1 Ako hutama natalenetama mani kea haviho. Afaa osia aifo ke kana ke hugahugi ako hutama maiya avamete nagoene maiho. 2 Anumayamoa tamakaifema agesa nehavia avamete huna havi kapi ovisaya yafe nagesa kumoa tusiya huno nehie. Nagi nagola hage-malenea munala alu vemoa avayu hia yafe amona nefaa tusia agaye nehia avamete huna nagaya Kalaisina alu aotage veanea maisae huna kava yagainelamatoe. 3 Osifavemoa savalema huno Ivina ayevataga humainea avamete huya nagoa vayamoya ayelama-vatagama hisagetamahena tamakesa ali fatago hutama Kalaisi akavema nevaletila agai katela neataletama tole lamakesa havitama Kalaisina tamakavenoma hutesaya yafena nagaila tusiya huno nagesa kumoa nehie. 4 Yisasifena ago tamahapai-mainoa kea nagoa vayamoya nohagi Yisasifena havigea alu kema me lamahanepaiyana tamakaya “Tamage nehae.” hutama aupaa amakave nemalae. Nemalayanagi tagaya “Alu Aotage Avamula tamakupi emaigahie.” huta nehunanagi amakaya haya kemoa mage hae “Alu kanomo avamula tamakupi emaine.” huya hagetama aupaa muse nehutama tusia havi kava nehae.

5 Anima havige huya ayemavataga haya vayamoya tamage huya nagaila onagasenae. 6 Aupa aupa kema hisua tokiyania omalegi aluya huna nagu nagesaene kano mainena mukia kanafina kanale kava huna mukia yana mukia veamogami amaufina kea huhalena nehugetama nehaviye.

7 Anumaya Koti kanale mono kema tamahapauvana “Nagoa monea namiho.” huna ohunoe. Tamavalesaga hisugetama tamakaya anale maisaya yafe nagainia ako huna mai kayone huna nayapiti aliyana ali-mainoe. Aniama huana kefo ya humaino? 8 Tamakai tamaya huna mono aliyana nealugeya alu kumate maineya Yisasina amakua aminaya veamoya nagaila naya huya monea naminae. Namigena ani monea alina musufayama nehia kanomo nehia auava kavala humaino? 9 Tamakaipina aliyama aluana nagoa yaniama omalegena “Monea namiho.” huna tamahaviokenogi Masetoniati aya vayamoya mukia yana naminae. Hagotenama havimainoa nagesa haenagaa ania huna tamakaifena “Monea namiho.” huna ohugahue. 10 Kalaisi kelamage kemoa nagupima haneafene huna tamagea nehue. Monema oalina afa aliyama nealua yafena tusia muse nehuafe nagola Akaiya kotega mainaya veamoya ani musema nehua yamoa kania tileonategahae. 11 Naa higena ani kavala nehue? Miya oalua yafe tamakaifena nonahaiyo? Aao tamakaifena nahau nayamopafima nenahaiya yana Anumaya Kotia ago age-maine.

12 Havigema tamahanepaiya vayamoya amakima aliya haigahena “Poloma nehia kava nehune.” huya hu-mainesaya kea ohavisaya yafe nagaya humainoa kavala huge huge huna tamakaipitila monea oaligahue. 13 Ani vayamoya havigegeya nehageya veamoya “Kalaisi Aposolo vaya mainae.” huya hulatesayafene huya Aposolo vaya kana nehuya veala ayemavataga nehae. 14 Naama hayana amakaiami-omagi Satania agaia hale yapima nemaiya ensole vaya kana huno ali hapaeteno veamogamina ayemavataga nehie. 15 Satani ani kavala nehigeya agaia aliya vayamoya ania huya fatago yamo aliya vaya kana huya aliya hapaesayana tamakaya atalia ohiho. Haenagaa ani kavama nehaya yamona kefo miyana anonaamia aligahae.

16 Nagoene tamahanepauve nagima alina hauva yafena nagoa veamogatama nagaifena “Agaya aifo kano maine.” hutama ohiho. Ani kema hinutamahena natalegena osi kanoa afaa nagima alina haisua kea haviho. 17 Ani nagima alina haisua kea Anumayamoa “Mage huka huo.” huno ohunea kea nagainia anegi nena aifo vaya kana huna mani kea nehue. 18 Mukia ma mopafi veamoya havigu kema nehuya amakaiami amakima alisaga nehaya kava huna nagaini nagia alisaga huna mani kea tamahapaigahue. 19 Tamakaila kelamama-kina mage huna nehue tamakaya kanale havi haviyatamima hanea veamogatama naa higetama aifonafo vayamogami kea nehaviye? 20 Ani vayamoya “Tagai aliya vaya maiho.” huya hagetama amakavela nemalae. Tamakaipitila monea nealiya tamakaila aliya haviya hu nelamateya amakaiami amaugafa aliya nehaiya tamakaifena “Afa vaya mainae.” huya haya kehena kea ohutama amatalageya ani kavala maiya nehae.

21 Ani kavama haya kavala nagaya naa nohuafe havi kava nehuo? Nagaifena “Tokiyaa omale.” hutama nehao? Ani kema haya yafena nagayea nehugi nagoa vayamoya amakaiami amaki alisaga hisaya kea nehayanagi nagayaenena ania augafa kea huna aifo vaya kana huna mani kea hugahue. 22 Ani vayala Hipalu vayama maisayana nagayaenena ania huna Hipalu kano mainoe. Amakaya Isaleli veamogami mono kema havisayana nagayaenena ania huna Isaleli veamogami mono kea nehavue. Amakaya Apalahamu aginagomoya mainesayana nagayaenena ania huna Apalahamu aginagomona mainoe. 23 Amakaya Kalaisina aliya vayaama mainesayana nagaya amakaila amakasena tusiya huna Kalaisi aliyana nealue. Avonio nagima alisaga hua kea aifo ke kana ke nehue. Amakasena nagaya tusiya huna Anumayamo aliyana nealue. Amakasena kasagoya kanafina kina nopina mainoane. Kasagoya kanafina kayo kevea naminayanagi amakaila osia amaminae. Nagaya kasagoya kanafi falisua kavala huanagi amakaya nagayama hua kavala ania huya ohunae. 24 Yuta vayamoya faefua (5) kanafi alu ikate alu ikate teti naenia (39) haifula naminae. 25 Tagufa (3) kanafi kayo kevea naminae. Nago kanafi yafa kayotetila nahae-mainae. Tagufa (3) kanafi tipi kalefina mainogeno timoa ai kalato kalato huno nahaesia kavala humaine. Ani tipi kalemoa kofa-nafa huno haviya higena nago yosa atupale atafa hulina nago kanaene kegeene felugaene tipina mainoane. 26 Mukia kanafina vaiyatete nehugeno nahaesia kavakeya falote hunatene. Timoa hogino nahaesia kavaene musufaya nehaya vayamoya nahaesaya kavaene nagai anagamoya, Yuta vayaene, Yuta vea omainaya vayaene nahaesaya kavakeyana hunatenae. Ala kumate mainogeyaene kame kotega mainogeyaenena ali haviyana hunatenae. Tipi kalefima umainoana nahae-mainae. “Negafugata mainone.” huya havige nehaya vayamoyaene nahaegahena humainae. 27 Tusia aliyama aluana nafia nelegena kasagoya kanafina naula ofaena nagala neleno tifeenena nage-maine. Kasagoya kanafina kavefeene kenanienefena omalegeno yasimoa nahaigena havi no mainoe. 28 Amega naugafamo kana yaene mukia kanafina Yisasife haviya elitaluma nehaya veamogamina kava yagaisua yafena nagesa havi havi nehugeno nagesa kumoa nehie. 29 Ani veapina nagoa veamogamina hamao otage fatage higena amakaifena nahauna humatenoe. Nagoa veamoya veamogamifena “Kefo yana hiho” huya hageya Anumayamo katela neataleya kefo yama hagena naipamoa ata lemaine.

30 Nagia alina haisua nagesama havisugenoa nago yafena fulu fulu kano mainoa yafe tamave-ligahue. 31 Anumayatia, Yisasina Nefaa, Anumaya Kotina, vayamoya agola agai agia alisaga huge huge hisaya kanomo aufina nagaya havigea huna nohue. 32-33 Nagaya Tamasigasi kumate mainogeno sauve kanomo agia Aletasae kava kanoamona hutegeno natafa hisaya yafe “Katela yagaiho.” huno higeya yagaiya maiyanagi vayanimoya kupi nasaga huya nateya ani kumamona tokiyaage kegiya akalogapiti nofi aliya ayeteya ali kaleyo nehagena falena ayenefe huna umainoe.