1 Laḡannemo Islael lavedi Idipmo yaḡolo a miyamiya ba Bada, Mousis bi Elon i giuwedina gado, 2 “Niga nawalaina ba nawalai dolidolina temi aubaimi ya waitubu niga kwalabunemo. 3 Islael lavedi matabudi ko giuwedi te laḡan wai 10-na niga nawalainemo olooloto ḡemotaḡa vanuwa ḡemotaḡa nopodimo sipu ee gouti sa kamaḡatidi te mai sa moito tedi aubaidi. 4 Bamoda vanuwa lavedi mote a wapa te mba muselina sa kani kovi ba edi lava diyedimo taumiya sa iyevidi te, luvedimo mainana soisoi sa sivudi te sa kani. 5 Bi musala ko waimaḡatina ba sipu ee gouti bi ena kwalabu ḡemota bi mote sidasidana. 6 Bi ko labe kauwedi, sa moito te laḡan wai 14-na niga nawalaina noponemo. Mba aubiganemo Islael lavedi matabudi musala sai pekidi. 7 Bamo vanuwidiḡa musala sa kanikanina, tedi kwasina sa tai bi gudu dabediḡa bi mataeta diyedi sa yasaḡidi. 8 Mba dudubalina ḡemotinemo tedi musala sa ovodi. Kamaina bi buledi mote muu'a vaitena bi tasima ḡolaḡolana vaitedi sa kanidi.

12 “Mba dudubalina ḡemotinemo tagu Idip nopona yà nawa yaḡosi bi olooloto tautautuwaḡa bi ḡamoḡamo geigei tubuḡidi yài pekidi bi Idip edi maimaituwa sa lau lauduneyedina matabudi yà kovoḡidi. Tagu Bada bai e giuwena ba yà voiye. 13 Bi temi emi vanuwa mataetidimo kwasina ba mataila. Laḡannemo kwasina e kitana ba vanuwina yà vawaitauli. Bi laḡannemo Idip yà kovokovoḡidi ba mote bai gebogebona lisimimo ima tubuḡa.

14 “Temi bi emi tubulelesa niga soina laḡanina ba kwalabu matabuna ko voiye wata. Laḡannemo ko soisoina ba tagu Bada yà moimoito galamemina taunana ko noḡoti wata.”

15  Bada i giuna gado, “Laḡan wapana 7 nopodimo buledi muu'a vaitena koma kani. Mba soina laḡanna ko waitubuna muu'a matabudi emi vanuwemo koi naḡasedi. Aiyai bi i kanina ba tana mote egu lava Islael nopodimo ima miya. 16 Mba wiki pakanemo bi damonemo ba koi ḡemotimi bi ko lauduneyegu, noya ḡesaudi mote koma voiyedi bi kaniḡa ba ko kanonoḡidi.

17 “Laḡan muliḡa buledi mote muu'amuu'ana soina ba ko voiye. Mba tagu Idipmo e ka kapotiyovomi. Taunana noḡotiwatana.”

21 Kamaina bi Mousis Islael babadidi i yogedi a tava ai ḡemotidi bi i giuwedina gado, “Ko nawa makai emi vanuwaḡa bi sipu ee gouti koi pekidi bi vawaitauli soina ko voiye. 22 Bi kwasina aboma noponemo ko ḡini bi belana lagana ko gasi te kwasina aboma noponemo ko taivai bi gudu dabediḡa bi mataeta diyedi ko yasaḡidi. Dudubalemo mote aiyai ima potiyovo eete olaolala. 23 Laḡannemo Bada Idip noponaḡa ya nawa bi libilibi oloolotodi tautautuwaḡa yawai pekidi bi emi vanuwemo ya tava bi kwasina mataetaḡa ya kitedina ba vanuwidi ya vaitaulidi. Tana mote taulaukagebogebo aneyina imai anine te emi vanuwemo libilibi oloolotodi, tautautuwaḡa mote ima ka gebogebodi.

24-25 “Laḡannemo temi bi emi tubulelesa Bada doḡa i giugiuwapaena ḡome kona tavana ba niga giuvavasaḡina ko noḡotiwata bi soina kwalabu matabuna ko voiye wata. 26 Bi bamoda natunatumi sai talayemina gado, ‘Niga soina banina bai?’ 27 Ba ko giuwedina gado, ‘Niga ba vawaitauli sewasewana Bada lisinemo. Banina laḡannemo tana Idipmo libilibi oloolotodi tautautuwaḡa i waipekidi ba Islael eda vanuwa i vawaitaulidi bi i nawa ota.’ ” Ḡome lava tuwapekedi ai tupagwaliyedi bi a laudune. 28 Mousis bi Elon Islael lavedi a giuwedi te Bada bai i giugiuwedina mainana a voiye.

29 Dudubala modonemo Bada libilibi oloolotodi tautautuwaḡa matabudi Idip noponemo i waipekidi. Noke ḡalibona natuna tautuwaḡa ena gabu tauvaina lisinemo i waitubu te i yovo biliwelokomo taumiya bi kota ḡamoḡamo natunatudi geigei tubuḡidi vaitedi a peki. 30 Taunana aubaina ḡalibona, ena waibabada bi Idip lavedi matabudi dudubala modonemo a kena moito bi a vaiye te ḡaba bi lauaiyoi Idip dobuna i nawa yaḡosi. Bi vanuwa onena libilibi tautautuwaḡa ula pekidiḡa.

31 Bi ḡalibona mba dudubalinemo Mousis bi Elon i yogedi a tava bi i giuwedina gado, “Emi lava Islael vaitedi ko gosemai bi ko modina ko nawa bi Bada ko lauduneye kona giugiuna mainana. 32 Emi sipu, emi gouti bi emi ḡamoḡamo ḡesaudi vaitedi koi dolidi bi ko modina. Bi kota emi Maimaituwa lisinemo ko laupali te ya kavisuvisugu.”

33 Ḡome Idip lavedi Islael a egelidina gado, “Niga dobuna ko gose bi ko nawa makai, mote koma miya, mai te ka peki kovi.”

37 Islael lavedi Lamesismo a modina a nawana Sakot. Bi olooloto wapana 600 tausan bi waivini bi libilibi mote a iyevidi. 38 Kota lava wapewapedi ḡesaudi mote Islael lavedi bi sipu, gouti bi ḡamoḡamo wapewapedi vaitedi a nawa. 39 Laḡannemo Idip lavedi a kwavikwavivaidi ba mote edi gavogavo te kani maso a vononoḡa, taunana aubaina edi falawa gwadagwadaidi mote mu'a vaitena vitavitalena a avala ota bi a modina. Mba falawidi taudidi a viliwaitabetabedi bi buledi a gabudi.

40  ✡ Pak 15:13Islael lavedi Idipmo a miyana kwalabu 430 a kovi.

43 Kamaina bi Bada, Elon bi Mousis i giuwedina gado, “Vawaitauli soina ena giuvavasaḡa ba niga mainana, ‘Tautavatava mote niga soina sima kani. 44 Aiyai bi ena taupaula i gimelina ba kwapibwali lisinemo ya voiye kaka muliḡa soina ya kani. 45 Bi nanavai lavedi bi taunoya manemo ko wai maiidina ba mote sima kani. 46 Bi muselina mote sima ka potiyovo didiyaumo. Kamaina te vanuwa noponemo sa kani bi siliḡe mote sima doukotodi. 47 Islael lavedi matabudi kamaina te vawaitauli soina sa voiye.”