1 Hianagi havige kasnampa vahera, amu'nozmifinti oti'neankino, anahukna huno mago'a havige rempi hurami vahera amu'nontamifinti oti'za, zamagra fraki'za maka krunage hu'za, tamentinti azeri haviza hu'naku anara nehu'za, Ramo'ma miza sezmante'nemofona zamefi hu'nemi'za, tusi'a knaza zamagrazmi zmagofetu erintegahaze. 2 Rama'a vahe'mo'za zmagra'a monkozamofo zmavesi'za nevaririsageno, anazanteku tamage kemofona huhaviza hunte'gahaze. 3 Anama nehaza vahera maka zanku kezmanunu hu vaheki'za, havi kereti tamazeri savri hugahaze. Hianagi Anumzamo'a korapa zmazeri haviza hunaku krunage vahera huhampri zmante'neankino, anama zmazeri havizama haniazamo'a ne-e.

4 Na'ankure ankero vahe'mozama kumi'ma hazageno'a Anumzamo'a ozamatre'ne, hianagi zmasga huno teve kumapi zmatrege'za, haninentake kerifi mni'ne'za, keagarema otisageno refkoma haniazanku avega ante'za mni'naze. 5 Hianagi korapa knafi vahera, ozamatreno zmahe frivgarene. Hianagi fatgo avu'avazankuke kea huama nehia ne' Noanki 7ni'a naga'agi huno nozmaheno, kefo avu'avazama nehaza vahera, tusi'a ko tinu zmahe frivgarene. 6 Hagi anahukna huno Agrama Sodom Komora vahe'ma tevereti'ma zmahe fanane hige'za, tanefa'ma samprenazazamo'a, mago avame'za me'neno hutaveri huno, Anumzamofo avu'avama osnaza vahera zmahe fanane hugahie huno nehie. (Jen-Agf 19:24) 7 Hanki kefo monko avu'avaza nehu'za, zamagra fatgo osu zamavuzmava nehazageno rimpagna hunezmantea fatgo nera Lotina, Anumzamo'a agu'vazine. 8 Na'ankure fatgo ne'moma zamagri amunompi mni'neno, nezmageno nentahino nehige'za, kasege rutagre zmavuzmavama knane knanema nehzageno'a, rimpagna hutere hu'ne. (Jen-Agf 19:29) 9 Hankino e'i Anumzamofo fatgo avu'avama nehaza vahema, zamagu'mavazi'nea kankamuna antahineankino, hazenke zampintira zmagu nevazino, havi zmavu'zmavama hanaza vahe'mo'za menintetira knazampi manime vu'za, vahe'ma refkoma huzmante knarera uhnatigahaze. 10 Mago'a vahe'mo'za havi miza erigahaze, e'inahu vahe'mo'za zmaguamo'a otige'za, monko'za hu zmagesama nentahiza, tra kea kefenkami netre'za, ana vahe'mo'za zmavufga ra nehu'za, ugota ankero vahema huhaviza huzankura korora nosaze. 11 Ana nehazanagi ankeromo'za, knare hu'za hanavenentake vahe mni'nazanagi, zamagra Ramofo avurera vahe'mofona refkoa hunozmantaze. 12 Hianagi ana havige rempima huzami vahe'mo'za zgakfagna vaheki'za, zmazeri'za zmahe frisaza vahe fore hu'nazankino, zamagri zmaguzmagesamo zmazerino zmahe frigahie. Zamagra havizankuke nehu'za mago'zana ontahi'naze. Hianagi zamagri havi zmavuzmavazamo zmahe frigahie. 13 Zamagra havi zmavuzmava nehazanki'za, mizama'a haviza erigahaze. Zamagrama zamagesama antahizana, musenkase huta aka tina zge ferupina negahune nehu'za, havi zmaguzmagesareti nezama kagranema nenazazamo'a, zamagraguke antahi zmavuzmava nehu'za, zmagazehu zmavuzamava hu'za nevazankino, ana zmavu'zamavamo'a, zmazeri haviza hugahie. 14 Maka kna, zamagra rumofo a'ene, rumofo venema savrima huzankuke nentahiza, havi zamavu'zamavama huzana otre'za huvava nehu'za, zamagra mago'a vahe'mofona fru hu'za rezmatga nehazageno, zamagraguke antahi antahintahi zmimo'a avi'nete. Hianagi zamagra hazenkegu nehakaze! 15 Zamagra fatgo kana atre'za hza negraze. Beori nemofo Balamu'ma havi avu'ava nehuno, miza erinaku avenesiaza hu'za fatgo osu kante nevaze. 16 Hianagi donkimo keosu zgamo vahe'mofo zmageru aruno, Balamuna Beori nemofo neginagi avu'avazamofona azeri fatgo hukea hu'ne. (Nam-Ham 22:1–24:25)

17 E'inahu vahe'mo'za kampui tinkerimo taneankna nehu'za, hampomo korimpena retufeno viankna hu'za kankekanke nehazanki'no, haninentake teve kumamo'a zmavega ante'ne. 18 Ana vahe'mo'za rankege nehu'za, havige ke zamireku zamavufga ra nehu'za, vahera zamazeri oti ke hu'za monko zamavuzmava nehu'za, maka zamagra zamavufarera monko zamavuzmava nehaze. Zamagra monko zamavuzmavamofo zamesizana notre'za, e'inahu zamavuzmava nehu'za zamentintimo hanave oti'nea vahera zamami'mi hu'za zamavazu nehaze. 19 Ana nehu'za, maka vahekura fru hutma maniho hu'za huvempa ke hunezmantazanagi, zamagra havi zamaguzmagesamofo kazokzo eri'za vahe mni'naze. Na'ankure vahe'mo'za nankna zamuzmama nehazazamofo kazokzo eri'za vahe mni'naze. 20 Na'ankure zamagrama ama mopafi havi avu'avaza atre'za, Ranti, Taguvazi Ne'ma Jisas Kraisima ke'za antahiza hu'nesaza zama, ete atre'za koma mni'naza havi avu'avapima ufresu'za, ese'ma mni'naza havi avu'avara agatere'za, havizantfa hu'za manigahaze. 21 Na'ankure fatgo avu'avamofo kama ke'za antahizama osu'neza, ruotge kasegema rutragazasina knarezantfa hisine. 22 Nanknaza zamagritera fore'ma hu'neana, knare antahizamofo tamage kemo'a anage hu'ne, kramo'a ete eno amu'ma atitreneana eme ne'negeno, afumo'a sese huno agruma hu'neana, ete atreno ome hapa negrie hu'ne.