1 Amataleta tipi kalefi unaamogata Kosi kumate mo faeteta lina takaeta Lotesi uvayi huta mo faeteta lina lakaeta Patala uvayi humainone. 2 Uvayi huta nagola hagelipi kalea agonana Fonisia kotega ugahe nehigeta ani lipi kalefi haisaga humaita umainone. 3 Neuta Saipalusi mogonana haoga laya kaiyaga hanegeta neataleta Silia uta tipi kalemoa afenoyaga atalegahe higeta Taiya limo agegayalega lavi-mainone. 4 Anile tatalegeta Yisasife haviya amakupi malenaya anagafe momatiyeta ali falote huteta amakaiene sevenia (7) kana mainonageno Alu Aotage Avamumoa hamapaigeya haviteya Polofena “Yelusalemua ovuo.” huya hapai-mainae. 5 Hapaitageta amakaienema mauna kanamoa hanoma nehiana katega ugahe nehunageya mukiamoya aneamiene nafaneamiene tavaleya kumala ataleya vageta ti agegayalega hanea kahaepate mo latalegahe hageta taleya moyeta nunamu humainone. 6 Nunamuna huteta hufalu fala humateta “Maiho.” humateteta tipi kalefi haisaga humaunageya eteya noamilega emainae.

7 Taili kumala ataleta Tolemesi uvayi huta Yisasife haviya amakupi malenaya anagala hu falu fala huneamateta amakaienena nagoke kana kanoa mainone. 8 Maita faeteta amataleta Sisalia uvayi huta Filipi nopi umainone. Ani Filipie kanomoa Yisasi ke hamanepaiya kanogino Yelusalemu kave amamite amamite hisaya yafe hapaliya humatenaya sevenia (7) vayapiti kanogita ani kanoene umainone. 9 Umainonageno ani kanomoa foa (4) vele omainaya munanea mainayanagino Anumaya Kotia avayafiti hamapaiya kea huya amaune laga nehaya munaneyaga mainae. 10 Mainageta lagaya anile tole lagufa kana mainonageno nagola Anumaya Koti aune kanoa Agapusie nehaya kanoa Yutiati elavi-vayi humaine. 11 Takaite evayi huno Polo amunofila melino agaia aiya ayate kisalu negino mage huno hie “Alu Aotage Avamumoa mage huno nahapaiye ‘Yelusalemu mainaya Yuta vayamoya ma kava huya mani amunofimona nefana aiya ayate kisalu kiteya vayamoya haesageno falisiafe Yuta veane omainaya vayamogami amayapi ategahae.’ huno hikena havitena mani kavala me nehue.” huno humaine. 12 Higeta anima hia kea haviteta tagaiene ani kumate veanene mage huta hapaune “Pologa museka nehunagi Yelusalemua ohaiyo.” huta hutenone. 13 Nehunana Poloa mage huno humaine “Naa higetama avia neatetama nagu nagesa ali haviya nehae? Nagaya Anumayanimona Yisasi nagua amitafa humainoafe nagaya nagesa talo tala huna Yelusalemu haisugeya natafa huya nofipi nateteya nahaesagenama falisuana kanalele huna nehue.” huno humaine. 14 Higeta haviteta kenonaa haopaita mage huta humainone “Anumayatimoa havimaineanagino haisia kavala hisie.” huta humainone.

15 Ani kea huteta lagaya ali lalo tala nehuta Yelusalemu haimainone. 16 Haunana nagoa Sisalia lafu-taganaya tagaiene haigeta Yelusalemua hai vayi hunageya nagola Saipalusi kanomo agia Nasonie agai notega tavaleya vageta umainone. Nasonia nayona Yisasi anagapi maineane.

17 Yelusalemua hai vayi hunageya tafu-taganaya tusi muse huya ali falu fala hulateya lavale-mainae. 18 Lavaleya vageta mo faeteta Poloa tagaiene Yemesi agegahe neunageya mukia soka vayayaga anile emainae. 19 Ageno Poloa “Mainafio.” huno hu falu fala huneamateno Anumaya Kotima aya higeno Yuta vea omainaya veamogami amunopi ali-mainea aliyafe hamapailama huno hamapaiye.

20 Poloma hia kea haviteya Anumaya Koti agia alisaga huya Polofe mage huya hae “Kasagoya tausenia veamoya Yisasife haviya amakupi maleya amametiti nehaya Yuta veapiti Yelusalemu mainaya veamoya Mosese kahegi kema akave malesaya amaku amakesa humainae. 21 Nehuya kagayama mukia Yuta vea omainaya veapi mainaya Yuta vayamogamife ‘Mosese kahegi kea neataletama nafanetamimogami amakoya anoya laga ohutama nayoma Yuta vayamoya mainaya auava yana atale ho.’ huka humainana kehena hamapaigeya ago havimainae. 22 Havimainagi kagayama evayi humainana kema havinuya hisageta na kava hugahune? 23 Nago yafe kahapaigahe hunagi kahapaisuna kavala akave huo. Foa (4) vayala Anumaya Koti aulagafina hulokiya vaiya kea humalenaya vayala manile mainae. 24 Mainayanagika mukia vayamoya kagaifema agoma havimainaya kehema ‘Havige nehae.’ huya hisayafena kagaife ‘Anumaya Koti kahegi kemo akave nemale.’ huya hu-gatesayafena ani foa (4) vayala amavaleka amakaienena Anumaya Koti aulagafina oniyaage yama omalesia kavala huka kagaikaa monea miya hisanageya amayolagefa laga humatesae. 25 Yuta vea omainaya veama Yisasife haviya amakupi maleya amametiti nehaya veamogamife tagaya nayona avona kaeta huhaya gi-malenona kea mage huta humainone ‘Fali-mainaya veafe amakisana vaiya atupa kave alisaga huya malesaya kavela oneho. Kolamoa agusafinaga hanesia afuene kolaenena oneho. Ane munane amavayu nehisaya yana ataleho.’ huta ago avona kaeta hamapai-mainone.” huya humainae. 26 Hageno Poloa faeteno ani foa (4) vayala amavaleteya amaugafaene amakuaene sese nehaya kava huteya ala mono nopi haigeno Poloa mono nopi mainaya kava vayafe mage huno humaine “Laugafaene taguaene Anumaya Koti aulagafina oniyaage otahaisia kava huta sese huteta maineta ma yupa eta tahaote tahaote Anumaya Kotina sipi sipia heta amigahune.” huno humaine.

27 Ani sevenia (7) kanamoa hano hugahe nehigeya nagoa Esiati Yuta vayala elaviyaamoya Poloa ala mono nopi mainegeya megeteya mukia alitalu humainaya veamogami amaipa ali haviya huya ali hetimateteya Polona atafa humainae. 28 Atafa huteya mage hae “Isaleli vayamogata laya hiho. Ma kanomoa mukia kumate vayamogamina mage huno humave-nelie ‘Isaleli vayaene Mosese kahegi kene mono noamiene afa yayaga hane.’ huno nehuno nagoa Yuta vea omainaya vayala Kaliki kotegati vayala ma ma nagalu humalenea nopina amavaleno egeya mani nona ali haviya nehageno oniyaage nehie.” huya humainae. 29 Naafene nago yupa Poloa Talofimusiene ala kumapi vaiyateti nehaageya age-mainayanagiya Talofimusia Efesusiti kano maineanagiya amakesafinaga havige nehuya “Poloa ani Yuta vea omainea kanoa tagaila ala mono notifi avaleno haimaine.” huya havige humainae. 30 Hageya mukia ani kumate veamoya ani kema haviya kemoa amaipa ali hetigeya amaiyayeya molitalu huteya Polona atafa huya mono nopinagatila avayu vaye nehageya ani mono nomo fitayaga mukia aliya kimainae.

31 Polona ago maiya nehayageno Lomu ati vayate kava kanomoa mukia Yelusalemu veamoya ke vaiya tusia lu maiya nehae huya haya kea havimaine. 32 Haviteno ati kava vayaaene ati vayayagaene amavalegeya amaiyayeya amakaite elaviya ageya ani vayamoya ala kava kanoene ati vayaaene ageya ageteya Polona nagoene ohaeya ataleya mainae. 33 Ataleya mainageno ati vayate kava kanomoa Polona metafa huno “Tole seni nofiteti aiya ayate kisalu kiho.” huno nehuno alitalu humainaya vayafe mage huno hamavige “Mani kanoa tae? Hana augafa havi kava higetama ani kavala nehae?” huno hamavige-maine. 34 Hamavigegeya nagoa vayamoya nagoa kea nehageya nagoa vayamoya alu kea nehageya maiya tusia keyeso haya kemona aepaa havilama ohuno ati vayamogamife mage hie “Lagaiti lokiyaage nopinaga avaletama viho.” huno humaine. 35-36 Higeya mukia veamoya amakave keyeso hume hume neuya mage hae “Haesageno falisie.” huya hume hume nevageya ani nomo fiate avaleya vageya mukia vayamoya tusiya huya tu hisaya kava hayakehe ati vayamoya Polona avalesaga huya anale avaleliya umainae.

37 Ati vayamoya tokiyaage nopinaga avaleya haigahe nehageno Poloa ati vayate kava kanomofe mage huno humaine “Nago kea kahapaigahe nehuana kanalepio?” huno havigegeno ati vayate kava kanomoa mage hie “Kagaya Kaliki kea havilinano? 38 Kagaya Isipiti kanogika mukia vayafena ‘Kamani vayaene tu hugahune.’ huka huteka tu huge huge nehaya vayala fo tausenia (4,000) vayala kame kotega amavaleka umainana kano mainane huna nagesa nehavugi kagaya ani kano mainapio?” huno havige. 39 Higeno Poloa mage huno humaine “Nagaya Yuta kano mainoe. Silisia kotega agi hanea kumala Tasusie kuma aepania hane. Museka nehugi nagaya alitalu humainaya veamogamina nago kea hamapaisufio?” huno havige-maine. 40 Havigegeno “Kanalelagi hamapaiyo.” huno higeno Poloa ani nomo fiate heti-maineno kema aepa hegahena “Afaa maiho.” huno ayana alisaga higeya alitalu humainaya vayamoya kea ohuya mainageno Poloa amakaiami kea Hipalu kefiti Yuta vayamogamina hamapai-maine.