1 Yisasi kema tamahanepauna vayamogatihena mage huya hisae “Yisasi Kalaisina aliya vayaamoya maineya Anumaya Kotia nayoma falaki-malenea kea yagai-maineya huhaleya nehae.” huya hisae. 2 Kavayagaisaya veafena “Efi efi hutama aliyana aliho.” huno humaine. 3 Tamakayaene nagoa veanene nagaima fako hutama nagaya kanaleya huna tamahanepauvo havi kava huna tamahanepauvo hutama hisaya yafena kolia nohue. Nagainia nehua yafena nagainia fakoa nohugi Anumayamoa agaia fako hunategahie. 4 Nagaya agoana “Fatago aliya kano mainoe.” huna nehuanagi Anumaya Koti aulagafina fatago aliya kano maino ifi omainoe huno Anumayamoa agaiage “Naa humainane.” huno nagaila fako hunenate. 5 Kaiyekema hulatesia kanamoa yaufa falote ohuneanagitama tamakaya veala alitama “Naa kavala havi kava nehae.” hutama hu oamateho. Anumayamo esia kanafina agava mainesageno mukia veamoya kefo yama, hani yapi falaki-mainea yana, Anumaya Kotia hale yate alino falote hugahie. Anumayamoa agaia amahaote amahaote amakua amaketeno “Kanale humainao kefo ya humainao.” huno agaia alino fako huteno veamogamina humainesaya avamete Anumaya Kotia agaia muse yana amamigahie.

6 Nafunagana-gatama tamakaya havisae huna nagaiene Apolosienema alitama fako ohisaya kea nehuna kaana tamave-nelue. Anumayamo avopifena mage hie “Okaenesaya kea ohiho.” huya humainaya kea havitama akave nehutama nagoa veamogami amakia alisaga nehutama nago veamogami amakia ali haviya nehaya kavala ohiho. 7 Tamakaya mukia veama mainaya avamete hutama mainagi alua avametela hutama oamakasenagi mukia yana Anumayamoa tamamineanagi naa higetama “Nagainia ani yana ali falote nehue.” hutama tamakesa havitama tamaugafa alitama nehaiye?

8 Tamakaya ma ke hutama nehao? “Tagaitigekeya Yisasi kema havuna kea hai havimainone. Poloene Apolosiene mani kea tahapaiageta ohavinonagi tagaitigeya hai havilineta sauve veane mainone.” hutama nehao? Ani kavama humaineleasina taagaienena ania hutaa sauve vaya kana hutaa mainoaleasine. Tamage tamakaya ani avamete veanea omainae. 9 Nagaya ma nagesa nehavue Anumaya Kotia tagaila Aposolo vayala haenagalafa maisunafe hulatene. Nayoma kame vayama hamaegahe amavaleya kumate emainageya amaketeya kigi hu neamataya avamete kava nehageta tagaya haenagalafa vaya kana huta mainonageya “Hamaesageya falisae.” huya hageya veamoyaene ensole vayaene tagaila nelageya kigi hunelatae. 10 Tagaya Yisasi Kalaisi aliya nealunanagita aifo vaya kana huta mainonagi tamakaya Kalaisiene ailokaetama mainetama kanale havi haviyatami hanea veane mainao? Tagaya tokiyatia omale vaya maunagetama tamakaya tokiyatami hanea veane mainao? Tamakai tamakia alisaga nehayanagi tagaifena “Otahaiya vaya mainae.” huya nehae. 11 Yisasi kema hamanepaunafe nayoene meni kanafiene neyafena lagala neleno tifena nelageno nehie. Kenatia haviya nehuno faesuna noenena omalegeta vaiyatete nehunageya kayo kevea nelamiye. 12 Kaveti ali falote hisuna yafena tayapitila tusia aliya nealune. Vayamoya tagaila hu-haviya hu nelatayanagi anonaa kanale manua neamamune. Tagaila tusiya huya ali haviyana hulatayanagi tagaya tokiya vaita mainone. 13 Hu-haviya hu nelatayanagi anonaamia ako huta falu hamaisifa ke huneamatone. Nayoene meniene vayamoya tagaifena “Kasali-mainea yama halafi hutalaya avamete vaya mainae.” huya nehae.

14 Mani kea havitama tamakaye hisie huna nokaogi nagaila nahaiya nafaneyagamo-gatama ali lamakafa hisue huna mani kea kae-malenoe. 15 Kalaisima akave visaya kea teni tausenia (10,000) vaya hulamave-lisayana nagaya nagainige nagoke nelamafana mainoe. Yisasi Kalaisi kanale mono kema tamahapaugetama havitama Anumaya Kotina tamakua amitafa hageno agaia nafaneyaga lamateneafe nagaya nelamafana mainoe. 16 Mainoa yafe nagayama nemauva auava kavala agetetama akave maletama maiho. 17 Ani yafe Timotina hutogeno tamakaite umaine. Timotia Anumayatimoene ailokaeno maineno kanale aliya nealianagino nagaila nahau nayamopafi nenahaiya nafanenia maineafe nagayama Yisasi Kalaisiene ailokaena mainena vai neayoa auava yafena tamahapaiteno ani kate visaya kea huno tamakesa hugahie. Mukia kumate uvana Yisasife haviya amakupi malenaya veamogamina mani kea hamanepauvane.

18 Nagoamogatama nagaifena “Omegahie.” hutama nehutama tamakaitami tamaugafa alitama nehaiye. 19 Nehaiyanagi Anumayamoa hainegenoma “Vuo.” huno hunatesigena iva aupaa ago egahue. Neena amakaiami amaugafa aliya nehaiya vayala mo neamakena nagaifema nehaya kea havitena tokiyaamiene agegahue. 20 Anumaya Kotima kava yagai-mainea yamo aepaa keagela omalenegi Anumaya Kotina tokiyaa alita maisuna yamoenena aepaa hane. 21 Tamakaila na kava hisuafe nelamahaiye? Kelama-kisua kema hisua yafe esuo? Ifi ako huna tamakaifena aluya huno nahau nayamopafi nenahaiya kava hugahe esuo? Ani yafena lamakesa nehavitama etetama fatago hutama maisayana tamakaifena nahau nayamopafi nahau-mainenagena evayi hano.