1 Ani kava higeya ohavunamaa veamoya alitalu humainaya yapina nagoa veamogami amaiya aye latapemo huya mainageno Yisasia agaienema tokaeya nemaiya anagaamogamife nagoa veanenefe mage huno hie “Falasia vayamoya amakupima hanea yana agelama ohuya amavayaleti havigema nehaya yafena kayeho. Ani yana kai hamemoma halegia kava huno halegino alakefa hugahie. Tamakaya ani yafena kayeho. 2 Aiso humainea yamona Anumaya Kotia mukia alino fufute atalegahie. Falaki-mainesia yamona Anumaya Kotia mukia veamogami amaulagafi ali falote hugahie. 3 Hanipinaga hu-mainesaya kea veamoya yagefi havigahae. Notamifinaga sumi sumi hutama hu-mainesaya kea kuma amunopiti ala kefiti keha keha huya hugahae.”

4 Nenafugatama tamahanepauve amega tamaugafaage hefalisaya veafena kolia ohiho. Ani veamoya tamaku tamameene tamahae falisaya himamuamia omalene. 5 “Hana kanomofe kolia hisune?” hutama hayanagina tamahapaigahue. Hefalitenoma hanimo aguafi ata tegelege nehia yapi tamaku tamamema hagayu hulama-talesia tokiyaama hanea kanoa, Anumaya Kotifeke tusiya hutama kolia hiho huna tamahanepaugi Anumaya Kotifeke kolia hiho. 6-7 “Faefua (5) osi osi namayaga tole haesa moneleti miya nehayanagi Anumaya Kotia ani nama nagokefena agelaokanino amakaifena agesa havi havi huno mainegi tamakaitamifiti nagokemoga mukia namayaga agasetama mainayanageya veanea ala yaga mainae. Anumaya Kotia mukia hanea tamayolagefa ago hapalino haviline. Kolima hisaya yana neataletama afaa maiho. huno hie.”

8 Tamahanepauve nago kanomoma veamogami amaulagafi nagaifema “Yisasina nagua amitafa humainoe.” huno hu falote hisigena nagaya ikapinagati emainoa kanoa vayamo natenea kanomona Anumaya Koti ensole anagamogami amaulagafina agaifena “Nagai nafane maine.” huna hu falote hugahue. 9 Hu falote hugahugi nago kanomoma veamogami amaulagafi nagaifema “Nagua amitafa nohue.” hunoma hufalote hisigena nagaya Anumaya Koti ensole anagamogami amaulagafina ani kanohena “Oagenoa kano maine.” huna hugahue.

10 Nagoa veamoya ikapinagati emainoa kanoa vayamo natenea kanomonihema hu-haviya hunatesayana Anumaya Kotia aigeamateno ani kefo yaamia atalemategahigi veamoya Alu Aotage Avamumofema hu-haviya hutesayana Anumaya Kotia aipa haviya huno aigeamateno ani kefo yaamia ataleoamategahie. 11 Nagai kema huhaletama hisaya yafena kaiyeke hulamategahae. Tamavaleya mono nopi ala kaiyeke hulamate vayate visagetama kolia hutama “Kenonaamia naane ke hisune?” hutama tamakesa kumoa ohiho. 12 Ani yupa kanoa Alu Aotage Avamumoa “Mage hiho.” huno tamahapainagetama hugahae.

13 Anima alitalu hu-mainaya veapiti nago kanomoa Yisasina mage huno havige “Humavenelina kanomogae nepunimona hapaigeno nelaafama ataleno fali-mainea afenopiti fako huno nagoa namisie.” huno havinege. 14 Havigegeno kenonaa Yisasia mage huno hapaiye “Nagaya kaiyekea huna fako hisua kanoa omainoe.” huno hapaiye. 15 Hapaiteno Yisasia amakaifena mage huno hie “Tamakaya maihao hutama maiho. Alu kanomo yafena agetama tamahayea ohiho. Nago kanomoa kasagoya afenomaa haneanagi ani afenomaamoa kanaleya huno maisia haimula oamigahie.”

16 Nago avame kea mage huno hamapaiye “Tusia afenomaa hanea kanomona hoyaafina tusiya huno alaga aye-maine. 17 Aye-mainegeno agesafinaga mage huno havimaine ‘Na ya hisue? Kavenia alina halaya hisua nona omaleanagina hanaa hisue?’ 18 Maa hisue. Yu noyagania tagape aitaletena ala noyaga kasagoya kigahue. Kitena mukia kaveniaene afenoyaniaene anifi halaya hu-malegahue. 19 Hu-maletena nagainihena mage huna hugahue ‘Nagu nagesamoga mukia kafua nesua kaveene afenoyaniaene ago halaya hu-malenogi menia nagaya maifalu huna mainena kaveniene tiniaene nege nege nehuna muse huna maigahue.’ huno humaine.

20 Hianagi Anumaya Kotia agaifena mage huno humaine ‘Ani kava hana kavala aifonafo kano kana kano mainananagika meni kegela kahaimula kahafalesugeka faligane. Falitesanageya talo tala humalenana afenoyagakaa taya aligahae?’ huno humaine. 21 Huteno Yisasia mage huno hie nagoa veamoya amakaiami amaugafa aliya haisaya yafe mone afenoamia halaya nehayanagi Anumaya Kotia musema hisia kavala aliya halaya nohayafe ani kanomoma humainea kava kana veane mainae.” huno humaine.

22 Tuelufua (12) anagaamogamife mage huno hamapaiye “Ani yafena nagaya tamahanepauve kanale hutama maisaya yaene kave nesaya yaene ti nesaya yaene tamakesa havi havi ohiho. Tamaugafale kena failisaya yafeene tamakesa havi havi ohiho. 23 Kave neyana aifa letale yanagi kahaimuna kanaleya huka maisana yana kanale ya hane. Kena failisana yana amegale yanagi veanea tokiya ya mainae. 24 Hakiki namayaga ageho. Amakaya avina yana ofaiya kavela hoyafinagatila noaliye. Kave malesaya noamiene yu noamiene omaleneanagi Anumaya Kotia kavela afaa neamamie. Tamakaya namayaga amakase-mainaya veane mainayafe tamakaiene kava yagailamategahie. 25 Tamakaitamifitila nago kanomoa ‘Ofalina nagoene maime maime haigahue.’ huno tokiyaage agesa havisiana anima havia katela hanaa huno falote hugahie? Aao falote ohugahie 26 Ohugahigi ani osi ya kanoa ohaleasine naa higetama nagoa maisaya yafena tamakesa havime havime nehaiye?

27 Ageho talapinaga hanea vilasiyamoya haiya ausea nehae. Aliyana aliya kenaamia talo huya fainoaligi kanale kenaami hanegena nagaya tamahanepauve nayoma mainea ala sauve kanotamia Solomonia kanale kenaa failianagi ma vilasiyamoya kanaleya huya agase-mainae. 28 Tala yana meni kanafina hoyafina haneanagi ega hataga huya atafi atalegahagi Anumaya Kotia ani tala yana kava yagaigeno kanaleya humainegi tamakaya mukia veamogatama nagaifena tamakupi maletama tamametitia osi kanoa nehagi Anumaya Kotia ania huno tamakaila kenatamia alino hilato hulamategahie.

29 Ani yafe ‘Kaveene tiene na ya negahune?’ hutama tusia tamakesa havi havi ohiho. 30 Naa yafena ma mopale mainaya veamoya Anumaya Koti kema nohaviya veala amakesa havi havi huya nemaigi Nelamafaa nesaya yaene kena failisaya yaenefena ago havimaine. 31 Havimaineafe tamakaya ani kavala ohutama Anumaya Kotima kava yagaisia kumate visayafe tamakesa havi havi hutama maisayana Anumaya Kotia ani yaene mukia kavetamiene kenatamiene tamamiteno ani kumatela tamavaleno tamategahie.” huno hie.

32 Nenafugatama tamakaya osi kanoa sipi sipia mainagi kolia ohiho. Nelamafaa kava humainea kumatela utama visageno kava yagailama-tesigetama maisayafe agesa havino mainegi kolia ohiho. 33 Ani agesa havimaineanagitama afenoyatamia alitama afenoyaami omalesia veamogami amamiho. Na kava hisayana ikapinaga muse yatamia talo hugahae. Ani ikapinaga muse yana hano ohugahie. Musufaya nehaya vayamoya musufayama hugahena ani kumatela ougahae. Hakanomoa ali haviya ohugahie. 34 Muse yatamima malenesaya kumatefe tamakesa havi havi hutama ani kumate visaya tamaku tamakesa havitama maigahae.

35 Yisasia mage huno hie “Ala kanoma esiafe kenatamia alitama aupa hutama failinetama tamamu nofila hulinetama kanitamia aye haletama maiho. 36 Nagoa aliya vayamoya ala kanoamimofe agava maisaya kava hutama maiho. Ani ala kanomoa ama alisia imulegati eteno no fitaalema me kalu-kalu hisigeya aupaa hetiya yakitesayafe agava mainae. Tamakaya ania hutama nagava maiho.

37 Ala kanoma emainea kanafina hetiya maineya agavama mainaya aliya vayaamoya tusia muse huya maigahae. Tamage tamahanepauve ani ala kanomoa kenaa ali aupa huno failineno aliya vayaahe ‘Mopale maiho.’ huno humateteno kavela amamite amamite hugahie. 38 Kege amunopi esio? Kokolemoa agea oainesigeno esio? Esigenofena hetiya agava maisaya aliya veamoya tusia muse hugahae.

39 Tamage huna tamahanepauve nomona nefama musufaya hisia kanomoa nomaafi ehai falesia kanahema havimaineleasina nomaa ataleno ovigeno nomaafina ehaino musufayana ohileasine. 40 Tamakaienena talo tala hiho. ‘Menia omegahie.’ hutama hisaya kana kanoale ikapinagati emainoa kanoa vayamo natenea kanomona egahue.” huno humaine.

41 Pitaa mage huno humaine “Anumayamogae tagaifekeya ani avame kaiyekea tahanepaino ifi mukia veane havisae?” huno havigemaine. 42 Anumayamoa mage huno humaine “Aliya kanomoa kanale agu agesa hanea kanoa aliyamaa agegeno alige alige nehia kanoa tamakaipina hanate maine? Aniama humainea kanomofe kava kanomoa mage hugahie ‘Mukia aliya veate yagai-maineka kavela fako faka huka mukia kanafina amamite amamite huo.’ huno hugahie. 43 Hugahigi haenagaa ani ala kanomoa eteno esigenoa hapai-mainea augafa kavama hinagenofena ani aliya kanomoa muse hugahie. 44 Tamage huna tamahanepauve aniama humainesia aliya kanomofena ala kanomoa mage hugahie ‘Mukia yania kava yagaiyo.’ huno hugahie.

45-46 Hugahianagi ani aliya kanomoa agaia agesafinaga mage huno havisiana ‘Kava kanonia menia hivi huno omegahie.’ nehuno agaia aliyate kava yagai-mainesia vegi munanegi nehamaeno ala kanomo kavela tina neno havilina neno aneginagi nehuno ‘Omegahie.’ huno hisia yupaene kanaaene kava kanoa egahie. Enunoa ani havi kavama humainea kanomona kayo kevia ami-maleteno alino haviya huteteno mage hugahie nagaima veganokano hunenataya veanene umaiyo huno hutegahie.

47 Nago aliya kanomoa agaia ala kava kanomona haiya kavafena ago havitenoagi kava kanomona haiya kavala ohuno talo talama ohunesiana ala kava kanomoa agaila alakefa huno haegahie. 48 Haegahigi nago aliya kanomoa ala kanomona haiya kavafema ohavino havi kavama maino nehisigenoa ala kava kanomoa ako huno haegahie. Mukia yama ali-mainaya veafena ‘Anonaa etetama mukia yania namiho.’ huno hugahie. Mukia yamaa amamigeya ali-mainesaya veafena ‘Anonaa ava monene etetama menamiho.’ huno hugahie.”

49 Yisasia mage huno hie “Nagaya ma mopafi ata kaesugeno tesia yafe emainoe. Ani atamoa aupaa tesie huna nagu nagesa nehavue. 50 Nahaesagenofena nagaila tusia nagata aigahie. Aupaa huya onahaesaya yafe nagu nagesa havua nagesamoa hivi huno talavanote.

51 Tamakaya na tamakesa nehaviye? ‘Ma mopale taipa falu huta maisuna yana tamigahe Yisasia emaine.’ hutama nehafi? Aao nagaya tamakaila ali fako hisua yafe emainoe. 52 Meni kanafina aepa heya faefua (5) afamola nagoke nopi nemaisaletila tolemogania (2) taliamogamina (3) kame humategae. Taliamoya (3) tolemoganina (2) kame hunategahae. 53 Mago afamotalamogania nefaa agaia nafanemona kame hutesigeno nafaneamoa agaia nefana kamea hutegahie. Nago tayametalamogania itaamoa munaamona kame hutenageno munaamoa itaamona kamea hutegahie. Vemona itaamoa anofeloamona kame hutenageno anofeloamoa ania huno nevena itaamona kamea hutegahie.” huno humaine.

54 Alitalu humainaya veamogamifena mage hie “Tamakaya yagemoma tavi nefalelegati siamoma evayi higetamahena aupaa mage nehae ‘Ko aigahe nehie.’ hutama nehageno ani yana tamage huno falote nehie. 55 Oko ikama agetetama ‘Amukoage hugahe nehie.’ hutama nehageno ani yana tamage huno falote nehie. 56 Tamakuafina havitama omaletama amegati kea nehaya vagala veala tamakaya mopale yaene ikate yaene agelama hutama neagayanagi naa higetama meni kanafima falote hia kavala agelama hutama noagae?” huno humaine.

57 “Naa higetama fatago kavafena tamakaitamia tamakesa havilama hutama nohaviye? 58 Nago kanomoma ‘Haviya hunatanagena kaiyeke hugategahe nehue.’ hunoma kavaleno vinagetana kaiyekema havi kanomotema ugahema neutana ‘Nenafuga kaipa falu hisia yana kamigahue.’ huka hapaiyo. Ania ohisanana kavaleno kaiyekema hugatesia kanomote vinageno ani kea haviteno ati vayamogami ayapi katesigeno kavaleno nofila hugategahie. 59 Nofi hugatesigekahena kaiyekema hugatenea kanomoma ‘Mone namio.’ huno hu-mainesia yamaa oaminukahena nofi nopitila ataleka omegane.” huno humaine.