A Mugano Pas
anun o Pol torom a taro
Tesalonaika
A wasiso talapor mugu
Ra o Pol i kis tong o Korin i tumus a pas ri, a mugano pas torom a taro na lotu tong o Tesalonaika.
O Tesalonaika a labino tamon una papor Masedonia. Una mantul na inawan anun o Pol i wanpat tong o Tesalonaika ra i warawai torom det (tama Ap 17:1-14). Ara taro ra det nukpukus, det tagun a taro Juda, ma a susut tandet tagun a kum kabotaro gisen. A kum mugumugu anun a taro Juda tong o Tesalonaika det kankan uni a ramano taro tagun det, det sa nurnur un o Iesu. Ra det lu ru o Pol gusun anundet a tamon, ma i wan utong o Beria. Numur i tulu ru o Timoti torom det, ra o Timoti i inanos o Pol un det.
Una pas ri o Pol i watung wakak torom o God uni a taro Tesalonaika det tur dekdek una nurnur ra det etorom a kum mamaut, ma det nem o Pol. Una pas ri, o Pol i nem na udekdek anundet a nurnur, ma i balu i kai anundet a kum iting una minat.
A inawan ina Mugano Buk Tesalonaika:
A turturkibin ina buk ri (1:1)
O Pol i gas nam det (1:2-10)
A pinapam anun o Pol tong o Tesalonaika (2:1-3:13)
A ngas na nilaun ra i ugasgas o God (4:1-12)
A inawan pat melet anun a Labino (4:13-5:11)
A tintinip na wasiso anun o Pol torom det (5:12-28)
1
1 Iau o Pol, o Sailas, ma o Timoti, metul tumtumus torom mot a taro na lotu tong o Tesalonaika, mot ra mot laun un o God a Tamandat ma a Labino o Iesu Karisito. A marmaris ma a malmal torom mot.
A nilaun ma a nurnur anun a taro Tesalonaika
2 Metul ser watung wakak torom o God un mot rop, ma metul ser pitar tar mot torom o God una numetul a kum niaring. 3 Ra metul wararing torom anundat a God a Tamandat, metul nuk pas anumot a kum pinapam i kibino una numot a nurnur, ma metul nuk pas a kum pinapam i kibino una numot a marmaris, ma metul nuk pasi kai, anumot a tuntunur dekdek, i kibino una numot a kinkinis langlang nama nurnur una Labino o Iesu Karisito.
4 A kum tistisimetul, mot ra o God i maris mot, metul tasmani lena i sa pilok pas mot, 5 uni a Wakak na Wasiso ra metul upuaso i, ausur i wanpat torom mot elar nama wasiso kut, awu. I wanpat tomo nam a dekdek ma a Tokodos na Nion, ma mot longoro lele i ra mot pam ukai i una balamot. Ra metul laun nisamot, mot tasman wakak a magirametul, ra metul ser upuaso i sur in pet wakak mot. 6 Mot sa mur pas a magirametul ma a magiran a Labino. A taro det banlaulau mot, ikut mot pam ukai a wasiso nam a gasgas, ra a Tokodos na Nion i pitar tari tamot. 7 Mot wanpat a wakak na larlar torom a taro na nurnur rop tiro una aru papor, o Masedonia ma o Akaia. 8 A wasiso anun a Labino ra mot upuaso i, i sa wan sarara, elar nam a tinangis ina garamut, ra i wan bakbak. Ausur tiro kut o Masedonia ma o Akaia, awu. A kum tamon rop det sa tasman anumot a nurnur un o God. Asau melet mo ra metul in watungi? 9 Uni det ut det wasiso talapor una numot a wakak na petutna ra mot gas pas metul. Ma det wasiso talapor kai un mot, lena mot sa tupukus torom o God, ma ka mot lotu mo torom a kum torotoro na god. Mot papam mo torom o God, i ra a lingmulus ino ma a lalaun ino. 10 Ra mot kis langlang sur a Nutunu, ra in nan pirso tagisapat una langit, i ra o God i sa ukatutur melet pasi gusun a minat. O naro ra o Iesu, ra i ulaun pas dat gusun a kankan anun o God, ra in nanpat.