7
Yisasia ati vayate kava humainea kanomo aliya kanoa alino kanale hutene.
1 Yisasia mukia humainea kea veala hamapaigeya havitageno Kapaneamu umaine. 2 Nago Lomu ati vayate kava humainea kanomoa agaia aliya kanoa tusiya huno nehaiya kanoagino tusia kali alino ago faligahe hie. 3 Faligahe nehigeno ati vayate kava humainea kanomoa Yisasi avagea haviteno nagoa Yuta vayate ala vayamoya humateno mage humaine “Nagayama hua kea Yisasina havigeho ‘Musekaa nehugi kanale eka aliya kanonia ali kanale huto huno hie.’ hutama havigeho.” huno hie. 4-5 Nage higeya neuya Yisasite uvayi huya tutu huya mage hae “Ani kava kanomoa tagaiti Yuta vayamogatife aluya huno nehaigeno mono notia kilatene. Ani yafe kanale kano mainegi afaa hamaisanana katesia kava hugane.” huya hae.
6-7 Yisasia amakaiene tokaeno viaamo nomaale uvayi hugahe nehageno Lomu ati vayate kava humainea kanomoa vayaamogamife “Mage hutama hiho.” huno humategeya Yisasite eya mage huya mehae “Mage hie ‘Anumayamoga kasalo kahaesigekahena atalo. Nagaya kanale ohunoa kanomoni noniafi esanana okategahie huna ani yafe kagaitega ounogi afaa menia aliya kanonimona kaliahena kea hutesanageno kanale hutesie huna nehue. 8 Nagaya kava kano mainoe. Nakaima kava yagainatenea kanoa anale nagaseno maineanagi nagaya ania huna nagoa ati vayatela kava huna mainoe. Nago kanomofe ‘Vuoma.’ hugenoa umaine. ‘Enoma.’ hugenoa emaine. Aliya kanonihe ‘Naa huo.’ hugenoa ania humaine.’ huno hie.” huya hapaimainae. 9 Hapaigeno Yisasia ani kea haviteno agesagumoa tusiya huteno kasagoya akavema umainaya veamogamifena mage huno hie “Tamahanepauve ma kanomoa tusiya huno nagaifena havino agupi maleno ametiti humaine. Ma kanomoma hia ya huya nagaifema haviya amakupi maleya ametiti humainaya veala mukia Yuta veane mainaya kumatela oagenoe.” huno hie. 10 Higeya humatenea vayamoya notega eteya uya mogayana ani aliya kanoa ago kanale huno mainegeya mo gemainae.
Yisasia nagola Neni kumate neyana falimainefiti ali hetitene.
11 Yisasia osi kanaa maiteno agaiene tokaeya nemaiya anagaaene mukia veanene Neni kumate umainae. 12 Ani kumala kegiya humalenaya fiate nevageya nagola falimainea kanoa aliya hevaitegahe emainae. Anima falimainea neyamona itaamoa aiya nagoke nafaneagino itaamoa megusa alagiya ani yafe mukia ani kumate veamoya ani amo akave umainae. 13 Nevageno Anumayamoa ani amona ageteno tusia hau huteteno mage huno hapaiye “Kagaya kahauma huka avima atana yana hano huka afaa maiyo.” huno hapaiye.
14 Hapaiteno alilinaya hagifanale motafa hulineno hagifanama aliya aya vayala anile hetimainageno Yisasia mage hie “Ma neyamoga hetio huna nagaya kahanepauve.” huno hie. 15 Higeno anima falimainea neyamoa hetino kaiyekea aepa henoma nehiana Yisasia avaleno itaamona amine. 16 Amigeya mukia veanemoya tusia amamayo aiteya Anumaya Koti agia alisaga nehuya mage hae “Anumaya Koti ala aune kanoa tagai amunopina ago emaine. Anumaya Kotia mukia veaa amaugafa aligatigahe emaine.” huya humainae. 17 Yisasia aniama hia avagemoa mukia Yutia kotegaene alu kotegaene ute ete humaine.
Yonia tole kanolatana Yisasitega hunatene.
18 Yoni kema nehaviya vayamoya Yisasi avagea Yonina hapaimainae. 19 Hapaigeno Yonia agaiene tokaeya nemaiya anagapiti tole kanolafe ke higeana agaite aageno Anumayamotega hunateno “Mage hutana havigeo.” huno hanapaiye “Kagaya egahiema humainaya kano emainapi alu kanohe agava maisune?” hutana havigeo. huno hie. 20 Higeana ani tole kanolatana Yisasitega eana mage huana hae “Yonia tima fale neamatea kanomo hulaategetaa kagaitega neoe. Mage hutana havigeo huno taahapaiye ‘Kagaya egahie huya humainaya kano mainapi alu kanohe agava maisune.’ huno hie.” huana hae. 21 Ani kanafina Yisasia mukia alu kali alu kali alimainaya veanene Kefo Avamula amakusafinaga mainea veanene ali hilato humatene. Amaulaga asu humai veanea amaulaga agesaya ya humatene. 22 Anakaifena kenonaania mage huno hie “Tanakaya utana agaa yaene havia yaene Yonina hapaio. Amaulaga asu humainea veamoya amaulaga neagae. Amaiya haviya humainea veamogami amaiyamoa kanale humate. Fugitaya amakemainea veala kanale humate. Amakesa tilemainea veala eteya nehaviye. Falimainaya veala hetiya mainae. Afenoami omalenea veala Anumaya Kotina kanale kea nehaviye hutana hapaio. 23 Nagai kehema tole amakesa ohavisaya veamoya kanaleya huya maigahae.” huno humaine.
Yonife “Ala kano maine.” huno humaine.
24 Yonima hunategeana emainaa kanolatana utaageno Yisasia anile mainaya veamogamina Yonife mage huno hamavige “Tamakaya kame kotega utama na ya agegahe nevae? Nago vemoa hopa kana huno yasimoa ali fagagi mainea kanomona agegahe nevafio? 25 Ifi na ya agegahe nevae? Kanale kena failinesia kanoa kame kotega agegahe nevafio? Aao kanale kena failinesaya vayala kanale kave nege nege nehaya vayala kame kotega omainagi ala kanomona kanale nomaafi maigahae. 26 Na ya agegahe nevae? Anumaya Koti aune kano agegahe nevafio? Tamage tamahapauve mukia Anumaya Koti aune vayamogamina amakasemainea kanoa Yoni maine. 27 Yonife nayona Anumaya Koti autamafina mage huya kaemalenayane
‘Haviho nagaya Anumaya Kotina aliya kanonimona hagotena hutogeno uhagotegateno visana kana valino ali hilato hugategahie.’ huno kaemaleneane. 28 Tamahapauve Yonia mukia ma mopale atenaya vayamogamina ago amakasemaineanagino nagoa afa veamoya Anumaya Kotife ‘Kava yagailato.’ huya humainaya veala Yonina ago agasemainae. 29-30 Kasagoya veala musufaya nehuya vaya amaugafaleti takisi nealiya vayaene Yoni humainea kaiyekea haviteya ‘E, Anumaya Kotia ‘Naa maa huo.’ huno humainea kea fatago ke huno hie.’ hutageno Yonia tina falemateanagi Falasia vayaene kahegi kema havilinaya anagaene ‘Anumaya Kotima ‘Naa maa hiho.’ humainea kehe tagaifena ohune.’ Yonima falematea tina ofalegahune.” huya amakaveno hutenae.
31 Meni kanafima mainaya veamogatamahena hana augafa veane mainae huna tamahapaisue? 32 Ma ma hisua augafa nafaneyagamoya mainaya kava hutama mainae. Ani nafaneyagamoya veane alitalu huya mainalega maineya alu nafaneyagahena ke huya mage huya hae ‘Yaveya aikolunana tamakaya amoa noayae. Tagaya tahau hisuna yagame nehunana tamakaya avia noatae.’ huya hae. 33 Yonia ti fale neamatea kanomoa kaveene haviliene mosino emainegetama tamakaya ‘Satani Avamula aguafina maine.’ hutama nehae. 34 Hayanagi ikapinagati emainoa kanoa vayamo natenea nafanemona tina kavela nenogetama nagaifena ‘Kaveene tiene neno hano hugeno omai kano maineno musufaya nehaya vayaene amaugafaleti takisi nealiya vayaene kefo yama nehaya vayaene vayaamoya mainae.’ hutama nehae. 35 Hayanagi Anumaya Kotina kanale agu agesama hanea kavala akavema nevaya veamoya ‘Fatago kava nehie.’ huya nehae.” huno hie.
Nago amoa Yisasina aiyale masavena faletene.
36 Nagola Falasia kanoa Saimonie Yisasife “Nagaiene kavela meno.” huno higeno Yisasia kave mo negahe Falasia kanomo nopi haino mopale maine. 37 Haino mainegeno nagola kumai aala ani kumate nemaiyanagino “Yisasima Falasia kanomo nopiti kave negahe umaine.” huya haya kea haviteno manaage masavena havatemai yafa keayo alilino emaine. Ani keayoma talo hia yafamo agia alapasatae. 38 Yisasi akavelega aiyafi umaineno Yisasife “Ala kano mainane.” nehuno aiyafi ape huno avi neategeno aunumoa takilavino Yisasi aiyale tavigeno agaia ayolagefaleti aye hamino alisoso hu neateno aiyale atako nehuno manaage masaveteti faletene.
39 Fale neategeno kema humainea Falasia kanomoa ani amoma hia kavala ageteno agesafinaga mage huno havie “Ma kanomoa Anumaya Koti aune kanoma maineleasina aiyalema alisoso hutea amofena ago havileasine. Ani amoa tusia kefo yamaage nehia a maine.” huno nehavie. 40 Agesafinaga ani kea nehavigeno Yisasia agaife mage huno hie “Saimonigae nago kea kahapaisue.” huno higeno “Hulavenelina kanomogae nahapaigena havino.” huno hie.
41 Higeno Yisasia mage huno hie “Nagola monea hanea kanomote tole kanolatamogania uana nagomoa ‘Vani hataleti kina (K100) namigena alino.’ higeno nagomoa teni kina (K10) namigena alino. Alitetaa anonaa haenaga megamiano huana haageno anamigeana aliana umainae. 42 Uteana haenagaa anonaama amisaa monea kosa ohegeana oamiageno ‘Kanalelagi onamitana ataleo.’ huno humaine. Ani kema humainea yafena ani tole kanolatalapitila hana kanomo monema aminea kanohena tusia musena huno hau ayamopafina haugahie?” huno havige.
43 Saimonia mage hie “Nagesa havuana ala monema alimainea kanohe atalo hunoma hutea kanomoa tusia muse huno hau ayamopafi haugahie.” huno higeno Yisasia mage huno hie “Tamage hane.” huno humaine. 44 Ani kea huteno maiyahae huno ani amona agemaineno Saimonina mage huno hapaiye “Kagaya mani amona ago. Nagaya kagai nopi ogeka naiya sese huonatanageno ma amoa agaia aunuleti naiya sese hunateteno agaia ayolagefaleti ali hau hunenate. 45 Kagai nopi ogeka nagaila naugafalela alisoso hu onatenanagi ma amoa naiyalela eno aluya huno alisoso hunenate. 46 Kagaya afa masavetetila nanupina fale onatenanagi mani amoa manaage masaveteti naiyalela falenatene. 47 Ani yafe kahanepauve mani amoa kefo yamaamoa kasago humainegeno Anumaya Kotia ago aigeateno ataletea yafe tusiya huno hau ayamopafi haumaineanagino osi kefo yamaama hanea kanomona Anumaya Kotia ani kefo yamaa aigeateno ataletesiana osia hau ayamopafina haugahie.”
48 Yisasia mage huno ani afena hie “Nagaya kefo yakaa ago aigekatena atalegatoe.” huno hapaiye. 49-50 Agaiaene tokaeya mopale mainaya veamoya sumi sumi kefiti mage huya hae “Mani kanoa hanaa kano maineno ‘Kefo yakaa aigekatena atalegatoe.’ huno nehie.” huya hae. “Nagaifena havika kagupi maleka kametiti hanafe kagu kamena ago aligatigatogi kamena male falu huka vuo.” huno hapaiye.