1 Yisasia ani kumala ataleno viaamo ko aepaalega vigeya agaiaenema tokaeya nemaiya anagamoya akave umainae. 2 Sapati yupa mono noamifi haino Anumaya Koti kea mukia vayala hamapaigeya haviteya amamayo aigeya mage huya hae “Mukia havi haviyana hanateti alia kea nehie? Ayapitila tokiyaage avame yama humainea tokiyaa hanateti alimaine? 3 Mani kanoa no negia aliyate kano maineanagi Malia nafane mainegi Yemesiene Yoseseene Yutasiene Saimonienena aganaamoya mainagi asaamoya tagaiene nagopi mainae.” huya huteya amaipa kafa heteya amakaveno hutenae. 4 Amakaveno hutayanagi Yisasia mage huno hie “Anumaya Koti kema nehia kanomoa mukia kumate mono huhaleno hamapaisiana agia alisaga nehagi kumaale maisiana agaia afamoene no kumaale vayaenena agia alisaga ohugahae.” huno humaine. 5 Mani kumatela ala tokiya avame yana ohunegi afaa nagoke nagoke kali vayake aya malegeno kanale humatene. 6 Kanale humatenegi afaa mukia veala agaife haviya amakupi maleya amametiti ohaya yafe Yisasia amayo aigeno alu kumate kumatela vaiyeno monola hamapaino humaveli maine.

7 Yisasia tuelufua (12) anagaamogamife ke higeya ageno mukia Kefo Avamuma veamogami amakupiti amanatitalesaya tokiya amamiteno mage hie “Tole ali lokaete lokaete hutama viho.” huno humatene. 8 Huneamateno mage huno hie “Kama visayana ayopatamige alilitama viho. Kutamiene mayaene monetamiene alitama oviho. 9 Tamaiya nona vaigahayanaki tole siota vaioaliho.” 10 Nagoene mage huno hie “Nago nopima haifalenutamahena ani nopi faetama maitama hutetama amataletama alu kumatela viho. Faelitetama ohiho. 11 Nagoa kumatema visageya veamoya ali falu falama huotamateya ‘Tamakai kema ohavigahune.’ huya hisagetama ani kumala neataletama ‘Havi kava hae.’ hutama hisaya yafe tamaiyafima hanesia kugukege mopa aihehe huneataletama viho.” huno hamapaiye. 12 Hamapaigeya ani vayala neuya mukia veanehe mage huya hae “Kefo yatamihena havitama tamakaye nehinagetama tamakua aiyahae hiho.” huya hamapaiye. 13 Hamapaiya mukia Kefo Avamula veamogami amakupitila amanati neataleya kasagoya kali veala amaugafale masavena falematageno kanale humatene.

14 Ani kanafina Yisasi avagemoa ala higeno nagola sauve kanomo agia Helotie anima haya kea havimaine. Nagoa veamoya Yisasifena mage huya hae “Ma kanoa tima falematea Yonie falimainefiti hetimaine. Hetimaineafe tokiyaa hanegeno ma tokiya aliyana nealie.” huya hae. 15 Hageya nagoa veamoya Yisasifena mage huya hae “Ma kanoa Ilaiya maine.” huya hageya nagoa veamoya “Aune kanoa nayo amaune vaya kana nehie.” huya hae. 16 Hageno Helotia haviteno mage huno hie “Yonina haeho huna hugeya ageya hataga hutalenaya kanoa faliteno komufiti hetimaine.” huno hie.

17-18 Helotina aganaamo agia Filipie. Filipi amo agia Helotiasie. Helotia Helotiasina kumai a alitenea yafe Yonia Helotife mage huno hie “Anumaya Koti kea atagaeka kaganakamo aala kumai a alitenane.” huno hia yafe Helotia vayala humategeya Yonina motafa huya avaleya kina nopi hutenayane. 19-20 Hutenageno Helotiasia Yonifena tusi hai vaiteteno haesageno falisia agesa havino maiyanagi Helotia agesa mage huno havimaine “Yonia kefo yana ohuno fatago kanoa alu aotage kano maine.” huno havilinea yafe Yonifena koli huno “Ohaegahae.” huno aunevaino agai kea haviteno agesa kumo nehuno tole agesa havino afaa muse huno kea nehaviane.

21 Nago yupa Helotina atenea kanamoa falote higeno Helotia ala imu kimaleteno mukia kamani kava vayaene ati kava vayaene Kalili kotegama afenomaa kasago humainea vayayagaene ke higeya imulega emainae. 22 Emainageno Helotiasina munaamoa eno amoneayegeno Helotiene vayaamoyaene neageya tusia musemaa hageno Helotia ani munamofena mage huno hie “Kahaisia yafena afaa hisanagena kamigahue. 23 Anumaya Koti aulagafi kahanepauve nagoa yafema nahavigesanana afaa kamigahue. Mone fenoenefema nehuka mopaenefema hisanana afaa nagai yayaga haneanagina amunopiti ali fako huna kamigahue.” huno humaine.

24 Higeno ani munamoa viaamo itaamofena mage huno havige “Na kanohe ke huna havigesue?” huno higeno itaamoa mage huno hie “Yonia ti falemate kanomo ageya fakaliteka anumaa aifakalika me namio huka hapaiyo.” huno hie. 25 Higeno aiyayeno ala sauve kanomotega viaamo mage huno hapaiye “Aupaa ti falemate Yonina ageya fakaliteka anumaa yopafi maleka me namio.” huno hie. 26 Higeno ala sauve kanomoa haviteno aipamoa tusia kanaage higeno Anumaya Koti aulagafima huno lokiya vaimalea yafeene maiya vayafeene agesa haviteno mage huno hie “Ani munamo kea he falaokigahue.” huno hie. 27 Higeno aupa kanoa nago ati kanoa huteno mage huno hapaiye “Yonina ageya mo fakalika anumaa alika eno.” huno higeno kina nopi viaamo Yoni ageya mo fakalitalene. 28 Fakaliteno anumaa yopafi maleno alino eaamo ani munamona memigeno itaamona alino amine.

29 Amigeya Yonienema tokaeya nemaiya anagamoya ani kea haviteya uya augafaa moliya yafakapi mo hevaitenae.

30 Aposolo vayala Yisasitega eteya mukia humainaya kavaene humaveliya kene eya me hapaimainae. 31 Me hanepaigeya mukia veamoya agaitega neuya neeya maiya hageno Yisasienema tokaeya nemaiya anagamoya kaveamima nesaya kanaamia omalea yafe Yisasia mage huno hie “Egeta tagaitige kame kotega umaifalu hamano.” huno hie. 32 Higeya amakaiamige tipi kalefi haisaga humaiya kame kotega ugahe umainae.

33 Vageya mukia veamoya amaketeya amaugosafina ago agemainaya vayalegiya kumaamileti mopafi amaiya yeya uhagoteya ani kame kotega uvayi humainae. 34 Uvayi hageno Yisasia tipi kalefiti asaga hulavino ageana mukia veanea elitalu humaiya veala amaketeno agesa mage huno havie “Ma veanea sipi sipi kana huya mainayanagi kava yagaisaya vayala omainae.” huno agesama havia yafe kalagi aimateno alu ke alu kea hamapaiye. 35-36 Hamanepaigeno yagemoa tavi falegahe higeya agaiaenema tokaeya nemaiya anagamoya agaite eya mage huya hae “Ma kumala vaya omai kuma hanegeno yagemoa tavi falegahe nehiafe ma veala humatesanageya uya nagoa veamogami hoyafitiene notegatiene nesaya kaveamia mo miya hisae.” huya hae. 37 Hageno Yisasia mage huno hamapaiye “Tamakaya tamakaitami nesaya kavela amamiho.” huno higeya agaifena mage huya hae “Nago kanomoa tu hataletia (200) kanafi aliya aliteno ani moneleti kosa hesia maya miya ohileasine. Tagaya ani moneleti mo miya hulita ani maya memamisune hunageka nehano?” huya hae. 38 Hageno Yisasia mage huno hie “Mogeho namagi maya hane?” huno higeya uya mogayana higeya “Faefua (5) mayagi tole noyamegi huno hane.” huya hae.

39 Hageno Yisasia mage hie “Mukiamogatama alitalu hute hute hutama kanale apepate mopale maiho.” huno hie. 40 Higeya fifitia (50) veala nagopi alitalu huya maigeya vani hataletia (100) veala nagopi alitalu huya mainae. 41 Yisasia faefua (5) mayaene tole noyamene aliteno anafinaga agesaga huno neageno Anumaya Kotitega ani kavefe huno muse huteno maya kofa huno agaiaenema tokaeya nemaiya anagala amamigeya aliya fako hutele huya veala neamamigeno tole noyamene kolino mukia veama nesayafe amamine. 42 Amamigeya mukiamoya neya amamu hae. 43 Amamu higeya atalaya mayaene noyamene atupatapaa alitalu huya kupi aiteya tuelufua (12) kupi aigeno havatemaine. 44 Ani kavema nemainaya vayala faefu tausenia (5,000) vemoya nemainae.

45 Aupaa Yisasia agaiaenema tokaeya nemaiya anagafe mage huno hie “Tamakaya nagaila nenataletama hagotetama tipi kalefina haisaga humaitama atu kaiyaga Petesaita kumatega utegena nagaya veala humatesugeya viho.” huno hie. 46 Viho humategeya utageno Yisasia Anumayamotega ke huno havigegahe agoyafi haimaine. 47 Haino mainegeno hanikigeno tipi kalemoa tikotumona amunopi utegeno Yisasia agaiage ti agegayale maine. 48 Maineno ageana amaulegati yasimoa eaamo tipi kalemona meyetu fegeteana ovigeno Yisasia ageteno kotigahe hia avametega ti kotumona agupile viaamo amakaitela momakasegahe hie. 49 Amakasegahe ti agupile vianagi eneegeya ageteya amakesa mage huya haviye “Hakalo neefi?” nehuya “Avovo.” hae 50 Avovo huya tusia koli huteya atali talu hayanagi aupaa amakaifena mage huno hie “Kolia ohutama maiho. Nagaya neogi tokiya vaitama maiho.” huno hie. 51 Huteno tipi kalefi haino amakaiene nemaiyana yasimoa taga higeya ani vayamoya tusia amamayoge humainae. 52 Yisasia tokiyaaleti kavema amaminea yafena amakuamoa hayagino atalako higeya aepaa havilama ohunae.

53 Ti kotuna takaeya Kenesale kotega uvayi huteya hatilaviyama vayana tipi kalea nofiteti ayetenae. 54 Tipi kalefiti hatilavino nevigeya aupaa veamoya Yisasina augosafina agemainae. 55 Ageteya note note amaiyayeya ute ete huya kali veala hagifanale amavaleya “Yisasia ma kumate maine.” huya haya kea haviteya agaite amavaleya etele humainae. 56 Yisasia vilega osi kumatelo ala kumatelo talapinagao kali veala amavaleya kuma amunopi momateneya Yisasifena mage huya havigae “Kanale kenakamo atupalela avate hisuno?” huya hateya avate humainaya veala kalimoa kanale humatene.