12
Yisasina aiyale manaage masave fale-tene.
1 Yisasia Petani kumate, Lasalusia faligeya he-vai-tenageno Yisasia molino he-ti-tenea kanomo kumate, uvayi hu-maine. Uvayi hiana ani kanafina Anumaya Kotima amakinagomogami amaugafama ali-gati-mainea yafe amakesa haviya imuma kisaya kana sikisia (6) yupa maiteya kigahe nehae. 2 Hageno Yisasina musekase kave talo tala hu-teteno Mataa alino amamite amamite nehigeno Lasalusia Yisasiene siale mainae. 3 Mainageno Maliaa nago kilo manaage masave hanea keayola, tusia mone hanea masavemo agia natie nehaya masavena alino Yisasina aiyale taki hano hu-teteno ayolagefaleti ali hau hu-nea-tegeno ani masavemo manamoa ani nopi haino hiya higeya manaa havimainae.
4-5 Nago kanoa, Yisasienema tokaeya nemaiya anagapiti kanomo, agia Yutasi Isakaliotie. Ani kanomoa haenagaa Yisasina agesi huno kame ya hu-tesia kanomoa mage hie “Naa higeno mani manaage masavena afaa neatale? Atalegeno nago kanomoma miya hileasipa tali hataleti (K300) kina aliteta mani masaveteti monea afenoamima omalenea veane amamuteasine.” huno hie. 6 Mani kea moneamima omalenea veafena hauma hu-nea-matea yafena nohigi mukia kanalela monema hanea kutela agaia yagai-maineno musufa yama nehia yafe mani kea hu-maine. 7 Yisasia mage hie “Ma munala afaa atalegeno ma masavena afaa ali-lineno nagayama falisugeya he-vai-natesaya kanalela mani masaveteti fale-na-tegahie. 8 Moneamima omalenea veamoya mukia yupa tamakaiene maigahayanagi nagaya tamaikaienena mukia yupa omaigahue.” huno hie.
Mono note kava vayamoya Lasalusina haesaya ke huya haya ki-mainae.
9 Mukia Yuta veamoya “Yisasia Petani kumatema emaine.” huya haya kea haviteya ani kumate umainae. Yisasina agaiage agegahe ounagi Lasalusia fali-mainegeno ali he-ti-tenea kanoene anakegahe umainae. 10-11 Lasalusia fali-mainefiti he-ti-mainea yafe mukia Yuta veamoya nayoma nehaya monola neataleya Yisasina amakua amitafa huya amametitima haya yafe ala mono note kava vayamoya Lasalusiene haesaya kea hu-mainae.
Yisasia Yelusalemua ala sauve kana huno hai fale-maine.
12 Faeteya kotigeya mukia veamoya Anumaya Kotima amakinagomogami amaugafama ali-gati-mainea yafe imuma ki-malenale emaineya “Yisasima Yelusalemu kumate egahie.” huya haya kea havi-mainae. 13 Haviteya Yisasiene katega mo fotu hugahe tofe yosamona haisaa kofa-nafa huya aliya umaineya ala kefiti mage huya hae “Tusia yate taugafa ali-gatisana kanoa kanaleya huka neane. Anumayamo aliya alisana yafe hu-ga-tegeka emainana kanomoga Anumaya Kotia kanale manu kamiteno kaya hu-maine. Isaleli kotega yagai-ma-tenana sauve kanomoga Anumaya Kotia kaya hu-maine.” huya hae. 14 Yisasia nago hosi kana afumo agia tokie nehaya afua age falote huteno agupifi haino maine. Aniama hia kavala nayona Anumaya Koti kefina mage huya kae-malenayane.
15 “Yelusalemu veamogatama kolia ohutama ageho. Menia tamakaila sauve kanotamia yaufa tokimo agupifi haino maiteno egahie.” huno kae-maleneane.
16 Yisasima aniama hu-mainea yupa agaienema tokaeya nemaiya anagamoya anima kae-malenea kea ohavianagi haenagaage Yisasima faliteno he-tino tokiya hale yamaama hanea kumate haitegeya amakesamoa ai-kalo higeya anima kae-malenea kene veamoya ani yupama hu-tenaya kavafeene havi-mainae.
17 Yisasia Lasalusifema “Komufitila he-tio.” huno higeno fali-mainefitima he-ti-mainea yupa anilema mainaya veamoya ani kanafina “Yisasia naa maa kavala hu-maine.” huya kea aliya ute ete huya hama-pai-mainae. 18 Hama-paigeya haviteya anima tokiya avame yama hu-mainea kema haviya yafe mukia veamoya katega Yisasiene mo fotu hu-mainae. 19 Hageya Falasia vayamoya amakaiami amunoamifina ani kehena mohu mehu huya mage hu-mainae “Ageho mukia mopafi veamoya Yisasina akave nevayanagita atafa ohugahune.” huya hu-mainae.
Nagoa Kaliki veamoya Yisasi agegahe nehae.
20 Nagoa Kaliki veamoya, Anumaya Koti agi alisaga hugahe, ani imu kavema nalega Yelusalemu hai-mainae. 21 Ani Kaliki veamoya Filipite umainae. Filipia Kalili hanea kumala Petesaita kumateti kano mainelega uya mage hae “Musekaa nehunagi tagaya Yisasina agegahe neone.” huya hu-mainae. 22 Hageno Filipia viayamo Etaluna hapaiteana ani lolemogani Yisasina mo hapai-mainae. 23 Hapaiageno Yisasia mage huno hana-paiye “Menia Ikapinagati emainoa kanoa vayamo natenea kanomonia tusiya huya nagai nagia ali-saga hisaya kanamoa ago evayi hu-maine. 24 Tamage huna tanaha-nepauve nagoke viti avinamoma asaga hu-lavino mopafima ofalinunofena nagoke viti avinaage hanegahigi nagi falinunofena ai-falo huno hageteno kasagoya viti alagayaga aye helafigahie. 25 Naa hugahianagi nagoa veamoyama mukia ma mopafi yafema amaugafama aliya haiteya hamaimuamima atafa hisaya veamoya faligahae. Faligahayanagi nagoa veamoyama ma mopale mainaya amaugafama aliya haisaya yafema ‘Afa yanema.’ huya hisaya veamogami hamaimumoa hano ohugahianagiya maige maige huya maigahae. 26 Nagoa veamoyama nagaifema huya aliya alisayana nakave ege ege hisae. Nakavema esaya veamoya maisua yate nagaiene mainesageno Nenafaa nagai aliyama nealiya veamogamina ala amaki amamigahie.”
Yisasia yafaga yosale falisia yafe hama-pai-maine.
27 Yisasia mage huno nehie “Nagai naguamoa tusiya huno kanaage nehigena kasagoya nagesa nehavugi naane huna hisue? ‘Nenafaga menia nagai naugafalema falotema hugahema nehia yana ali-talo.’ hisufi? Aao nagaya ani nagata aisia yapi maigahe emainoe. 28 Nenafaga kagaika kagi alisaga huo.” huno nehigeno anile ikapinagati age aino mage huno hie “Nagia ago alis-aga hu-mainoane etena nagoene nagia ali-saga hugahue.” huno hie.
29 Higeya melitalu hu-mainaya veamoya agema aiya kea haviteya nagoamoya mage huya hae “Ikapinagati akali kalu nehie.” huya hageya nagoa veamoya mage huya hae “Nago ensole kanomoa ke me hanepaiye.” huya hae. 30 Hageno Yisasia mage huno hie “Ani agema aiya agea nagai naya hisia yafe nohigi mani kea tamakai tamaya hisia yafe nehie. 31 Menia ma kanafina Anumaya Kotia ma mopale veamogamina kaiyeke hu-ma-tegahie. Meni kanafima ma mopalema kava yagai-mainea kanoa, Satanina ago anati-talegahie. 32 Anati-talegahigi ma mopaleti navalesaga huya nahaesageya mukia veamoya amakua namisaya yafe amavayu huna nagainilega amategahue.” huno hie. 33 Ani avame kema huno hia kemoa mage hu-maine “Ma yateti, yafaga yosale nahaesagena faligahue.” huno hama-pai-maine.
34 Hama-paigeya veamoya kenonaa mage huya hapai-mainae “Tagai monomoa mage huno taha-pai-maine ‘Anumaya Kotima taugafa ali-gatigahema hu-tesia kanoa mukia kanafina maige maige hugahie.’ huno taha-pai-maineanagi naa higeka ‘Ikapinagati emainoa kanoa vayamo natenea kanomonia yafaga yosale navalesaga hugahae.’ huka nehane? Anima ikapinagati emainea kanoa vayamo atenea nafanea ta maine?” huya havigae. 35 Havigageno Yisasia kenonaamia mage huno hie “Hale yamaaene kanomoa tamakaipina osi kana kanoa maine. Hani kisia yana vayi huno aiso hu-lama-tesia yafe hale yama hanea kanale vaiyatete hiho. Hani-ki-mainea yapima mainaya veamoya visaya kana oagenae. 36 Hale yamaama hanea kanafina hale yamaaene kanohe ‘Tamage nehane.’ hutama havitama tamakupi maletama tamametiti hiho. Aniama hisayana hale yamo nafaneyaga maigahae.” huno hama-pai-maine.
Kasagoya Yuta veamoya Yisasifena haviya amakupina maleya amametiti nohae.
Yisasia mani kea huteno neamataleno mo fala-ki-maine. 37 Mukia tokiya avameyamo amaulagafi alianagi agaifena haviya amakupina maleya amametitia nohae. 38 Ani yafe Anumaya Kotina aune kanoa, Aisaiyaa, hu-mainea kea falote huno tamage nehie. Mage huno hu-maineane
“Anumayamoga manima hu-mainona kea taya haviya amakuafina maleya amametitia nehae? Anumayamoa tokiya avame yamaa amave-ligeya hana veamoya havilama nehae?” huno kae-maleneane.
39 Higeno amuha ohunayanagiya Yisasifena haviya amakupina maleya amametitia ohunaya yafe Aisaiyaa nagoene mage huno humaineane
40 “Amaulaga oagesaya yafe Anumaya Kotia amaulaga ago alino asu hu-ma-tene. Amaku amakesa havilama ohisaya yafe ‘Yafa kana amanuene veane maiho.’ hu-ma-tene. Havigu amakua ai-yahae huya nagaitega eyafenagina ali hilato hu oama-tegahue.” huno hu-maineane.
41 Aisaiyaa Yisasina tokiya hale yamaa ageteno Yisasife mani kea hu-maineane. 42 Hu-maineanagi Yuta kava vayayagafitila kasagoya vayamoya Yisasife haviya amakupi maleya amametitia hayanagi Falasia vayamoya mage hae “Mani kavama hisayana mono nopina omegahae huta nagalu hu-lama-tegahune.” huya hu-mainaya yafe “Yisasina tagua neamune.” huya hu-falote ohunae. 43 Ani veamoya Anumaya Kotia “Kanale kava nehae.” huno amakima alisaga hisia yafena nohamaigi veamoya “Kanale kava nehae.” huya amaki alisaga hisaya yafeke nehamaiye.
Yisasia kema nehia kemoa veala fako hu-ma-tegahie.
44 Yisasia tokiyaage ke hu-haleno mage hu-maine “Nagoa veamogatama nagaifema tamage nehie hutama tamakupi maletama tamametitima hisayana nagainigefena tamakupina maletama tamametitia hu-nona-tagi hu-na-tenea kanomofeene hu-nea-tae. 45 Nagoa veamoyama nagaima nenagayana Nenafaa hu-na-tenea kanoene age-mainae. 46 Nagayama ma mopalema emainoana hale ya kana huna emainoe. Nagoke nagoke veamoya nagaifema haviya amakupima maleya amametitima hisayana haniki-mainea yapina omaigahae. 47 Nagoa veamogatama nagai kema havitetama nakavema omalesayana nagaya tamakaila kaiyekea hu otama-tegahue. Ma mopale veamogamina kaiyekea hu-ma-tegahue huna omenogi ma mopale veamogamina amaugafa ali-gatigahue huna emainoe. 48 Nagoa veamoya nagaifema amakavenoma huya nagai kema amakupima aliya omalesayana hu-mainoa kenimoa fako hu-ma-tegahie. Ma mopama hano hisia kanama evayima hisiana hu-mainoa kenimoa fako hu-ma-tegahie. 49 Mani kea nagesafitila ali falote huna tamaha-nopaugi hu-na-tenea Nenafa ‘Nage mage huka huo.’ huno naha-paiya keage tamaha-nepauve. 50 Nagaya ago havilinoe agai kema havitama tamakupima maletama tamametitima hisayana ofalitama agola maige maige hisaya tamahaimula aligahae. Nani yafe Nenafaa naha-pai-mainea kea tamaha-nepauve.” huno nehie.