11
Tole kanolatamo-gania Anumayamo kea huhaleana hu-mainae.
1 Nago kanomoa malena agege gege hisua ayopa kana kayona namiteno mage hie “Kagaya hetika Anumaya Koti mono noene kae salamana nehaya folamoleene mo maleka agege gege huka hapalika ago. Ani nopina Anumaya Koti agima alisaga nehaya veala hapalika ago. 2 Hapaligananagi malagama hanea mopa maleka agege gege huka ohapalio. Ani kaiyaga Anumaya Koti kema nohavisaya veamogami amamineanagiya tagufa (3) kafuene sikisia (6) ikaene ani veamoya Anumaya Koti kumala alu aotage kuma meli haviya hugahae. 3 Nehisagena nagaya tolea nagai kema huhaleana hisaa kanolatana tokiyania anamisugeana kayavo kena fai-lineana tagufa (3) kafuene sikisia (6) ikaene nagai kea huhaleana hugae.” huno hie.
4 Ani lole kanolatana ma mopafi kava humainea Anumayamo aule heti-mainaana tole olivi yosa kana huteana tole kani kana humainae. 5 Nagoa veamoya ani kanolatana ali haviya hugahema hisagenoa ani kanolatamogani anavayafitila atamo aikalu huno kame veaania temasagalisigeya faligahae. E, anakaima ali haviya hunatesaya veamoya faligahae. 6 Ani lole kanolatamo-gania tokiyaanileti “Kola oaiyo.” huana hisaageno kema huhaleana hisaa kanafina kola oaigahie. Tifema “Kolamaage huo.” huana hisaagenoa ania hugahie. Anakesama havisaa kanafina “Tusia kana yaene kaliene falote huo.” huana hisaagenoa ma mopafi veala nagoene nagoene huana hamaegae.
7 Hamaegaanagi Anumaya Kotima anaminea kea hu hano hutesaageno kefo afai afumoa ayola omaleno afepinaga tavi-mainea komufinagati ehaino me hanaesigeana faligae. 8 Falisaageno anaugafamoa ala kumamo katema, Anumayaanimona Yisasina yafaga yosalema haeya asai-malenaya kumamo, yegegate malegahae. Avame kefima hu-maleya nehaya ala kumamo agia Sotomuene Isipienene huya nehae. 9 Falisaa anaugafa yegegate tagufa (3) kanaene ani kanamo yagemoa amunote enevigeya nagoa veanea alu kote kote veanene, alu make lu make neaiya veanene, alu maugafa lu maugafa kalimai veaneyagaene, ani kanolatamo-gani anaugafa ageme-geme vayanagi nagoa veamoya aliya hevainategahe hayanagi ani veamoya “Aao.” huya hageya aliya hevai oanatenae. 10 Hevai oanatenagi ani kanolatamogania mukia kotega veama tusiya huana ali haviyama hu neamataa kanolatama falia yafenagiya tusiya huya musena nehuya muse yana amafaluamimo-gamina momami memami hugahae. 11 Hugahagi tagufa (3) kanaene ani kanamo yagemoa amunote evia kanamoa hano hutegeno Anumaya Kotia ani kanolatamo-gani anaugafafi hanaimula huvainategeana ani kanolatana eteana hetiageya mukia veamoya ani yana agageno amamayoa aigeya kolia humainae. 12 Koli nehuya haviyana ikapinagati ala kegefafiti ani kanolatafena mage huno hie “Tanakaya ehaitana eo.” huno higeya kame veaanimoya age-mainageana siapi hai-faleana ikapinaga hai-mainae. 13 Hai-mainaa anayufina tusia imila aliteno ani ala kumakefa teniafi (10) ali fako hu-malageno anifiti ani imimoa nago kaiyaga ali haviya higeno seveni tausenia veane (7,000) hamaegeya fali hano humaine. Naa hu-mainayafe ofaliyama afaa mainaya veamoya tusia koli huteya ikapinagama mainea Anumaya Koti agia alisaga humainae.
14 Tole kana yana ago hano hianagi avonio nagoke kana yana aupa kanafi falote hugahe higena nahau hu nelamatoe.
Seveni (7) molia ensole kanomoa ufena humaine.
15 Anile seveni (7) molia ensole kanomoa agaia ufena higena havugeno ikapinagati nagoa veamoya ala kegefafiti mage huya humainae “Anumaya Kotiene taugafama aligatisiafene huno hutenea kanoene ma mopafi kava veamogamina ago amakasaageya anaiyafinaga mainayanagino Anumaya Kotia agola maige maige huno kava yagaigahie.” huya humainae. 16 Anile Anumaya Koti aule hanea sialema mainaya vayala tueti foa (24) kava vayamoya mopafi asaga hu-laviya amakoya ye-maineya Anumaya Koti agia alisaga huya mage hae
17 “Vae Anumaya Kotigae tusia tokiyakaa haneanagika nayona mainananagika menia mainananagika tusia tokiyakaleti aepa heka mukia yatela kava neyagaina yafe tagaya kagaifena tusia musekaa nehune. 18 Kagai kema nohavia veamoya kagaifena amaipa kafa henegatayafe kagaya kaipa kafa hemateka mukia fali-mainaya veanema kaiyeke humateka kefo yaamimo anonaamia amamisana kanamoa ago falote humaine. Ani kanafina kagai kema haviya amakupi malenaya veanene kagai amaune veanene mukia kagai kagima alisaga huya kaiyafinagama nemaiya veanene ala amakima hanea veanene osi amakima hanea veanene kanale anona yaamia amamigane. Amamiteka nagoa veamoya ma mopafi veamogamima ali haviya huneamataya veamogamina kefo yaamimo anonaamia kagaya ali haviya humategane.” huya humainae.
19 Hageno Anumaya Koti nona ikapinaga hanea mono nona yaki-talageno Anumaya Kotima alino hagelafimatenea kema hanea pokisia ani mono nopina fufu yate hanegeya neagageno anile ala agegefa neaigeno monagemoa tusiya nehigeno imila nealigeno komopamoa talagufe-lavino aimaine.