1 Fesatusia yagaisia kotega ago evayi huno tagufa (3) kana maiteno Sisaliati Yelusalemu haimaine. 2-3 Haigeya mono note kava vayaene Yuta kava vayaene Polofena “Havi kava humaine.” huya hapaiteya mage hae “Musekaa nehunagi taya huka Polona hutegeno Yelusalemu eno.” huya humainae. Amakaya katega kafo maleneya haesageno falisia amakesaleti humainae. 4-5 Hageno Fesatusia mage huno humaine “Poloa Sisalia nofi nopi mainegena nagaya osi kana kanoa maitena anilega ugahe nehugi tamakaitami kava vayamogatama nagaiene tavi-mainetama agaya havi kavama humainesiana kaiyekea mo hutegahae.” huno humaine.

6 Fesatusia eitia (8) kanao tenia (10) kanafiga Yelusalemua maiteno eteno Sisalia lavino faeteno koma neliana kaiyekema havi nopi umaineno mage hie “Polona avaletama eho.” huno humaine. 7 Kema higeno egeya Yelusalemuti emainaya Yuta vayamoya avaale maigagi maineya “Tusia havi kava humaine.” huya kaiyekea hutayanagi nagoa aepaa tamage huya hu falote huya haopainae. 8 Haopaigeno Poloa mage huno hie “Nagaya nagoa Yuta veamogami kahegi kene ala mono nopienena Lomu ala kava kanoa Sisaene ali-haviyana huoatenoe. Tamage huna nago kanomona havi kavala huoatenoe.” huno humaine.

9 Hianagi Fesatusia masave age aino “Yuta vayamogamina hamaisifa kava hugahue.” huno Polofena mage huno havige-maine “Kagaya kanale Yelusalemu haisanagena anilega haina kaiyekekaa havina fatago hugatesufio?” huno havige-maine.

10 Higeno Poloa mage huno hie “Menima Sisaa kaiyeke nehavia nopi heti-mainesugeka anile kaiyekenia haviteasine huna nehue. Kagaya ago havilinane nagaya Yuta vayapina nago kanomona havi kavala huoatenoe. 11 Nahaesagena falisua kefo kavama humainoleasina kanalelagina faluleasinagi manima hunataya kaiyekemoa tamage huno aepaama omalesigekahena amayapina onateganagi ala kanoa Sisa ayapi natesanageno ani kaiyekea hunatesie huna nehue.” huno humaine. 12 Higeno Fesatusia agaia Kanisole vayaene kea kea huteno mage hie “Sisaa kaiyekea hunatesie huka hanafe Sisatega ugane.” huno humaine.

13 Nagoa kanamoa hano hutegeno ala sauve kanoa Agalipaene asaamoa Peniasiene Fesatusina hu falu fala hutegahe Sisalia evayi humainae. 14 Evayi huteana ayaaya kanagefa mainaageno Fesatusia Polo kaiyekea sauve kanoa Agalipana hanepaino mage huno hie “Filikisima mainea kanafina nago kanoa nofi nopi mainegeno Filikisia anifi ataleno umaine. 15 Umaineanagina Yelusalemu haina mainogeya mono note kava vayaene Yuta kava vayaene agaifena nahapaiya ‘Kaiyekea huteteka hanageke yana amio.’ huya humainae. 16 Hagena mage humainoe ‘Tagaya Lomu vayamogata ma auava kava nehunane. Nago kanomoa kaiyeke hutesia vayala amaule mainesageya kaiyekea hutetesageno anonaamile ‘Kagaya kaiyekema hugataya kea huo.’ huta hagoteta hisunageno hinageta haviteta fatago hugahune huta humainonane.’ huna hamapai-mainoe.

17 Hugeya male melitalu huya mainagena faetena aupaa kaiyeke humate nopi una ‘Polona avaletama eho.’ huna humainoe. 18 Hugeya kaiyekema hutaya vayala hetiya aepa heya agaila kaiyekea hutayanagi ‘Naa kefo kavala humaine.’ huna nagesama havua kefo kavafena ohunae. 19 Ohunagi amakaiami monoamihekeya agaienena ke nevaiya nagola fali-mainea kanoa, Yisasie, kanomofe, Poloa ‘Ani kanoa afaa hetino maine.’ huno higeya ke vai-mainae. 20 Higena ‘Hanaa huna ani kemo aepaa havina fatago hisue?’ huna hutena mage huna havige-mainoe ‘Kanale Yelusalemua haisanagena kaiyekekaa havitena fatago hugatesufio?’ huna havige-mainoe. 21 Havigogeno Poloa ‘Mainesugeno ala kava kanomoa kaiyekenia havisie.’ huno higena ‘Kanalelagi nofi nopi atesugeno mainesigena Sisate hutegahue.’ huna humainoe.” huno hie. 22 Higeno Agalipaa Fesatusife mage huno humaine “Nagaya ani kanomo kea havigahue.” huno higeno “Kanalelagi egamaga kea havigane.” huno humaine.

23 Higeya mo faeteya kotigeya Agalipagani Penaisigania kanale konagali kena faiteana kaiyeke havi nopi vaageya ati vayate kava vayamoyaene ani kumate kava vayamoyaene tokaeya ani nopi hai-mainageno Fesatusia Polofe ke higeya avaleya emainae. 24 Ageno Fesatusia mage huno humaine “Ala Sauve kanomoga, Agalipagaene mukia melitalu humainaya vayaene haviho. Ma ma agaya kanomofe mukia Yuta vayamoya Yelusalemuene ma kumateene maineya tokiyaage kefiti mage huya nahapaiye ‘Mani kanoa kaiyeke huteka haegeno falino.’ huya ala kefiti humainae. 25 Hagena nagayama agoana mani kanomoa nagola falisia kefo kavala ohune huna hugeno Poloa ‘Lomu ala Sauve kanomo kaiyekenia havigahie.’ huno higena ‘Kanalelagika ugane.’ huna humainoe. 26 Huanagi ani kanomoa falisia kefo kavama humainea kemoa omalegena ‘Na keleti kaiyekea huto.’ huna ala Sauve kanomotega autama kaesugeno visia kenia omalegena tamakaite avalena neogi ala kava kanomoga Agalipaga mani kanomo kaiyekea havilama huka havisanagena avona kaena atalesue huna tanakaite avalena neoe. 27 Nagaya havuana nofi kanoa hutesugeno vinagena kaiyekema hutesaya kema kaena oamisuana haviya hugahie huna nehue.” huno humaine.