5 Laḡannemo Idip ḡalibonana giu i vaiye te Islael lavedi a modina, tana ena waibabada vaitedi nuwedi a vitaledi bi a giuna gado, “Niga bai te voiye bi Islael lavedi a modina a nawa bi eda taupaula yababa tei nawa kamaḡedi.” 6 Taunana aubaina ena seliot bi ena tauwaiḡaviya i ka nonoḡidi. 7 Tana seliot laukaidi 600 bi seliot matabudi Idip noponemo i wai ḡemoḡemotidi te eta taudoliyena i wai oneonedi. 8 Bi Bada, ḡalibona nuwana i ka bagibagi te Islael lavedi mote i lau avenakiyedi. Taunana aubaina Islael lavedi mayasisidi a nawanawana i kwavi watedi. 9 Tana ena tauwaiḡaviya, seliot tauvelayedi bi osimo tauwaiḡaviya Islael lavedi a kwaviwatedi. Islael lavedi tedi Fi-Aliotmo nisa sabasabana diyanemo ḡalavumo a miyamiya bi a tava gudedi. Fi Aliot ba niga nevanemo bi Bal Sefon dobuna ba noi nevanemo.

10 Laḡannemo ḡalibona ena tauwaiḡaviya Islael lavedi a tavatava gudedi ba Islael lavedi gado sai kita ba Idip lavedi kaikana a tava gudedi. Ḡome Islael nuwedi i yapuyapu bi a binau saḡa Bada lisinemo te maso i sagudi.

11 Bi Mousis a giuwena gado, “Ei Mousis bai kuna voiye? Mai bena Idipmo tauyewa geḡa bi kunai dolimai te niganana kalakalalelemo ka peki. 12 Mba taunana Idipmo ke giuwem, te maso kuna gosemai te maso ke miya gwasa bi Idip aubaidi kei taupaula yababa. I visu te maso Idipmo ke miyamiya kaka ke peki bi niganana kalakalalelemo kuna tavaitemai bi ka pekina mote i visu.”

13 Bi Mousis lava i giuwedina gado, “Koma naila! Nuwemi ya lautou bi koi nuwabagibagi te Bada bai ya voiyena ko kita. Noi lavedi mani Idip ko kitekitedina ba muliḡa mote koma kita munaḡedi. 14 Temi koi nuwabagibagi ota, Bada kaka aubaimi yai ḡaviya.”

15 Kamaina bi Bada, Mousis i giuwena gado, “Bai aubaina lisigumo ko binabinau? Islael lavedi kwa giuwedi te ko nawa ota. 16 Em diḡona kwalageti bi nisa dabanaḡa kwai yoyo nawe. Te nisa ya nuwadaila bi doḡa ḡasaḡasalinaḡa Islael lavedi vaitedi ko nawa. 17 Tagu kaka Idip edi tauwaiḡaviya nuwedi yà lagetidi te Islael lavedi sa kwavi watedi. Bi ḡalibona ena tauwaiḡaviya edi seliot bi tauvelauyedi matabudi yà boboalidi. Ḡome kaka namaligu sa kita bi sa kasaḡesaḡegu. 18 Ḡalibona ena tauwaiḡaviya, edi seliot tauvelauyedi bi Idip lavedi matabudi tagu namaligu tedi lisidimo yà voiye te sa kita bi sa sibe te tagu Bada.”

19 Kamaina bi Maimaituwa ena aneya Islael lavedi i etaetadoliyedina, i nato mulidimo i moito. Bi kota giyou pwatapwatana matedimo i nato mulidimo i moito. 20 Bi Idip edi tauwaiḡaviya bi Islael lavedi mododimo i moito. Dudubalemo Idip lavedi edi yawanimo i voiye te i wai boimatuwa bi Islael lavedi edi yawanimo i voiye te yanayana i kena. Niga mainana i voiye te Idip edi tauwaiḡaviya Islael lavedi mote sima banavidi.

21 Kamaina bi Mousis nimana i tuḡu nisa dabanaḡa. Mba dudubalinemo Bada beubeu yawaninemo yavala i voiye te i lausuve malasako, te nisa i suve daili, nevana bi nevana bi doḡa ḡasaḡasalina i laumaḡata. 22 Bi Islael lavedi kataiyedimo bi ḡeniyedimo nisa i ganagudu mai bilibili. Bi tedi nisa modonaḡa doḡa ḡasaḡasalinaḡa a nawa. 23 Bi mulidimo Idip edi tauwaiḡaviya edi seliot tauvelauyedi Islael a kwaviwatedi. 24 Laḡan sakosakomo giyou bi kai vavanina pwatepwatedi nopodimo Bada i wai kita yovo bi i voiye te Idip edi tauwaiḡaviya i kanuwanainidi. 25 Tana edi seliot i voiyedi te kaḡedi a nuwakamakamaḡa bi nawa a kabi kasaḡe. Ḡome Idip lavedi a giuna gado, “Egu lava niga lavedi ta gose kamaḡedi. Bada mulidimo i moito bi ya waiḡaviyeda.”

26 Kamaina bi Bada, Mousis i giuwena gado, “Nimam kwa tuḡu nisa dabanaḡa bi nisa ya nato yai ḡemoti munaḡe. Bi Idip edi tauwaiḡaviya edi seliot bi tauvelauyedi yai kwesitawedi.” 27 Olaolalemo Mousis nimana i tuḡu bi nisa i nato i waiḡemoti munaḡe. Bi Idip edi tauwaiḡaviya bi seliot tauvelauyedi bena maso a naila a munaḡa bi geḡa te Bada nisamo i waitonedi. 28 Kamaina bi nisa i nato i waiḡemoti munaḡe bi Idip edi tauwaiḡaviya bi seliot tauvelauyedi matabudi Islael mulidiḡa a velavelauna i waikwesi tawedi. Bi mote aiyai i yawasana.

31 Ḡome Islael lavedi Bada ena ḡailisi Idip lavedi lisidimo i voivoiyena a kitakita ba matabudi Bada a naile bi ai sumaḡe. Bi kota ena taupaula Mousis ai sumaḡe bi a vivile.