8
Kalaisia kefo yatia alineataleno Alu Aotage Avamu tamine.
1 Yisasi Kalaisiene ailokaeta mainona veamogata Anumaya Kotia nagola kaiyekea hulateno kefo yama humainona anonaa otamigahie. 2 Kefo yama huna falisua yamo nofipi mainogeno Yisasi Kalaisia falimainea yateti haimu hanea Alu Aotage Avamumo tokiyaleti ali kalu heno natalene. 3 Kahegi kemoa “Fatago veane mainae.” huno hulatesia tokiyaa atafa tagu tagesamoa ani kahegi kea akave malesia tokiyamoa omalegeno ani kahegi kemoa tagaila alino kanale kavala hu otategahigi Anumaya Kotia nafanea hutegeno tagaya kefo veamogata mauna augafa avamete augafa kalimai kano emainegeno tagayama kefo yama humainona yateti tagata aisia yana anonatia Yisasina amigeno alino faligeno Anumaya Kotia kefo yatimo tokiyaa alitalene. 4 Alitalegeta menia tagaya atafa lagu tagesalela tahanepaiya kavala huta vainoayonagi Alu Aotage Avamumo tahapaiya kava huta vaiyatete nehuta kahegi kemo fatago auava ya huta kaana vaineayone. 5 Veamoya atafa amaku amakesalema vaiyayana amaugafa age hamaye hisaya yate amakesa havi havi huya ani katega nevayanagi nagoa veamoya Alu Aotage Avamumoa “Vaiyeho.” huno hia kate vaiyatetema hayana Alu Aotage Avamumona haiya amakesa havi havi huya mainae. 6 Veamoya atafa amaku amakesale amaugafa age hamahaye hisayana faligahagi veamoya Alu Aotage Avamumo haisia yafema amakesa havi havi hisayana amaipamoa falu higeya agola maige maige hisaya hamaimula alimainae. 7 Atafa amaku amakesale amaugafa age hamaye hisaya veamoya Anumaya Kotina kame tagiya kaeneateya Anumaya Koti kahegi kemona akave omaleya ani kea akave malesaya tokiyaamia omaletafa huno omalene.
8-9 Veamoya atafa amaku amakesa akave malesayana Anumaya Kotima haiya kavala ohaleasinagi tamakaya atafa tamaku tamakesa akave nomalagi Alu Aotage Avamumoa tamakupi maineafe agai kea akave nemalae. Nagoa veamoya Kalaisina Alu Aotage Avamuamoma amakupinaga omainesiana Kalaisi nafanea omainae. 10 Kefo yama humainayafe tamaugafamoa ago falimainegi Kalaisia tamakupi mainenageno Anumaya Kotia “Fatago veane mainae.” huno hulamateneafe tamaku tamamemoa agola maige maige huno maine. 11 Anumaya Kotia, Yisasina fali-mainefiti ali hetitenea kanomo, Avamumoa tamakai tamakupima mainesiana Yisasi Kalaisina fali-mainefiti ali hetitenea kanomoa tamakupi mainea Avamuteti manima falisaya tamaugafa ali hetilamateno tamahaimula tamamigahie.
Alu Aotage Avamumo kema akave malesunana Anumaya Koti nafane mainone.
12 Nafunaganagatama Yisasia hulatenea yafena anonaa amisuna yana hane. Atafa lagu tagesamoa kanale yana huotateneanagino agaila amisuna anonaa omaleanagita atafa lagu tagesa akave maleta taugafamoa age haye hisia kavala ohisune. 13 Aao atafa lamaku tamakesalema vaiyesayana faligahagi Alu Aotage Avamumo tokiyaleti tamaugafa age haye hisia yama hae falisayana agola maige maige hisaya tamahaimuene maigahae. 14 Anumaya Koti Avamumo kema akave maleya vaiyayana Anumaya Koti nafaneyaga mainae. 15 Alu Aotage Avamumoa etetama koli hisaya nofipina hulamatesiafe tamakupina omenegi tamakaila “Anumaya Koti nafaneyaga maiho.” huno hulamatesiafe tamakupi emainegetama Anumaya Kotife “Tatao, Nelafao.” hutama nehae. 16 Nehageno Alu Aotage Avamumoa agaia “Tamakaya Anumaya Koti nafane mainae.” huno lagupina tahanepaiye. 17 Tahapaigeta tagaya Anumaya Koti nafanema mainonana Nelafa yana Kalaisiene tagai yatafa hapaegahie. He Kalaisiene kana yama alisunana ania huta agaiene tokiya haleyamaaene ala agiene aligahune.
Haenagaa ikapinaga kanale no maisuna yana aligahune.
18 Nagaya nagesa havuana haenagama Anumaya Kotia tokiya hale yamaa fufu yate ali falote hinageno tavelisigeta agesuna yafe tagesa haviteta “Meni kanafima tagata aiya yama nealuna yana afa ya kana humaine.” huta hugahune. 19 Mukia Anumaya Kotima talo humalenea yana agesaga huya Anumaya Koti nafanemoya falote hisigeya agesaya yafe ageke huya agava mainae. 20 Mukia Anumaya Koti talo humalenea yana kasaliya haviya nehae. Amakaya hamaiya yateti ani kavala nohagi Anumaya Kotia “Haenagaa kanale yama falote hugahie.” huno agaia anima kasalisaya nofipina humategeya mainae. 21 Mainagi haenagaa Anumaya Kotia kasalino haviya hisia nofipima mainaya yana ali-talesigeta tagaya, Anumaya Koti anagamogatina, nofipiti tavayu hinageta ali-mainona tokiya hale yapi tagima hanea yana aligahune. 22 Tagaya ago nehavune meni kanafina mukia Anumaya Koti talo humalenea yamoya amakatama aiyana anemoya nafanema ategahe hageno inamu yama alimatea augafa kava huya hume hume haiya meni kanafina neae. 23 Neagi amakaiamigela ani kavala nohagi Anumaya Kotia tagaifena “Haenagaa mukia yama tamamigahue.” huno hagoteno Alu Aotage Avamula ago tamigeta avale-mainonanagi ania huta tagupi “Avonio.” huta kasalisia taugafa aligatisigeno haegafa taugafa falote hisigeno Anumaya Kotia agaia “Nafaneyagani mainae.” huno hulatesiafe tametitia nehuta agava mainone. 24 Anumaya Kotia tagu tamema aligati-mainea kanafina mage huno humaine “Tamaugafa aligatisuafe tamametiti hutama nagava maiho.” huno higeta agava mainone. Nagola veamoya agoma alimainaya yafena agava ohugahae. 25 Oagenona yama “Aligahune.” huta tametitilafama hisunana tamena malelava huta agava maigahune.
26 Maigahunanagi fulu fulu veane mainonafe “Naafe Anumayamotega nunamuna huta havigesune?” huta nehunanagi Alu Aotage Avamumoa “Vaeha.” huno ohavunamaa kea Anumayamotega taya huno havinege. 27 Nehigeno Anumaya Kotia veamogatina taguafima hanea yana agelama huno neageno Alu Aotage Avamumona agu agesafima hanea yaene agemaine. Ani Avamumoa Anumaya Kotima haiya yafena ago haviteno Yisasi anagala amaya hugahe nunamuna huno havinege.
28 Tagaya ago havimainone Anumaya Kotife hamau amayamopafi nehamaiya veamoya, Anumaya Kotina agaima haisia kava hisayafe ke huno agaialega amavaleno amatenea veamogamite, mukia falote hisia yana kanale yaene kana yaene Anumaya Kotia alino kanale huneamate. 29 Anumaya Kotia nayona ago amaketeno hapalimatenea veala agaia nafanemo avamete veane maisae huno amategeya mukia veala mainagi Kalaisina nafanea hagoteno ategeno “Ala nepuamimo maisiafene.” huno hutene. 30 Anima hapalimatenea veafena ke huno agaialega amateteno kefo yamaage nehaya veane mainagi Yisasi humatenea yateti “Fatago veane mainae.” huno humateteno tokiya hale yamaa amamine.
Nago yamoa Anumaya Kotima nehaiya yamaa tileoategahie.
31 Naa humaineafe tagaya naane huta hisune? Anumaya Kotia tagaima laya hisiana ta tagaila kamea hulategahie? 32 Anumaya Kotia “Nafanenia otamamigahue.” ohutafa huno ohunegi afaa lagaife huno hutegeno emaineanagino mukia yama laya hisia yaene tamigahie. 33 Anumaya Kotima hapali-malenea veanea ta kaiyekea humategahie? Anumaya Kotia agaia “Ago fatago veane mainae.” huno hulatene. 34 Hana kanomo kaiyekea hulateno “Tagata aisia yana aligahae.” huno hulategahie? Yisasi Kalaisia faliteno hetino haino Anumaya Kotina tamaga ayatega maineno taya hisia yafena Nefatega ke huno nunamupiti havinegeafe nago kanomoa kaiyekea hulateno ali haviyana huotategahie. 35 Kalaisia tagaifena tusiya huno hau ayamopafi nehaiya yamaa ta tahafalegahie? Tagaya kana yapi maisunano tusi lagata aisia yapino, veamoya havi kavama hulatesaya yapino, kafu kana falote hisigeno tagatesia yapino, mukia yatima omalesia yapino, nagoa havi kavamo tagaila alino haviya hisia yapino, tahaesageta falisuna yama falote hisia yapino? Ani yayaga hau ayamopafi nehaiya yana alino tahaofalegahianagino Kalaisia tagaifema hau ayamopafi nehaiya yamaamoa hanege hanege huno hanegahie. 36 Anima havi yayagama falote hisia yafena Anumaya Koti autamafina mage huya kae-malenayane
“Kagai nafaneyaga mainonafe mukia yagefina tagaila tahaeya fali hano nehae. Tagaya sipi sipi afu kana huta mainonageya tagaifena ‘Hamaesuna veane mainae.’ huya nehae.” huya kae-malenayane.
37 Mukia mani havi yayagahema “Aoteyamaae.” huta hisune. Kalaisia tagaifema hau ayamopafi haumainea kanomo tokiyaleti mukia ani yayaga amakaseta mainone. 38 Nagaya ani yafena havilama huna nagupi malenoe. Anumaya Kotia tagaifena hau ayamopafi nehaiya yana nago yamoa tahaofalegahie. Falisunano, mainesunano, ensole vayalo, Satani Avamulo, menima hanea yano, haenagama falote hisia yano Anumaya Kotia tagaifema hau ayamopafi nehaiya yana tahaofaletafa hugahae. 39 Ikate yano mopamona afete hanea yano nagoa mukia Anumaya Koti talo humalenea yano Anumaya Kotina hau ayamopafima nehaiya yamaa tahaofaletafa hugahae. Anumayatimoa Yisasi Kalaisi hulatenea yateti agaiene ailokaeta mainonafe Anumaya Kotia lagaifena hau ayamopafi agola hauge hauge huno nehaiye.