1 Tamakaitega etenama esuana kelamama-kisugetama tamaipa haviya huyafene huna nagoene ougahue huna humainoe. 2 Nagaya hisua kemo tamaipa ali haviya hisigeya taya nagaila muse yania namigahae? Tamakai tamaipa haviya hisia yama tamamisua veamogatamage muse yana namisaya veanea mainae. 3 Tamakaitegama visua yupa kea otamama-kisuafe mani avona ago kaena tamaminoe. Tamakaya muse yama namisaya veane mainagi havigu kelamama-kisua yamo tamaipa haviya hisigeno naipamoene haviya hu yafene huna aupaa omenoe. Tamahapai-mainoa kefo yana ago ali fatago hugahae huna nagaya musema hisua yana ailokaeta nagopi musena hugahune huna nehue. 4 Tusiya huna tamakaifena nagesa nehavugeno naipamoa kanaage nehigena avi neatena ani avona ago kaena tamaminoe. Tamaipa haviya hisie huna okaenogi “Tagaifena aluya huno haigeno mani avona lamie.” hutama hisayafene huna ani avona ago kaena lamaminoe.

5 Tokaetama mainaya vayapiti nago kanomoma kefo yama hia yafe naipa havina haviyama huana nagainigelomagi tamakaiene mukiamogatamina tamaipamoa tusiya huno haviya nehie. Haviya nehianagi ani yafena mukia kea ohisua nagesa nehie. 6 Tamaipamoa haviya higetama ani kanomona “Kefo ya nehane.” hutama havi anonaa hu neatayafe ani kefo yamo anonaa ago alimaine. 7 Ali-maineafe aigeatetama kefo yamaa ataletetama aipa alitama kanale huteho. Havigu agaye yamo kana ya amisigi kanale kava huteho. 8 Alitama kanale hu neatetama “Kagaifena aluya huno nelahaiye.” hutama huteho huna tokiyaage ke nehue. 9 “Kanaleya hutama mukia kenia havitama akave nemalao ifi nomalao?” huna nagaya tamakaila avame hulamatena ani avona ago kaena lamaminoe. 10 Nago kanomona aigeatetama kefo yamaama ataletesayana nagaya ania huna ani kanomona aigeatena kefo yamaa ataleneatoe. Nago kanomona aigeatenama kefo yamaa ataletoana tamakaifene huna Kalaisi aufina ania humainoe. 11 Naa ohisugenoa Satania ayelavataga huno tatafa hugahie. Agaia havige huno ayelavataga hisia yafena ago havilinone.

12 Kalaisifena kanale mono kema huhalena hugahema Taloasi kumate uvayima hugenoa Anumayamoa anile mainaya veamogamina amakua alino aikalo higena kanaleya huna ani kea huhalena humainoe. 13 Huhalena huanagi nenafua Taitasia omaigena agaife nagesa kumo higena amatalena atiyegahe Masetonia umainoe.

14 Kalaisia Satani ayapitila tavalegeta agaiene ailokaeta mainonanagita mukia kefo yana agaseta mainona yafe Anumaya Kotife muse huta agia alisaga hisune. Agaya tagaila laya higeta alule alule vaiyeta Yisasi kema nehuna yafena ani kemona havilama hageno kanale manaage yamo hia kava huno ute ete nehie. 15 Higeta lagaya Yisasi kema nehuna veamogata Kalaisiene ailokaeta mainonafe kanale manaage yamo hia avamete hunageno Anumaya Kotia muse nehie. Ani manaamoa ute ete huno mukia veapi vigeya ani manaage kea nehavigeno amaku amamema alinegatia veanene kefo yakeya huya hani yapima tegelege nehia atafi visaya veanene ani kea nehaviye. 16 Nehavigi nagoamoya ani kea haviya “Akave omalegahune.” huya nehaya veala hani yapi tegelege nehia atafi visaya veamogamife mani kemoa fali-mai veamogami manaamimo hia kava humaineanagi nagoamoya haviya amakupi maleteya “Maige maige hisuna yafe kanale manaage nehie.” huya nehae. Tusia aliya nealunanagi tagaitigela mani aliyana oaluteasine. 17 Kasagoya veamoya Anumaya Koti aliyateti “Miya alisune.” huya nehagi tagaila Anumaya Kotia hulategeta fatago huta kelamagema huhaleta hunana Kalaisiene ailokaeta maineta Anumaya Koti aufina mani kea huhaleta nehune.