiya avameyama humainea yafe mukia kalima hamaeya veala amavaleya kate amateya hagifanale maineya mage hae “Pitama esiana agai amemo me halatu hamaesigeno kanale humategahie.” huya kate momatenae. 16 Amatageya mukia veamoya Yelusalemu aupatema hanea kumayagaleti kalima hamaeya veanene Satani avamumoma amakupi fale-mainea veanene amavaleya ageno mukia ago alino kanale humatene.

17-18 Mono notema hagote kava kanomoene agaienema lokaeya mainaya vayaene Satiusi vayamoyaene amaipa haviya humateteya Aposolo vayala amatafa huya amavaleya kina nopi momatenae. 19-20 Amatenageno ani kegela Anumayamo ensole kanomoa eno fita me yakino anifiti amavaleno kumatega neuno mage huno hie “Tamakaya utama ala mono nopi hetitama veamoyama haegafa huya agola maige maige hisaya hamaimula alisaya kea hamapaiho” huno humaine. 21 Higeya haviteya natekefafi hetiya uya ala mono nopi veamogamina mo hamanepaiye. Hamanepaigeno ala mono note hagote kava kanomoene agaienema lokaeya nemaiya vayaene ani kea ohaviya neataleya Kanisole vayafeene Isaleli nofi vayatamaenefe moge hageya ageno ati vayafe “Kinama humatenona vayala momavaletama eho.” huya hamapaimainae. 22-23 Me hageya ati vayala kina nopi mogayana omaigeya neataleya eteya mage mo hae “Tagaya mogonana fita tokiyaage alokileti hemaleneya vayala kava yagaiya kumate hetimainageta fita mo yakiteta kina nopima mogonana omainae.” huya me humainae. 24 Mehageya ala mono note kava vayayagaene mono note ati kava kanoene mani kea haviteya tusia amakesa havi havi huya mage hae “Hanaa huya kina nopitila fanane humainae? Hanaa humainea ya falote hugahie.” huya hae. 25 Hageno nago kanomoa mage huno me hamapaiye “Haviho kina nopima amataya vayala ala mono nopi hetiya maineya veamogamina humave-neliye.” huno me hie. 26 Me higeya mono note ati kava kanomoene ati vayaaene uya “Havigu amakai kema havimainesaya veamoya yafateti tahaesageta falisunagi.” huya amaikootiya ako huya amavaleya emainae.

27 Amavaleya ayaamoya Kanisole vaya amunopi me hetimatetageno ala mono note hagote kava kanomoa mage huno hie. 28 “Tagaya Yisasife nagoene veamogamina hamapaitama humaveotiho” huta tamakaila tamaumonola ago malonanagi tamakaya mukia Yelusalemu nemaiya veamogamina mani kea hamapaitama tagaifena ‘Ago Yisasina hae-malenaya vaya mainae.’ hutama hamapai-mainae.” huno hie. 29 Hianagi Pitaa nagoa Aposolo vayaene mage huya nehae “Ma mopafi vayamogami kemona akave omalegahunagi tagaya Anumaya Koti kemo akave malegahune. 30 Tamakaya Yisasina nagoke yafaga yosale asai-malageno fali-maineanagi Tototimo Anumaya Kotia fali-mainefiti ago ali hetitene. 31 Ali hetiteteno avalesaga huno tamaga ayatega ategeno hagote kava kanoa tagu tamema aligatimainea kanoene mainea yafe tagaya Isaleli veamogata tagua aiyahae hisuna tagesa tamisigeta tagua aiyahae hisunageno aigetateno kefo yatia atalelategahie. 32 Tagaya mani kea hisuna vaya mainonageno Alu Aotage Avamumoa ania huno mani kea humaine. Mukia Anumaya Koti kema akave malenaya veamogamina Anumaya Kotia Alu Aotage Avamula ago amamine.” huno hie. Kamalielia kanisole vayamofe mage huno hie “Aposolo vayamogamina ako hutama amateho.” huno humaine. 33 Hageyama mani kema haviya yafe amaipa amakata aiya Aposolo vayala hamaesageya falisaya amakesa nehaviye. 34 Hamaegahayanagi nagola Falasia kanomo agia Kamalielie mono humave-nelia kanogino Yuta vayamogami Kanisolefi mainegeya mukia veamoya agima alisaga nehaya kanogino ani kanomoa hetino mage huno hie “Tahaote kea hugahunagi Aposolo vayala humategeya kumatega hati-lavisageta kea hisune.” huno hie. 35 Higeya hati-laviya vageno mage huno Kanisole vayamogamife hie “Isaleli vayanimogatama mani vayamogamina nago yama humategahunema hinutama tamakesa havilama hutetama ania hiho. 36 Nayona nago kanomo agia Teutasie evayi huno ‘Nagaya tokiyania hanea kano mainoe.’ huno higeya fo hataletia (400) vayamoya akavela vayanagi kamani kava vayatimoya ago hayageno faligeya akavema nevaya vayala atagufeya ute ete hageno aliyamaamoa afa ya kana humaine. 37 Agai akavelega amakima negayaya kanafina Yutasie Kalili kanomoa evayi huno kea hamapaigeya nagoa vayala akave nevageno kava vayatimoya Yutasina ago hayageno faligeya akavema nevaya vayala atagufeya ute ete humainae. 38-39 Naa humainaya yafe menia tamahapauve mani vayala amatalegeya viho. Anima nehaya kea amakaiami mopale vayamogami kema hanesigenoa afaa hano hugahianagi Anumaya Koti kema hanesigetama tamakayama ali haviyama hisaya amukotamia omalene. Havigu lamakaya Anumaya Kotina kame hutetama agaiene tu hutesagi.” huno humaine. 40 Higeya Kamalieli ke haviya “Tamage hane.” huteya Aposolo vayafe ke hageya ageya nofi kayoteti haifu amamiteya amaumono nemaleya mage hae “Yisasifena nagoene veamogamina hamaopaiho.” huya humateteya amatalageya umainae. 41 Ani Kanisole vayala amataleya neuya “Anumaya Kotia ago tamatea kava nehae.” huno tagaifena nehuno “Yisasi agima neayaya yafe tamakaye hisifa kavala hisagetama amukotamia hanegahie.” huno humainea yafe tusia muse hume hume umainae. 42 Mukia yupa ala mono nopiene veamogami nopiene mukia veamogamina Yisasifena hamapai-mainae. “Yisasina Anumaya Kotia taugafa aligatigahema hutenea kanoe.” huya hamapai-mainae.