1 Nago yupa Yisasia Kenesaleti tikotumo agegayalega hetimainegeya mukia veamoya Anumaya Koti ke havigahe meligovegave hutenae. 2 Hutageno Yisasia ageana tole tipi kale ti agegayalega avayu huya maleteya noyame kuyama nehaya vayala ani tipi kalea ataleya kukonago sese humainae.

3 Sese nehageno Yisasia Saimoni tipi kalefi haisaga humaino maineno mage hie “Saimoniga ti agegaya neataleka osia tipi vuo.” huno hapaiteno ani tipi kalefi haino mopale maineno mukia alitalu humainaya veamogamina kea hamapaiye.

4 Hamapaiteno Saimonife mage hie “Tipi kalekaa ti amunopi ayetufeka kotumona augelifi kukonagokaa ataleka noyame kuya huo.” huno hie. 5 Higeno Pitaa Yisasife mage huno hapaiye “Ala kanomogae tagaya kegela noyame kuya huge hugetonana noyamea oalunageno ko timaine. Oalinonagi kagayama hana kemo akave malena kukonagona malegahue.” huno hie.

6-7 Ani kukonagona tipi maleana kasagoya noyame hai falegeno kukonagomoa kanaage huno atalaga hisia kava higeya nago tipi kalefi mainaya vaya amakaiene tokaeya aliya nealiya vayafe amayateti avamename huya “Etama taya hiho.” huya hageya emainae. Eteya ani tole lipi kalelatapina noyamea aliya male havatageno kanaage huno hapanesia kava humaine.

8 Saimoni Pitaa ani yana ageteno Yisasina aiyafi aleya ayemaineno mage hie “Anumayamogae nagaya kefo kava nehua kano mainogi nagaila nataleka vuo.” huno hie. 9 Saimoniene agaiaene mainaya vayamogamina noyamemoma havateno hiya hia yafena tusia amamayo aimainae.

10 Saimoniene aliya nealia kanolatana, Sepeti nafanelatane, Yemesiene Yoniene ania huana tusia anamayo aiageno Yisasia Saimonife mage hie “Menia kolia ohuo. Noyame kuyama hana avamete Anumaya Kotia agola maisaya hamaimula amamigahe veane kuya hugane.” huno hie. 11 Higeya tipi kalea aliya kahaepatega nemaleya mukia yayaga neataleya Yisasina akave umainae.

12 Nagi nago yupa Yisasia nago ala kumate mainegeno nago fugitayamo augafa alino hayagino atalako humainea kanoa maineno Yisasina ageteno agaitega eno mopafi agoya ayemaineno mage huno havige “Anumayamoga kahaisigekahena nagaila ago alika hilato hunatateasine.” huno humaine. 13 Higeno Yisasia ayana hayo huno augafale avate hulineno mage huno hie “Nagaya nahaigena kaugafamoa menia kanale hino huna nehue.” huno higeno anile aupaa kalia hano hutene.

14 Yisasia mage huno hapaiye “Ali hilato hugatoa yafena nago kanoa haopaika mono nopi kava kanomote uka mukia veala kalikaama kanale hugatoa kema havinuyahena mono nopi kava kanomoa kaugafa kamota huno kagetesigeka kaugafama ali hilato hugatoa yafena Mosesema ‘Ma yama Anumaya Kotina amio.’ huno humainea yana Anumaya Kotitega atalo.” huno tokiyaage ke hapaiye.

15 Hapaiyanagi kalima alino kanale hutea kemoa ute ete higeya kasagoya veamoya haviteya “Agai ke havita kalitia alino kanale hulatesie.” huya emainae. 16 Emainayanagi Yisasia ani veala neamataleno veane omai kotega umaineno Anumayamotega ke huno havige havige huno maine.

17 Nagi nago yupa Yisasia humaveli hamaveli nehigeya mukia Falasia vayaene kahegi kemo aepaama havilinaya anagaene Yelusalemutiene mukia Kalili kumayagaletiene Yutia kumayagaletiene eya avate mopale maineya havimainageno kali veane kanale humatesia tokiyaa Anumayamoa amigeno Yisasipi hane.

18-19 Anile nagoa vayamoya nago kanomona aiya aya falimainea kanoa hagifanale faeno mainegeya avaleya “Yisasi avate motegahune.” huya hayanagi kasagoya veamoya hiya humainaya yafe kana omalegeya amega nogatofule haiteya hanae yosa alisaga humaleneya ani hagifanale faeno mainea kali kanoa mukia veamogami amunopi atalageno Yisasi avate tavimaine.

20 Tavigeno Yisasia “Ma vayamoya ago nagaife haviya amakupi maleya amametiti nehae.” agesa haviteno kali kanohe mage huno hie “Nenafuga kahanepauve nagaya ago aigekatena kefo yakaa atale negatoe.” huno hapaiye. 21 Higeya kahegi kemo havilinaya anagaene Falasia vayaene haviteya amakaiami amakuafiti mage huya hae “Mani kanoa Anumaya Kotife huhaviya hutea kanoa tae? Nagoa vayamoya aigetateya kefo yatia atale otategahayanagi Anumaya Kotia agaiage aigetateno kefo yatia atalelatesia kano maine.” huya hae.

22 Hageno Yisasia amakupi haya kea ago nehavino mage huno hie “Naa higetama mani kea tamaku tamakesafinaga nehae? 23 Nagayama hutena hisua kea hana kemo kanaage humaine? ‘Aigekatena kefo yakaa atalenegatoe.’ huna hisua kemopi? Kali kanomofe ‘Hetika ka vuo.’ huna hisua kemoe?

24 Nagayama ikapinagati emainoa kanoa vayamo natenea kanomona ma mopale mainena aigetamatena kefo yatamia atalelamatesua tokiyania hane hutama havisaya yafe nago kava huna tamaveligahue.” huno kalima nealia kanomofe mage huno hie “Hetika hagifanaka nealika nokalega vuo.” huno humaine. 25 Higeno ani kalima nealia kanomoa aupaa mukia veamogami amaulagafi hetino faeno nemaiya hagifanaa nealino Anumaya Koti agia alisaga hume hume nomaalega umaine. 26 Na kava higeya mukia alitalu humainaya veamoya ageteya tusi amamayo aigeya Anumaya Koti agia alisaga nehuya mage huya hae “Meni kanalela alua ya neagone.” huya humainae.

27 Anile neamataleno vilegati nago kanoa agia Livaie musufa huno vaya amaugafaleti takisi mone aliliteno nehia kanoa opisi nomaale mopale mainegeno Yisasia ani kanoa mogeteno mage huno hie “Kagaya nakave eno.” huno hie. 28 Higeno Livaia hetino mukia yamaa neataleno Yisasina akave umaine.

29 Livaia nomaafina tusia kave Yisasina kaetegeya mukia musufa huya amaugafaleti takisi mone nealiya vayaene nagoa vayaene ani nopi Yisasiene tokaeya maineya kavela nemainae.

30 Nemainageya Falasia anagaene kahegi kemo havilinaya anagaene Yisasienema tokaeya nemaiya anagahe kalugalu ke nehatageya mage huya nehae “Naa higetama tamakaya amaugafaleti takisi monema nealiya vayaene kefo yama nehaya vayaenena kavela maitama nenae?” huya hamavigae.

31 Hageno Yisasia kenonaamia mage huno hamapaiye “Kalima noaliya veanea tota kanomotega ougahagi kali veamoyage tota kanomotega ugahae. 32 ‘Fatago veane mainone.’ huya nehaya veanehena ke hugahe omenogi nagaya kefo yama nehaya veanehe ‘Tamakua aiyahae hiho.’ huna hamapaigahe emainoe.” huno hamapaiye.

33 Vayamoya mage huya nehae “Yonienema tokaeya nemaiya vayaene Falasia vayaene mukia kanalela kavela mosiya Anumayamotega havige havige huya nemaiyanagi kagaienema tokaeya nemaiya anagamoya mukia kaveene tiene nege nege nehae.” huya hae.

34-35 Hageno Yisasia mage huno hie “Nago kanoa aama faiya esakenoa avaya hesia imu kisia yupa vayaamoyaene tokaeya mainesigeya ani vayayaga kavela mosisafio? Aao moosigahayanagiya haenagaa alu kana falote hisigenoa kame vayamoya ama alisia kanoa atafa huya amakaipiti avaletalesageya ani kanale mainesaya vayaamoya hamau huteteya mosigahae.” huno humaine.

36 Yisasia nago avame kea mage huno hamapaimaine “Nago kanomoa haegafa kena alino laga huteno atafa kenalela maleno ohatigahie. Maleno hatisiana haegafa kena laga huno ali haviya hugahie. Haegafa kenamoa atafa kenalela nagoke avamete ohune.

37 Nago kanomoa haegafa nofi alagamo timaa atafa mememo augafa ti keayopina takino ovaigahie. Takino vaisiana timaamoa kanuka hesigeno ti kena falo huno takilavinageno ti kena ali haviya hugahie. 38 Naa hugahiafe haegafa nofi alagamo timaa hefino haegafa meme augafamo ti keayopi takino vaimaleno. 39 Kanuka hemainea nofi alagamo timaa nemainaya veanemoya haegafa nofi alagamo timaahena ohamaigeya mage huya hae ‘Kanuka hemainea nofi alagamo timaahena nelahaiye.’ huya humainae.” huno hie.