2
Ni tal u Xhun uvaꞌ aꞌ u Jesucristo u oksan qetz vatz u Tiixh
1 Vitzꞌin vatzik, ech exeꞌ meꞌal unkꞌaol. As nuntzꞌibꞌa bꞌen unqꞌa yoleꞌ sete tiꞌ uvaꞌ yeꞌ la paavin ex. Asoj at umaj oꞌ kat paavin oꞌ, as at umaꞌl u oksan qetz vatz u Tiixheꞌ. As aꞌeꞌ u Jesucristoeꞌ uvaꞌ jik chit itxumbꞌal.
2 As Aakeꞌ kat toksa tibꞌ tiꞌ ichooat u kupaaveꞌ. As jit kuxh u kupaaveꞌ. Pet antu veꞌt vipaav unqꞌa tenameꞌ skajayil uveꞌ at vatz u txꞌavaꞌeꞌ.
3 Asoj la kunima unqꞌa itzaqꞌit u Jesúseꞌ, as aꞌ texhlal tetzeꞌ uvaꞌ ootzimal veꞌt u Tiixheꞌ sqaꞌn,
4 tan abꞌil uvaꞌ ech la tal ileꞌ: «Ootzimal veꞌt u Tiixheꞌ svaꞌn,» chaj la taleꞌ as tul yeꞌl unqꞌa itzaqꞌit Aakeꞌ ninima, as chulin yol kuxheꞌ, tan yeꞌl u jikla yoleꞌ at tu u taanxelaleꞌ.
5 Pet jankꞌal oꞌ uvaꞌ nimamal viyol Aakeꞌ sqaꞌn, as oꞌeꞌ uvaꞌ xoꞌn veꞌt Aak sqe. As aꞌ texhlal tetzeꞌ uvaꞌ at veꞌt ok oꞌ kꞌatz Aak,
6 tan abꞌil la alon uvaꞌ chabꞌamal chit veꞌt tok taama tiꞌ Aak, as techal la ibꞌan u bꞌaꞌneꞌ echeꞌ uvaꞌ nibꞌan Aak.
Ni tal u Xhun isuuchil tiꞌ u akꞌ tzaqꞌit
7 Vitzꞌin vatzik, jit umaj tzaqꞌit uvaꞌ aꞌn cheenajle uvaꞌ nuntzꞌibꞌa bꞌen sete. Pet aꞌ u tzaqꞌiteꞌ uvaꞌ at chittuꞌ, tan an chit u tzaqꞌiteꞌ uvaꞌ atik bꞌaxa tul kat etabꞌi, as kat enima.
8 As at chiteꞌ u tzaqꞌiteꞌ uveꞌ nuntzꞌibꞌabꞌen sete. As an kuxh u jikla tzaqꞌiteꞌ uvaꞌ kat ikꞌuch u Jesucristoeꞌ sqe tul uvaꞌ kat taqꞌ tibꞌ Aak sqiꞌ tiꞌ ikameꞌ. As kat taqꞌ veꞌt Aak sete tiꞌ uvaꞌ la ekꞌuch veꞌteꞌ uvaꞌ la exoꞌni veꞌt etibꞌ sevatzaj, as aꞌ veꞌteꞌ u akꞌ tzaqꞌiteꞌ as ni teesa iyakꞌil unqꞌa vaꞌlexheꞌ, as ni txijun veꞌt u jikla txijubꞌaleꞌ.
9 Abꞌil la alon uvaꞌ ech tatineꞌ echeꞌ umaj uxhchil uvaꞌ nixaan vatz u sajeꞌ, tan aꞌ u bꞌaꞌneꞌ nibꞌaneꞌ uvaꞌ ni taleꞌ, as tul ni tixva umaꞌt u titzꞌin tatzik uvaꞌ ni niman u Tiixheꞌ, as aꞌ uxhchileꞌ uvaꞌ atiltel tu u qꞌej toktoeꞌ.
10 Pet abꞌil uvaꞌ nixoꞌni veꞌt u titzꞌin tatzikeꞌ uvaꞌ ni niman u Tiixheꞌ, as atoꞌk taama tiꞌ u Tiixheꞌ. As ech tatineꞌ echeꞌ umaj uxhchil uvaꞌ nixaan vatz u sajeꞌ, tan yeꞌ ni toksa taama tiꞌ u paaveꞌ.
11 Pet abꞌil la ixvan unqꞌa titzꞌin tatzikeꞌ, as ech tatineꞌ echeꞌ umaj uxhchil uvaꞌ ni xaan tu u toktoeꞌ, tan aꞌ kuxh u vaꞌlexheꞌ nibꞌaneꞌ. As yeꞌ nipal stuul kam uveꞌ nibꞌaneꞌ, tan ech nibꞌaneꞌ echeꞌ umaj uxhchil uvaꞌ yeꞌ ni tilon tu u toktoeꞌ.
12 Vitzꞌin vatzik, ech exeꞌ meꞌal unkꞌaol. As nuntzꞌibꞌa bꞌen unqꞌa yoleꞌ sete, tan tiꞌ uvaꞌ kat sotzyu veꞌt vepaaveꞌ taꞌn u Tiixheꞌ.
13 As nuntzꞌibꞌa bꞌen unqꞌa yoleꞌ sete, ex txutx bꞌaala, tan tiꞌ uvaꞌ ootzimal veꞌt u Jesúseꞌ setaꞌn uveꞌ atik chit tixeꞌtebꞌal qꞌiisaj. As nuntzꞌibꞌa bꞌen unqꞌa yoleꞌ sete, ex txul aama, tan tiꞌ uvaꞌ kat txꞌakonyu veꞌt ex tiꞌ u txꞌiꞌlanajeꞌ.
14 As nuntzꞌibꞌa bꞌen unqꞌa yoleꞌ sete, ex txutx bꞌaala, tan kat etootzil u Jesús uveꞌ atik chit tixeꞌtebꞌal u qꞌiisajeꞌ. As nuntzꞌibꞌa bꞌen unqꞌa yoleꞌ sete, ex txul aama, tan kat yakꞌinyu veꞌt etaama. As chabꞌamal tok veꞌt viyol u Tiixheꞌ tu vetaanxelaleꞌ. As kat txꞌakonyu veꞌt ex tiꞌ u txꞌiꞌlanajeꞌ.
15 As tuk val sete sekajayil, etoksak etaama tiꞌ unqꞌa vaꞌlexheꞌ uveꞌ nibꞌanchu vatz u txꞌavaꞌeꞌ. As mitaꞌn unqꞌa vatz txꞌavaꞌilla txumbꞌaleꞌ la etoksa etaama stiꞌ, tan abꞌil uvaꞌ la toksa taama tiꞌ unqꞌa vaꞌlexheꞌ, as jit veꞌt u Tiixheꞌ nixoꞌni.
16 As jankꞌal unqꞌa vaꞌlexheꞌ uvaꞌ ni tuch vatz u txꞌavaꞌeꞌ, echeꞌ u tachaꞌv vichiꞌol unqꞌa uxhchileꞌ, tukꞌ tachaꞌv vivatzeꞌ, as tukꞌ uvaꞌ ni toksa jeꞌ iqꞌii tiꞌ u txꞌiibꞌal iqꞌiieꞌ, as echeꞌ aꞌ koj u Tiixheꞌ ni alon ste. Pet aꞌ unqꞌa vatz txꞌavaꞌilla txumbꞌaleꞌ ni alon ste.
17 As la pal veꞌt unqꞌa vaꞌlexheꞌ tukꞌ unqꞌa tachaꞌv vichiꞌol unqꞌa uxhchileꞌ uvaꞌ nibꞌan vatz u txꞌavaꞌeꞌ. Pet ech koj unqꞌa uxhchileꞌ uveꞌ la niman kam uveꞌ nisaꞌ u Tiixheꞌ, tan aꞌeꞌ at itiichajil kꞌatz Aak tiꞌ chit ibꞌeneꞌ.
Ni tal u Xhun isuuchil u naj uvaꞌ la ul toksa tibꞌ Cristoil
18 Vitzꞌin vatzik, ech exeꞌ meꞌal unkꞌaol. As ootzimaleꞌ sqaꞌn uvaꞌ at veꞌt oꞌ timoxtebꞌal u qꞌiieꞌ, tan kat alpu bꞌaxa uvaꞌ la ul u uxhchileꞌ uvaꞌ la ul toksa tibꞌ Cristoil. As aꞌ veꞌteꞌ uvaꞌ nibꞌan cheel, tan nimal unqꞌa uxhchileꞌ ati uvaꞌ nitoksa tibꞌ Cristoil.
19 As kat teesal tibꞌ unqꞌa uxhchileꞌ sukukꞌatz, tan tiꞌ uvaꞌ jit kumool qibꞌ stukꞌ. As kumool koj qibꞌ stukꞌ, as la atin unqꞌa uxhchileꞌ sukukꞌatz. Pet kat teesal tibꞌ sukukꞌatz. As nikꞌucheꞌ uvaꞌ jit eela u kutxumbꞌaleꞌ stukꞌ.
20 Pet ech koj ex, tan at veꞌt ok u Tiixhla Espíritu tu vetaanxelaleꞌ taꞌn u Cristo uvaꞌ jik chittuꞌ. As kat palyu veꞌt ex tu visuuchil u jikla yoleꞌ.
21 As jit tiꞌ uvaꞌ yeꞌ ootzimal isuuchil u jikla yoleꞌ setaꞌn nuntzꞌibꞌakat bꞌen u yoleꞌ sete. Pet tiꞌ uvaꞌ ootzimal veꞌt isuuchil u jikla yoleꞌ setaꞌn, as tiꞌ uvaꞌ ootzimal setaꞌn uvaꞌ yeꞌl tokebꞌal unqꞌa vaꞌlexhla chusbꞌaleꞌ xoꞌl u jikla yoleꞌ.
22 As ootzimal unqꞌa chulin yoleꞌ sqaꞌn, tan aꞌ unqꞌa uxhchileꞌ uvaꞌ ni alon uvaꞌ jit Cristo u Jesúseꞌ. As aꞌeꞌ uvaꞌ eela vitxumbꞌaleꞌ tukꞌ u uxhchileꞌ uvaꞌ la ul toksa tibꞌ echeꞌ uvaꞌ nibꞌan u chulin yoleꞌ uvaꞌ nitoksa tibꞌ Cristoil, tan ni tixva unqꞌa uxhchileꞌ u Kubꞌaal Tiixheꞌ as tukꞌ viKꞌaol Aakeꞌ unpajte.
23 As abꞌil uveꞌ la ixvan viKꞌaol u Tiixheꞌ, as yeꞌle atoꞌk kꞌatz u Tiixheꞌ. Pet abꞌil uveꞌ ni niman viKꞌaol u Tiixheꞌ, as at veꞌt ok kꞌatz u Tiixheꞌ.
24 Estiꞌeꞌ ni val sete, kam unqꞌa jikla yoleꞌ uvaꞌ kat enima tul kat ok veꞌt ex kꞌatz u Tiixheꞌ bꞌaxa, as aꞌeꞌ chabꞌamal tatin tu vetaanxelaleꞌ tiꞌ chit ibꞌeneꞌ, tan asoj chabꞌamal veꞌt tatin unqꞌa yoleꞌ tu vetaanxelaleꞌ, as la atin veꞌt ex kꞌatz u Tiixheꞌ as kꞌatz viKꞌaol Aakeꞌ unpajte.
25 Tan u jikla yoleꞌ uvaꞌ alel kan taꞌn u Jesucristo sqe, as aꞌeꞌ u kutiichajileꞌ uveꞌ yeꞌl iyaꞌtebꞌal.
26 As kat untzꞌibꞌa bꞌen unqꞌa yoleꞌ sete tiꞌ unqꞌa uxhchileꞌ uvaꞌ ni eesan ex tu bꞌey.
27 As yeꞌxhebꞌil la eesan ex tu bꞌey, tan at veꞌt ok u Tiixhla Espíritu tu vetaanxelaleꞌ taꞌn u Jesúseꞌ. As estiꞌeꞌ uvaꞌ jit tzꞌajinal la chuspu veꞌt ex taꞌn umaꞌtoj uxhchil uvaꞌ vaꞌlen nichuseꞌ, tan aꞌ u Tiixhla Espíritueꞌ ni chusun oꞌ tiꞌ unqꞌa veeꞌ skajayil. As aꞌ u jikla yoleꞌ nichus u Tiixhla Espíritueꞌ sqe. As yeꞌl oꞌ ni teesa oꞌ tu bꞌey. Estiꞌeꞌ uvaꞌ la qoksa qaama tiꞌ u Jesúseꞌ, echeꞌ uvaꞌ nichus u Tiixhla Espíritueꞌ sqe.
28 As tuk val sete, vitzꞌin vatzik uvaꞌ xoꞌn chit ex sve, kuchabꞌata qatin kꞌatz u Jesúseꞌ, aqꞌal uvaꞌ yeꞌ la xoꞌv oꞌ tul la ul Aak vatz u txꞌavaꞌeꞌ unpajte. As yeꞌ la qeesa el qibꞌ kꞌatz Aak taꞌn chꞌixvichil,
29 tan ootzimal veꞌt sqaꞌn uvaꞌ jik chit Aak. As ech qootziteꞌ uvaꞌ jankꞌal oꞌ uvaꞌ ni niman u jikeꞌ, as oꞌ veꞌt meꞌal ikꞌaol Aak tan at veꞌt kutiichajil kꞌatz Aak.