1 Yisasia ala mono nona neataleno vigeya agaiaenema tokaeya nemaiya anagamoya ayaamoya ala mono noyaga ave-liye. 2 Ave-ligeno Yisasia mage huno hie “Tamakaya mukia ma noyaga neagao? Tamage huna tamaha-nepauve ani nomo yafayaga mukia alino lagape ai-talesigeno aposi-lavigeno nago yafamoa nago yafamo agupifina ai-kalo huno omaigahie.” huno hie.

3 Yisasia Olivi yosa hanea agoyamo agegayalega haino mopale mainegeya agaiaenema tokaeya nemaiya anagala amakaiamige mage huya me hae “Na kanafi ani yamoa falote hugahie? Hana augafa tokiya avame yamo esana kanaene ma mopama hano hisia kanaene falotema hisia yana taveligahie?” huya havigae

4 Hageno Yisasia mage huno hie Nagoa veamoya havigema tamaha-paisagetama ohavisaya yafe kaye ho. 5 Kasagoya vayamoya nagai nagi ayeya nagoke nagokemoya “Tamaugafa ali-gatisua yafe Anumaya Kotia hu-na-tegena neue.” huya hisageya kasagoya veamoya amakai kea haviteya amakave malegahae. 6 Malegahagi “Nagoa kotega kame nehae. Nagoa kotega tu hugahe nehae.” huya tamaha-paisagetamahena kolia ohiho. Ani yayagamoa hagoteno falote hugahianagi ma mopama hano hisia kanamoa aupaa huno falote ohugahie. 7 Nagoa vayamoya alu vayaenena kamea hugahae. Ala kotega vayaene nago ala kotega vayaene kamea hugahae. Kasagoya alu kote kotega tusia kafu nehuya amakatesia kanaene falote hisigeno tusia imila aligahie. 8 Ani yayagamoa afaa anemoya nafanema ategahe hageno aepa heno agatama neaiya avamete kava hugahianagi haenagaa tusia tamakata aisia yana falote hugahie.

9 Tamakaya nakavema neaya yafe tamatafa huya ali haviya hu-lama-teteya tama-haesagetama faligahae. Nagima neayaya yateti kasagoya vayamoya amaipa kafa he-lama-tegahae. 10 Amaipa kafa he-lama-tesaya yateti kasagoya veamoya nagaifena haviya amakupi maleya amametitima nehaya yana ataleya nagoa veala amakesi huya amaipa kafa he-lama-tegahae. 11 Kasagoya havige amaune vayamoya havige hisageya kasagoya veamoya amakai kea haviteya amakave malegahae. 12 Kefo yama nehaya yamoma ala hisigeno nagoa veamoya nagoamimogamifema hamau amayamopafi nehamaiya yamoa osi hugahie. 13 Osi hugahigi nagoa veamoya nagai kema atafa huya tokiyaage hume humema visagenahena nagaya etenama esua kanafina nagai kema atafa hu-linesaya veamogamina Anumaya Kotia amaku amamena ali-gatigahie. 14 Anumaya Kotima kava yagai-mainea yafe kanale mono kea mukia ma mopafi veamogamina hama-paisageya havitesageno ma mopamoa hano hugahie.

15 Yisasia mage huno hie nayoma mainea aune kanoa Tanioloa tusi havi yana, ma mopa alino hagagitalesia yamoa tamayo aisia kava falote hisia yafe taha-pai-maine. Anima hu-mainea kema hapalitama havisamogatama havilama hiho. Ani yamoa alu aotage yapi he-ti-mainesigetama agegahae. 16 Agenutamahena Yutia mainesaya veamogatama tamaiyayetama agoyalega faletama viho. 17 Nagoa veamoya nogatofule haiya mainesaletila afenoyaamima alisaya yafena eteya nopinaga ohaiho. 18 Nagoa veamoya hoyafinaga mainesaletila eteya kenaamima alisaya yafena notega oviho. 19 Avonio ani kanafina amaipaene anene nute ani-linesaya nafanemogami itaamimoyaenefena tusia nahau nehie. 20 Nehigi nunamuna mage hutama havigeho “Tani koma tisia ikateene Sapati yupaenena ani yamoa falote ohinageta faleta ovisune.” hutama havigeho.

21 Ani kanafina tusia kana yamo falote hugahie. Ehema Anumaya Kotia ma mopama taloma hu-malenea kanaletiene meni kanafiene ani avamete ala kana yamoa falote ohuneane. Falote ohuneanagi tusia kana yamo ala hutesigeno haenagaa ania huno falote ohugahie. 22 Anumaya Kotia ani havi kanama alino aupa hu-malene. Aniama ohileasina mukia veamoya falileasinagi. Anumaya Kotia haigenoma hapali-ma-tenea veafe agesa havino amaugafama ali-gatisia yafe ani kanaa alino aupa hugahie.

23 Ani kanafina nagoa veamoya mage huya hugahae “Anumaya Kotima taugafa aligatigahie huno hutenea kanoa ma mainegi ageho. Atu mainegi ageho.” huyama hisagetamahena “Tamage nehae.” hutama tamametitia ohiho. 24 Ani kanafina nagoa havigeage amaune vayaene “Nagaya Anumaya Kotia tamaugafa aligatigahie huno hu-na-tenea kano mainoe.” huya havigema hisaya vayaenena evayi huya veamogamina aye-mavataga hugahe tokiyaage avame yana hugahayanagi Anumaya Kotia haye higeno hapali-ma-tenea veamoya ani kea ohavigahae. 25 Tamage ani yana falote ohunaya kanafi mani kea ago tamaha-paugi haviho.

26 Nagoa veamoya “Ani kanoa kame kotega maine.” huya hisagetamahena oviho. “Nopinaga maine.” huyama hisagetamahena ani kea havitama tamametitia ohiho. 27 Ikapinagati emainoa kanoa vayamo natenea nafanemona etena esua yamoa maa hugahie yagema vayi nehilegati aulumaya kotino aupaa mukia kotega ai-vasa nehia avamete huna nagaya etena egahue.

28 Afuma fali-mainea kefafima hakikimoya yage yage huya alitaluma nehaya avamete huna ikapinagati emainoa kanomona mukia veamogami amunopi egahue.

29 Ani havi kanamoma hano hisigenoa yagemoa hani-kinageno ikamoa ai-vasa ohugahie. Kanefimoa ikatetila atafai-lavigahie. Ikatema hanea yamoa alu kate kate huno vaiyegahie. 30 Ani yayagamoa hano hutesigena ikapinagati emainoa kanoa vayamo natenea nafanemona esua alekana yana ikate falote hisigeya mukia ma mopafima mainaya veamoya hamau huya avi-tegahae. Ikapinagati emainoa kanoa vayamo natenea nafanemona ikapinagati siate elavisugeya nagegahae. Tusia tokiya yaniaene tusia hale yaniaene esugetama nagegahae. 31 Nagetesagena ensole vayania hu-ma-tesugeya ala ufe kemo nehinageya yagemoma tavi nefalelegatiene evayi nehilegatiene aluga aluga haupalegatiene mukia ma mopafi nagainia nahaye higena hapali-ma-tenoa veanea amavalesageya aluga aluga ma mopamona atupaleti melitalu hugahae.

32 Yisasia nagoene mage huno hie fiki yosamoa nago avame yana tamave-ligahigi ageho. Ani yosamoa hagoteno akopapiti agusasima ayeno amumalesigetamahena “Anuna nevalea kanamoa ago falote hugahie.” hutama nehae. 33 Naa hugahianagi manima tamaha-nepauva kuguva yama agenutamahena “Yisasia esia kanamoa ago aupa higeno fiate hetino maineanagino ago egahie.” hutama tamakesa havigahae. 34 Nagaya tamage huna tamaha-nepauve meni kanafima mainaya veanea ofalinesageno ani yamoa falote hugahie. 35 Ikaene ma mopaene fanane hugahianagi nagai kemoa fanane ohugahie.

36 Manima tamaha-nepauva kanama falote hisia kanahena nago kanomoa ohavine. Ikapinaga mainaya ensole vayamoyaenena ohavinae. Anumaya Kotina nafaneamonaenena ani kanama falote hisia kanahena ohavinoe. Ohavinogi Nenafaa agaiage haviline. 37 Nagaya ikapinagati emainoa kanoa vayamo natenea nafanemona etena esua kanafima mainesaya veamoya nayoma Noama mainea kanafima mainaya veamoya hu-mainaya avamete kava hugahae. 38-39 Timoa yaufa hookinea kanafima mainaya veamoya kavela neneya tina neneya nehuya anema aliyamoene vele uyamoene mukia kanafina ani yafekeya amakesa havi havi huya mainageno Noaa ala tipi kalefi haisaga hu-maigeno tusia lina hogino mukia ani veanea alino haviya higeya agola fali hano hu-mainayane. Nagaya ikapinagati emainoa kanoa vayamo natenea kanomona etena esua kanafima mainesaya veamoya nayona Noama mainea kanafima mainaya veamoya hu-mainaya avamete kavala hugahae. 40 Tamage tamaha-nepauve nagayama etena esua kanalema tole vekalatana nagola hoyafima aliya nealisaagenofena Anumaya Kotia nagoke neavaleno nagola alita-ye-talegahie. 41 Tole atalama tokaeana aliya nealisaagenofena Anumaya Kotia nagoke neavaleno nagola alita-ye-talegahie. 42 Anumayatamimoa evayima hisia kanahena ohavinagi tamakesa havige havige hutama kava yagaitama maiho. 43 Tamage huna tamaha-nepauve nomona nefaa musufa kanomoa nomaafima ehai-falesiana kegela na kanalelo huno agoma havimainesiana yagaino mainageno musufa kanomoa nomaafina ehaino ofalegahie. 44 Tamakaienena talo tala hutama maiho. “Menia omegahie.” hutama hisaya kana kanoale ikapinagati emainoa kanoa vayamo natenea nafanemona egahue.

45 Anumayamoa mage huno hie aliya kanoa kanale agu agesa hanea kanoa aliyamaale agegeno alige aligema nehia kanoa tamakaipina hanate maine? Naama nehisia kanomofena kava kanomoa mage huno hugahie “Mukia aliya veatela yagai-maineka kavela fako huka mukia kanafina amamite amamite huo.” huno hugahie. 46 Hugahianagi haenagama ani ala kanomoa eteno esiana hapai-mainea augafa kavama nehinunofena ani aliya kanomoa muse hugahie. 47 Tamage huna tamaha-nepauve naama nehisia aliya kanomofena kava kanomoa mage hugahie “Mukia yania kava yagaiyo.” huno hugahie. 48-49 Hugahianagi ani aliya kanomoa kefo yama nehisia kanoma mainenunofena agaia agesa mage hunoma havisiana “Kava kanonia menia hivi huno omegahie.” huno nehuno agaia yagai-mainesia venenegi munanegi nehamaeno ala kanomo kaveene havilienena neneno aneginagi hugahie. 50 Ani kavala maino nehisiana “Omegahie.” huno hisia yupamo kana kanoale ani kava kanoa egahie. 51 Enunofena ani havi kavama maino nehisia kanomona kayo kevea amiteno alino haviya hu-teteno mage hugahie “Vagala vayaene amakupi haviya omaleya amegati nehaviya vayaene maiyo.” huno hu-tesigeno visiaamo anilega avia mo neateno ave kemoa tusiya hugahie.