1 Nago kanoa Koniliasie ati kava kanoa Sisalia maineno Itali kumateti vani hataletia (100) ati vayate kava yagai-maineane. 2 Ani kanoene anagaaene Anumaya Koti kema nehaviya nemaiya yafe “Agayama haiya kava hugahune.” huteya afenoamima omalenea veala monea amamite amamite nehuya mukia kanafina nunamuna huya muse huya havinegayane. 3-4 Nago unena ani kanomoa heti-maineno himona kana yana ageana nagola Anumaya Koti ensole kanomoa agaite evayi huno mage huno humaine “Koniliasigae mainapio?” huno higeno Koniliasia aulu neheno tusia amayo neaino mage huno hie “Ala kanomogae naa higeka nehane?” huno higeno ensole kanomoa mage huno hie “Kagayama Anumayamotega havinegana yaene afenoamima omalenea veala hamamaeka amamite amamite hana yaene Anumaya Kotia ageteno kagaifena agesa nehavie. 5 Kagaya menia nagoa vayala humategeya Yopa kumateti Saimoni Pitana movaleya eho. 6 Ani kanomoa nago pulamakamo augafa laga huno talo nehia kanoene nemaiye. Ani kanomo agia Saimonie. Nomaa hagelimo agegayalega hane.” huno hapaiye.

7-8 Ani kea hapaiteno ataleno vigeno Koniliasia tole aliya kanolatamaaene nagola Anumaya Koti kema nehavia ati kanoamoenefe ke higeya ageno ani ensole kanomoma evayi huno humainea kea hamapaiteno humategeya Yopa umainae.

9 Katega mo-faeteya kotigeya hetiya Yopa evayi hugahe hageno yagemoa amuno-kano higeno Pitaa nunamu hugahe nomona amega agotofulega haino maine. 10 Mainegeno tusia agateanagi kavela yaufa talo tala nehageno nagola himona kana yana age-maine. 11 Ageana ikamoa aihagalo higeno nagola tusia kena kana yana aluga aluga atupale nofi aye-maleteya atalageno mopafi enelavigeno age-maine. 12 Ageana ani yapina mukia yaka kafa afua osifavea nama vayupala yagaene mainageno elavi-maine. 13 Elavigeno Pitaa neagegeno nagola age aino mage huno hapaiye “Pitagae hetika ani memeyana heka no.” huno hie. 14 Higeno Pitaa mage huno hapaiye “Aao, Alanimogae ma ma yaga kafa kagai kaufina oniyaage humainegena nagaluma humalenana yamofe tamage huna onenoa yayaga hane.” huno humaine. 15 Higeno nagoene agea aino mage huno humaine “Anumaya Kotia ago alino sese humalenea yafena ‘Oniyaagela ohunegi afaa alika no.’ huno humainea kavefena nagoene ‘Oniyaage humaineanagina onegahue.’ huka ohuo.” 16 Ani kavala talia (3) yupa huteno aupaa ani kenamoa ikapinaga eteno haimaine.

17 Haigeno Pitaa maineno anima agea himonamo aepaahe agesa havige havige huno nehavigeya Koniliasima humategeya aya vayamoya Saimoni nofe hamavige hamavige hume hume uya ani nona ageteya fiate mehetiya mainae. 18 Hetiya maineya ke huya mage huya hae “Saimonia nago agia Pitae kanoa mani nopina mainefi omaiye?” huya hae. 19 Hageno Pitaa himonahe agesa havige havige huno mainegeno Avamumoa mage huno hapaiye “Havio talia (3) vayamoya kagaife megatineayae. 20 Mekatineayagi hetika afepinaga lavika mogo. Nagaya humatogeya emainagi tole kagesa ohavika afaa amakaienena vuo.” huno humaine.

21 Higeno Pitaa tavino mage huno hamapaiye “Atimaayaya kanoa nagayae. Naa higetama neae?” huno hama-vige. 22 Hamavigegeya mage huya hae “Nago kanoa Koniliasie ati vayate kava kanogino fatago kano maineanagino ‘Anumaya Kotina haiya kava hugahue.’ huno humainea kanomoa hulategeta neonageno ani kanomoa Yuta vea omainea kano maineanagi Yuta veamoya ‘Kanale kano maine.’ huya hageno nemaiyane. Nago yupa nagola alu aotage ensole kanomoa evayi huno mage huno hapaiye ‘Saimoni Pitafe ke hugeno kagai nopina eno nagola kea kahapaisigeka havigane.’ huno higeno hulategeta neone” huya hapai-mainae. 23 Hageno Pitaa kenonaamia mage huno hie “Nopi ehaitama emaiho.” huno higeya haiya mo faeteya kotigeno Pitaa hetino amakaiene vigeya nagoa Yopa kumateti Yisasife haviya amakupi malenaya vayamoya amakaiene tokaeya umainae.

24 Katega nagoke no mo faeteya ega Sisalia kumate evayi hageno Koniliasia esayafene huno amakava maineno agaia nofi vayaene anagaamoyaenefe ke higeya melitalu huya mainae. 25 Mainageno Pitaa ani nopi hai-falegeno Koniliasia avate eno aiyafi ape humaineno muse hutene. 26 Musena hutetegeno Pitaa ali hetiteteno mage huno hie “Hetio nagaienena afa kano mainoe.” huno hie. 27 Pitaa mani kea nehuno Koniliasiene kea kea hume nopinaga haino mogeana kasagoya veane melitalu huya mainae.

28-29 Mainageno Pitaa mage huno hie tamakaitamia ago havimainae Yuta veamoya Isaleli vea omainaya veanene maineya kea kea huyafena ago nagalu humalenaya kea ago havimainae. Anumaya Kotia nagaila navelino mage hie “Nago kanohena ‘Oniyaage kano mainane.’ huka ohuo.” huno naveligena agetena nagaifema ke hanagena tole nagesa ohavina aupaa emainogi naa higeka nagaifena kea hanagena emainoe? huno havige.

30 Havigegeno Koniliasia mage huno hapaiye “Talia (3) kana ago euno nagasegena une kanalega tali (3) kiloki noniafi mainena Anumayamotega nunamu huna havinegogeno aupaa nago kanomona kenaamoa efeage nehuno alave alave nehigeno naule mehetigena agoe. 31 Agogeno ani kanomoa nagaifena mage huno nahapaiye ‘Anumaya Kotia haavigana kea ago haviteno kagayama afenoamima omalenea veala hamamaeka amamite amamite hana yana ageteno kagaifena agesa nehavie. 32 Nehaviafe kagaya Saimoni Pitatega vayala humatesanageya Yopa visae. Ani kanomona hamoamoa Saimonie pulamakamo augafa taga huno talo nehia kanomo nona hageli agegayale hanegeno yoka unemaiye.’ huno humaine. 33 Higena nagaya aupaa kagaitega vayala alimatalogeya vageka kanaleya huka emainanageta Anumayamoa ‘Hamapaiyo.’ hunoma kahapai-mainea kea havigahune huta Anumaya Koti aulagafi melitalu humainone.” huno humaine.

34-35 Pitaa hetino aepa heno mage huno hie “Tamage, havuana Anumaya Kotia vayamo agiahepi nofiahepi agesa havino notamianagi mukia nofi vayayagafitila nagoa veamoya Anumaya Kotina amakua amiteya ‘Agaila haiya kavala kanale kava humainaya veamoya Anumaya Kotia ani veafe nahaiya veane mainae.’ huno hie.” 36 Huteno Anumaya Kotia Yisasi Kalaisina hutegeno kanale kea huno Anumaya Kotiene alino nagoke taipa falu huta maisuna kea Isaleli veamogatina tahapaiya kea havimainae. Ani Yisasi Kalaisia mukia veamogatina Anumayatimo maine. 37 Yonia “Kefo yatamihena tamakua aiyahae hisagena tina falelamategahue.” huno hamapaitegeno Yisasia Kaliliti aepa heno mukia Yutia kotega kema humainea kavafena tamakaya ago havimainae. 38 Anumaya Kotina Alu Aotage Avamuamoene tokiyaaene Nasaleti Yisasina amigeno Anumaya Kotia agaiaene tokaeno maineafene huno alu kumate kumate ute ete hiaamo kanale kava huno Satanima amatafa higeya kalima ali-mainaya veamogamina alino kanale humatene. 39 Kanale humategeta tagaya mukia Yuta veama mainalegaene Yelusalemuene humainea kavala taulagafiti age-mainona ke tamahanepaune. Ani kava higeya yafaga yosale asaimalageno fali-maine. 40 Falianagi tole yupa maiteno nago kanalela Anumaya Kotia fali-mainefiti alino hetitegeno veamogati taule mo laveli-maine. 41 Mo lavelianagi mukia veamoya agaila oagenagi tagaya veama hamapaisunafene huno Anumaya Kotia tagaila ago hapalilategeta mainonafe tagaya fali-mainefiti ali hetitenea kanafina Yisasiene tokaeta maineta tiene kaveene nemainone. 42 Nemainonanagino Yisasia veamogamina mage hutama hamapaiho huno humaine “Nagaya fali-mainesaya veanene afaa mainesaya veanene kaiyeke humatesuafene huno Anumaya Kotia Yisasinia hunategena emainoe.” hutama hamapaiho. huno humaine. 43 Yisasifena mukia Anumaya Koti amaune vayamoya mage huya humainayane “Mukia veamoya agaife haviya amakupi maleya amametiti hisageno agaia agileti kefo yaamia aigeamateno alitalemategahie. huya humainayane.” huno hie.

44 Pitaa mani kea yaufa hamanepaigeno Alu Aotage Avamumoa elavino mukia mani kema maiya nehaviya veamogami amakupina efalemaine. 45-46 Amakupi efalegeya amaku amakesafiti nohaviya kea alu ke alu kefiti Anumaya Koti agia alisaga nehae. Ani kavama haya yafe Pitaene emainaya veamoya Yisasi kema havimainaya Isaleli veamoya haviteya Anumaya Kotia ago alu veamogamina Alu Aotage Avamuama amamia yafena tusia amamayo aigeno Pitaa mage huno humaine. 47 “Anumaya Kotia tagaila Alu Aotage Avamuamona taminea kava huno mani veanene ago amamine. Tima falematesuna kaana ta nagalua hulategahie? Tina afaa falemategahune.” huno humaine. 48 Huteno amakaife mage hie “Yisasi Kalaisi agile tina falelamatesue.” huno hamapaiteno tina falematetegeya mage huya hapaiye “Tagaiene nagoa kana tagaya maigane.” huya humainae.