1 Nago yupa une kanalega tali (3) kiloki Pitaene Yoniene nunamu hisaya kanamoa aupa higeana ala mono notega umainae. 2 Nevaageya vayamoya nagola kali kanoa, atenelegati aiyamoa haviya humainea kanoa, avaleya emainae. Mukia kanafina anima aiyama haviya humainea kanomoa ala mono nomo fiate mopale nemaiyane. Ani fiamo agia koganali fiane huya agia neayaya fiate maineno ala mono nopima vaya veafena “Monea namiho.” huno ayana haya hulineno aukaya nehia kanoe. 3 Ani kanomoa ageana Pitaene Yoniene ala mono nopi haigahe nehaageno “Monea namitetanao.” huno aukaya hunatene. 4 Hunategeana Pitaene Yoniene tokiyaage aulu hemaineana Pitaa mage hie “Taagaila taago.” huno humaine. 5-7 Higeno ani kanomoa “Nago ya namigahe nehae.” huno anakaila anakeke huno anake-mainegeno Pitaa mage huno hie “Monenia omalegi nagaipima hanea yana kamigahue Nasaleti Yisasi Kalaisi agile kahanepauve hetika ute ete huo.” huno nehuno tamaga ayate alino hetitegeno aupaa aiyamoene aleyamoene kanale hutegeno tokiya hau-maine. 8 Tokiyaage hautegeno hetino ute ete nehuno anakaiene ala mono nopinaga nehaino haite asaga hulavite nehuno Anumaya Koti agia alisaga hume hume nehaiye. 9-10 Anumaya Koti agia alisaga huno haigeya mukia veamoya agayana higeya “Vae mani kanoa mukia yupa ala mono nomona koganali fiate maineno aukaya nehia kanogi.” huya nehuya alino kanalema hutenea yafena tusia amamayo aimainae.

11 Veamoya amamayo neaigeno ani kanomoa Pitaene Yoniene anatafa huno ananukigeya mukia veamoya ala mono nomo haupale yasi alisia ya ayekalo humalenea nomo, agia Solomoni none huya nehaya yate, amakaitega umainae. 12 Vageno Pitaa ageteno mage huno humaine “Isaleli kumate vayamogatama naa higetama atali talua nehae? Taagaya taagaitia tokiyaletiene fatago humainoa auava yatetiene ani kanoa alitaa kanale hutoageno ute ete nehie hutama taagaila taageneasagalifi? 13 Aao. Taginagomogami Anumaya Kotia, Apalahamuene Aisakiene Yekopuene Anumaya Kotiamimoa, agaia aliya kanoamona, Yisasi, tokiya hale ya amigahe ani kanomona alino kanale hutenegi tamakaya ani Yisasina avaletama kame vayamogami amayapi atageno Pailatia Yisasife ‘Afaa atalegahue.’ huno nehiana tamakaya Pailati aulagafi ‘Tagai kava kanoa omaigi agaya falisie.’ hutama tamakaveno hutenae. 14-15 Alu aotage kanoa fatago kavaage nehia kanomona tamakaveno huneatetama vayama hamaeno fali neamatea kanohe ‘Atalegeno eno.’ hutetama mukia veamogami hamaimumona aepaa mainea kanomona hayageno falianagi Anumaya Kotia fali-mainefiti alino hetitegetaa ago agetetaa mani kea tamahanepaue. 16 ‘Yisasia kanale hulaatesia tokiya hane.’ hutaa taagupi malenoa yafe manima neagaya kanomona ago kanale hutetegeno aiyamoa tokiya vaimaine. ‘Yisasia kanale hutesia tokiyaa hane.’ hutaa taagupi malenoa yateti tamakai tamaulagafi ago kanale hutegeno kanale huno maine. 17 Tamage nenafugatama nagaya havuana tamakai kava vayatamimoyaene Yisasima emainea aepaaene havilama ohunetama Yisasina hae-mainae. 18 Hae-mainaya yafe Anumaya Koti aune vayamogami amavayafitima humainaya kea mage humainayane ‘Nagaya tamaugafa aligatigahe hutenoa kanomoa tusia agataya aliteno faligahie.’ huya humainaya kemoa efalote huno tamage humaine. 19 Ani yafe kefo yatamia neataletama tamakua aiyahae hisageno Anumaya Kotia kefo yatamia aye hami-talegahie. 20 Aye hamiteno agaialegati kanalema humatesia yana nelamamino Yisasina tamakaifema tamaugafa aligatigahie huno hutenea kanoa eteno tamakaitega hutenageno egahie. 21 Hutegahianagi meni kanafina Yisasia ikapinaga maineno Anumaya Kotima mukia yana eteno haegafa yamaage talo hisia yafe agava-maine. Mukia Anumaya Kotima nayoma mainaya amaune vayamoya humainaya kemoa efalote huno tamage humaineafe Yisasia eteno egahie. 22 Mosesea mage huno kaemaleneane ‘Anumaya Kotia tamakaipiti nagola aune laga hisia kanoa nagayama huaya huno hisia kanoa ali hetitegahie. Hetitetenagenoma agayama hisia kea haviho. 23 Ani aune kanomo kema ohavisaya veamogamina Anumaya Kotia hamaeno fali hano hinageya Isaleli veapina omaigahae.’ huno humaineane. 24 Mukia Anumaya Koti amaune vayamoya Samueliene agai akavelegatima falote humainaya amaune vayayagaene menima mainona kanahe haviya kae-malenayane. 25 Tamakaya Anumaya Koti amaune laga nehaya vayamogami amakinagomogatama mainae. Anumaya Kotima Apalahamufe hulokiya vaino alino hagelafi lamatenea kea huno tamakaienefe mani kea humaine. Anima hulokiya vaimalenea kemoa mage huno humaineane ‘Nago tamakinagomoa esiana mukia ma mopafi veamogamina kanale manua amamigahie.’ huno humaineane. 26 Mukia manima humainaya kemoa falote huno tamage hisia yafe Anumaya Kotia agaia aliya nafaneamona alino hetitegetama tamakaya kefo yatamihe tamakua aiyahae hisageno tamaya huno kanale manua tamamisia yafe hagoteno tamakaitela hutegeno emaine.” Pitaa mage huno humaine.