9
Poloa Yisasi aliyama aliana miyama oalinea yafena muse humaine.
1 Nago kanomoa “Naa ohuo.” huno natafa nehio? Aao natafa nohie. Aposolo kanoa maino? E, ani kano mainoe. Nagaya Anumayatimo Yisasina agemaino? E, tamage Anumayamoene ailokaena mainena agai aliya ali-mainoa aliyateti lamakaya tamakua aiyahae nehae. 2 Nagoa veamoya nagaifena mage nehae “Aposolo kanoa omaine.” huya nehayanagi Yisasi kema tamahapaugetama havitama tamakua aiyahae hageya veamoya nelamakeya nagaifena “Anumayamoene ailokaeno Aposolo kanoa maine.” huya nehae.
3 Nagoa veamoya auavaniama fako hisagena nagaya mage huna hugahue. 4 “Anumayamo aliyana nealuanagina kaveene tienena afaa alisuo? 5 Nagoa Aposolo vayaene Yisasi aganaamoyaene Pitaene nehaya kava huna Yisasima agua aminesia ama alitenena avalena vaiyesuana ani yamoa havi kava hugahio? 6 Panapasiene taagaitiage Anumayamo aliyana nealitaa taagaitia moneleti kavela miya hutaa nenoe. Naa higetama taaya nohae? 7 Nagi ati vayala kamele ugahena amakaiami moneamileti kaveamia kenaamia miya nehao? Aao. Hana kanomo hoya vai-maleteno ani hoyafitila kavela alino onene? Hana kanomo pulumaka kava yagaiteno haenagaa nutimaa onene? Ani kavala ohugahagi afaa aliya negahae.”
8 Veamoya nehaya kavakeya akave malena mani kea nehuo? Aao, Anumaya Koti avopiene ani kea huno kae-maleneane. 9 Mosese kahegi kefina mage huno kae-maleneane
“Pulumakamoa aliyamaa nealino vitimo avina ayeno hagage huno onesie hutama avayalela nofila okinegeno aliyana nealino kavela neno.” huno kae-maleneane.
Mani kea Anumaya Kotia pulumakamofe humaineo? 10 Aao, tagaife humaine. Nagi hoyama alino humalenea kanomoa kave nesia yafena agesa haviteno negafie. Hoyafitima nena humainesia kavema nealisia kanomoenena “Aliyatialeti kavela nagopi mainetaa negahue.” huana aliyana nealie. 11 Nagaya Anumayamo kea huhalena tamahapaitena Avamumo avina yana hoyafina kali-malenogi ani hoyamoma nena hisigenahena tamakaipitila kenaniene kaveniene kanalelagina alisuo ifi oalisue? 12 Nagoa vayamoya tamakaipitila nealigi nagaya amakase-mainoa yafena tamakaipitila alisuo oalisuana? Kanalelagina aligahuanagi havigu Yisasi Kalaisi kanale mono kema havisaya katamia kahea kiotamatesuafene huna kavela oalina mainena mukia kana yana aluanagi “Kavela namiho.” huna nohue.
13 Mono nopi aliya nealiya vayamoya ani nopiti kaveamia nealiye. Anumayamofe haviya sipi sipi heya kae-salamana nehaya aliya vayamoya ani sipi sipifiti kaveamia ali-mainae. Ani kea ohavinao? 14 Naama hayana Yisasi kanale mono kema hamanepaiya vayafena Anumayamoa mage humaineane “Mono ketamima havisaya veamoya anonaa kenatamia kavetamia tamamisae.” huno humaineane.
15 Humaineanagi nagaya “Namiho.” huna ohunananagi menia “Namiho.” huna mani avona nokaove. Yisasi kema tamahapauvana tamakaipitila kavela afaa oalinoa yafena muse nehua yania haneafe ago faligahema husina kavefena tamahavigesua nagesa ohavusine. 16 Yisasi kanale mono kema huhalena nehuafenagina nagaini naugafa alina ohaigahue. Anumaya Kotia “Naa huo.” huno tokiyaage ke huno hunategena huhalena nehue. Ohuleasina Anumaya Kotia muse ohigeno kana yana namileasine. 17 Nagaya nagesafiti ani aliyana noalugi Anumayamo hunategena mani aliyama alua yafena miya yania oaligahue. 18 Anumayamoa hunategena huhalena nehua aliyana afaa nealuanagina monema onamisaya yafena naipamoa kanale nehie. Huhalena nehua yatetila miyania alisua amukonia haneanagi oalisua yatetila muse yania hane.
Poloa mukia veamogami aliya kano maine.
19 Monema oalua yafena nagoa veamogami aliya kanoamia omainogi mukia veamoya amakua aiyahae hisayafene huna aliya kanoamia mainoe. 20 Yuta veamoya Yisasi akave hisaya yafe amakaiami nehaya kava huna mainena Yisasi kea hamanepauve. Kahegi kema havina akave malesugenoa Anumayamoa “Fatago kano mainane.” huno hunategahie huna nohugi ani kema akave nemalaya veala Yisasi akave hisae huna amakaiene mainena mani kemo akave malena Yisasi kea hamanepauve. 21 Kahegi kema ohavinaya veanene mainena Yisasi akave hisae huna amakaya haya avamete huna Yisasi kea hamanepauve. Anumaya Koti kahegi kea akave malena Kalaisi akave nehuna agai kea havina akave nemaloe. 22 Yisasife haviya tokiya vaisaya amakua omalenesia veanene mainena amakua ali lokiya vaimatesuafe tokiya nagu hanea kano omainoe. Nagoa veamogami amaku amamena aligatisua yafe aluya huna amakaiamima amahaote amahaote nehaya kava huna Yisasi kea hamanepauve. 23 Naa nehisugeya kasagoya veamoya Yisasi hulatenea kanale mono kea havitesagena amakaiene kanaleya huna mainena musena hisue huna nehue.
Tagaya taiyage taiyage huta uvayi huo huno humainele uvayi huta anonaa alisune.
24 Ohavinao oagase aagase huya amakasaya veamoya nealiya yana nagoke kanomoa amakaseno agaiage muse yana aligahie. Ani kava hutama tamaiyage tamaiyage nehigeno Anumayamoa anonaa tamamino. 25 Ani yokaloma nelaya veamoya aluya huya amaku amakesalela tokiya vaiya kava neyagaiye. Muse hisaya yama anonaamia alisaya yafe kava yagaiya mainageno amakasesia kanomoa konagali yana aligahianagi ani yamoa fanane hugahie. Fanane hugahianagi tagaya fanane ohisia kanale yana anonatia alisunafene huta tagu tagesalela tokiya vaita neyagaune. 26 Ani yama alisua yafena naiyayege naiyayege nehuna amakasesuafene huna faitega moge mege nohue. Nayatetiene amakasesua yokaloa nelena nagaya faitega mo ai me ai nohugi nayatetila vaya amaugafale sili huna amaikonelue. 27 “Fatago kate viho.” huna veama hamanepaisuletila havigu nagaya havi kate visugeno Anumaya Kotia nagaila akaveno hunatesigena kanale anonania oalisuafene huna tusiya huna “Naugafamo age haye hia yana ohugahue.” huna nagu nagesale kava yagaina mainoe.