28
Poloa Malata kumate maine.
1 Tagaya kanale huta evayi hune. Evayi huna komo agia Malata kumale huya tahapaigeta havimainone. 2 Ani kumate vayayagamoya kanaleya huya ali kayone hulatageta mainonageno kola aiteno yasiage higeya ata kae-maleteya me lavaleya ata mo lota hulatenae. 3 Poloa ata haefusa haya alino ata kaeyana nagola vayama nehaeya osifavemoa ata haefusa hayafiti augafa leno amuko higeno hati-lavino Polo ayapi menilage-lage humaine. 4 Menilage-lage hulinegeya anile maiya vayamoya ageteya mage hae “Mani kanoa vaya hamaeno hevai-neamatea kanogino hage tipina ofalianagino fatago Anumayamoa anonaa alisiafe haeyanagino ago faligahie.” huya hae. 5 Hayanagi Poloa ani osifavea alino aye-tafaino atafi ataleteno agaila augafa alino haviya ohigeno afaa maine. 6 Afaa maigeya anile maiya vayamoya augafa halegino asaga hulavino falisiafene huya ayaayate agava maiyanagi nagola havi yamoa agaitela falote ohigeya eteya alu amakesa haviya mage hae “Agaya nago Anumaya maine.” huya havimainae.
7 Vayima huna mopamona aupaale hanea kumatela ti amunopi kotega kava kanomo mopae. Ani kava kanomo agia Pupiliusie. Ani kanomoa lavaleno nomaalega mo lateneno tagufa (3) kanafi kave yagita huno nelamino yagai-latene. 8 Yagai-lateneno Pupiliusina nefaa amuko kaliene aiamoa tolo ya agea kaliene alino mainegeno Poloa mo-geteno Anumaya Kotitega havigeno augafale aya malegeno ani kaliamoa falu hu-tene. 9 Falu hutegeya nagoa ani kumate kali vayamoya ageno Poloa kaliamia alino kanale humatene. 10 Alino kanale humategeya tagaila kanale kava hulatageta maineta haenagaa ugahema hunageya tagaila nesuna yama aupa huna yana tamiteya tipi kalefi aliya latenae.
Poloa Lomu kumate uvayi humaine.
11 Tagaya tagufa (3) ika ani kotega maiteta nago tipi kalea, ala yasima alia kanafinagiya Malata kumate maiya tipi kalea, Alekasatalia kumateti emaiya tipi kalefi asaga humaita umainone. Ani tipi kalemo agoyalela tole kuyave netalamogani anamena talo humalenae. 12 Ani tipi kalefima onana Sailakiusi kumate evayi huta tagufa (3) kana mainone. 13 Sailakiusi kumala ataleta kagita kagita Legiumi evayi huta faenonageno yasimoa alino aepa hegeta nagoke taula mo faeteta Puteoli evayi huteta hati-lavita lipi kalea agola neataleta mopafi emainone. 14 Puteoli nagoa mainaya tafu-taganagamina amakonageya mage hae “Tagaiene nagoke sota maigahae.” huya hageta anile maigeta Lomu kumatela umainone. 15 Katega neonageya Lomu kumate mainaya tafu-taganaya “Katega neae.” huya haya kea haviteya eya nagola Apiusi maketie nehaya kumate me fotu hageya nagoa vayamoya “Talia (3) Natu Vayamoya Nefayaya Noyaga Hane.” huya haya kumate fotu hunageno Poloa ani vayala amaketeno Anumayamotega muse nehigeno aguamoa tokiyaage humaine.
16 Lomu kumatema unana ala kava kanomoa Polofe “Kanalelagika kagaikaa nopi mainesanageno nago ati kanomoa kava yagaigategahie.” huno humaine.
Poloa Lomu kumate Yisasi kanale mono kea huhaleno hamapai-maine.
17 Poloa tagufa (3) kana maiteno ani kumate mainaya Yuta soka vayayagahe ke higeya melitalu hageno mage huno hamapaiye “Nafunaganagatama nagaya tagaiti nofi vayamogamiene taginagomoya humainaya kavaene alina haviyana ohunoanagi Yelusalemu nofila hunateteya Lomu vaya amayapi natenae. 18-19 Lomu vayamoya kenima haviyana nagaipina nagoa nahaesagena falisua kenia omalegeya natalegahe hayanagi Yuta vayamoya ani kehena ‘Aao huya haya yafe nagoma visua kania omalegena ‘Sisa kaiyekenia havisie.’ huna humainoanagi nagaini nofi vayala kaiyeke humatesua yana omalene. 20 Mani kema tamahapaisuafene huna ke hugetama agena tamahanepauve Isaleli vayamoya amametiti huya agava mainaya kanomofe havina nagupi malenoa yateti nofila hunatenae.” huno humaine. 21 Higeya ani soka vayamoya Polofe mage hae “Nagoa Yutia vayamoya kagaifena avona kaeya tamigeta ohavinone. Nagoa vayatimoya tagaite eya ke hageta nagola havi kavama humainana kea me lahaopainae. 22 Tahaopainagi mukia kotegati vayamoya Yisasina amakua aminaya veamogamifena ‘Havi kava maiya nehae.’ huya hageta ago havimainonagi menia kagaikaa kaguafiti hisana ke havigahune.” huya humainae.
23 “Na kanale havigahune.” huya hapali-maleteya ani kanalela mukia vayayaga Poloma mainea nopi me-litalu hageno Poloa natema aepa heno Anumaya Kotia kava yagai-matesia kea hamanepaino Anumaya Kotima Yisasina hutegeno emainea kanomo kea Mosese kae-malenea kefitiene Anumaya Koti amaune vayamoya kae-malenaya kefitiene amakaila amakua alino hetisigeya Yisasife haviya amakupi maleya amametiti hisayafene huno huge huge nehigeno yagemoa lavi fale-maine. 24 Polo kea nagoa vayamoya haga neya amakupi malenagi nagoa vayamoya amakupina ali omalenae. 25 Alu amaku amakesa haviya mohu mehu huteya ugahe nehageno Poloa mage huno hamapai-maine “Alu Aotage Avamumoa tamage huno Aisaiyana hapaigeno Aisaiyaa, aune kanogino, taginagomogamina mage huno tamage hamapai-maineane.
26 Kagaya mage huka veamogamina mo hamapaiyo ‘Tamakaila tamakesamoa havime havime haigahayanagi ani kemona aepaa havilama hutama ohavigahae. Tamaulagamoa kasagoya yupa ageme ageme haigahayanagi nago yana agelama hutama oagegahae. 27 Mani kemona aepaama havisaya amaku amakesa omale veane mainae. Mani kema ohavisayafene huno amakesamoa ago tile-maine. Amaulagamoa ania huno ‘Oagesae.’ huno ago asu humaine. Mani kea amakesamoa havisigeno amaulagamoa agesigeno amakua aiyahae huya nagaitega esagena ali hilato humateyafene.’ huno higeya.” kae-malenayane.
28-29 “Anumaya Kotia mani kea tamakinagomogamiene tamakayaenefe lamaha-pai-maineanagi tamakaya lamakaveno hutenagi haviho Anumaya Kotia anima lamaku tamamema aligatisia kea Yuta veane omainaya veafe ago humateneanagiya ani veamoya havigahae.” huno humaine.
30 Poloa nago nona miya huteno ani nopi tole kafu maineno agaitegama aya veala kanaleya humatene. 31 Huneamateno Anumaya Koti kava yagaimatesia kea huhaleno hamanepaino Anumayati Yisasi Kalaisi kanale mono kea huge amavelige huno kea hulokiya vaino higeya nagoa veamoya “Na kea ohuo.” huya kahegi oatenae.