Viakʼla txumbʼal u tioxh Qꞌu Kam Ibꞌaxabꞌsa Ikꞌuchax U Tioxh 1

QꞌU KAM IBꞌAXABꞌSA IKꞌUCHAXU TIOXH TU U XHAN (Apocalipsis)

Yol tiꞌ u uꞌ tzaꞌ

Aꞌ tzꞌibꞌan u uꞌ tzaꞌ u Xhan vaꞌl chusulibꞌich kꞌatz u Jesuus. Aꞌ itzꞌibꞌav kꞌasuꞌl tu u txꞌavaꞌ Patmos; maꞌl u txꞌavaꞌ nikꞌa aꞌ, vaꞌl txaypinajichku tu u yaꞌbꞌ 93 — 95 m.t.J.

Aꞌ itzꞌibꞌav bꞌen xeꞌ juj tanul qꞌu niman tetz u Jesuus tu Aasia. Ayaꞌ qꞌuꞌl tzaꞌ: u Eefeso, u Esmirna, u Peergamo, u Tiatira, u Sardis, u Filadeelfia, u Laodicea.

Aatz u yol “Apocalipsis”, aꞌ nikꞌaskuꞌl tiꞌ u yolbꞌal griego utz, “Revelación” chu u tokebꞌal tu kastiya. Qꞌu Kam Ibꞌaxabꞌsa Ikꞌuchax U Tioxh, chu tu kuyolbꞌal. Ikꞌuchax maꞌj kam aas yeꞌ naꞌl; taqꞌax eluꞌl maꞌj kam vatzsaj aas yeꞌ ootzajimal.

Aatz u Xhan tziꞌ, aꞌ maꞌl tu qꞌu chusulibꞌ vaꞌl tiira tiich chit u Jesuus tiꞌ. Sibꞌal kam til kꞌatz u Jesuus aas aal yeꞌt til unjot qꞌu chusulibꞌ. Antich xoꞌl oxvaꞌl qꞌuꞌl ilon qꞌaav titzꞌpu vimeꞌal u Jairo. Choktaj U Kuxh 5.37. Antich xoꞌl qꞌuꞌl ilon ijalpixsat tibꞌ u Jesuus vaꞌl nital U Tio 17.1. Antich xoꞌl qꞌuꞌl bꞌen tiꞌ u Jesuus aas ex iqꞌila isikꞌle Tioxh, aꞌ chit siꞌchtexhtxaypi. Choktaj U Xhan 13.23. Antu paj atich opon tu vaꞌl aqꞌlik jeꞌ u Jesuus vatz kurus. Utz tabꞌnaka vinan u Jesuus te. Ech nital U Xhan 18.15; 19.27. Aꞌ vaꞌl tꞌasp ibꞌen tuchꞌ u Luꞌ tu u mujbꞌal tetz u Jesuus taꞌxh tabꞌi aas qꞌaav itzꞌpia. Ech nital U Xhan 20.1-10.

Aꞌ u jatxbꞌal tibꞌ qꞌu yol tu u uꞌ tzaꞌ.

Oxvaꞌl elnaj tu qꞌu kam qꞌuꞌl kꞌuchax tu u Xhan. Nital u 1.19 aas alax tu u Xhan: —Pek tzꞌibꞌa qꞌu kam vetiilluka, qꞌu kam niil cheel tzaꞌ utz, tuchꞌ qꞌu kam qꞌuꞌl siil tiꞌ qꞌu kam tzaꞌ.— Texh teꞌleꞌ.

I) 1.10-18 Aꞌ nital qꞌu kam qꞌuꞌl maꞌtich tiltuka u Xhan.

II) 1.19—3.22 Aꞌ qꞌu kam nichtileꞌ, qꞌuꞌl; “Niil cheel tzaꞌ.” Texh u aanjel te.

III) 4.1—22.5 Aꞌ qꞌu kam til tiꞌ qꞌu kam tziꞌ, ayaꞌ qꞌuꞌl: “…siil tiꞌ qꞌu kam tzaꞌ.” Texh u aanjel te.

Atil 14 jatxbꞌal tibꞌ u uꞌ tzaꞌ.

1) 1.1-8 Ech ixeꞌt qꞌu yol tu u uꞌ iꞌan u Xhan tzaꞌ.

2) 1.9-20 Nital vikꞌuchtu u tijleꞌm u Jesuus xoꞌl qꞌu niman tetz.

3) Kꞌujul 2 tuchꞌ u 3 Nital tiꞌ kam bꞌanel tu u tatin qꞌu niman tetz Jesuus vatz u Tioxh tu u tiempo tziꞌ.

4) Kꞌujul 4 tuchꞌ u 5 Nitaleꞌ aas nitoksal iqꞌii u Jesuus tu qꞌu nachol tetz tu Amlika.

5) 6.1—8.1 Nitaleꞌ kam qꞌu kam uchi aas teesa junun qꞌu sello u Jesuus.

6) 8.2—11.19 Nitaleꞌ kam junun qꞌu choobꞌal paav kuꞌi aas oqꞌ jujvaꞌl qꞌu trompeta.

7) Kꞌujul 12 Nitaleꞌ kam uch tiꞌ u ixoj Israeel vaꞌl itzꞌpu tal titzꞌin.

8) Kꞌujul 13 Nital tiꞌ qꞌu xaꞌebꞌalla txokop.

9) Kꞌujul 14 Nital tiꞌ u 144,000 aanima; tiꞌ qꞌu aanjel qꞌuꞌl nitoksa iqꞌii u Tioxh utz, tuchꞌ tiꞌ u choobꞌal paav vaꞌl aꞌ nikꞌam tiꞌ vichokax qꞌu triigo tuchꞌ qꞌu uuva.

10) Kꞌujul 15 tuchꞌ u 16 Nital tiꞌ jujvaꞌl qꞌu koopa tetz vikꞌaꞌnal u Tioxh qꞌuꞌl kuꞌi.

11) Kꞌujul 17 tuchꞌ u 18 Nital tiꞌ visotz u mam tenam Babiloonia.

12) Kꞌujul 19 tuchꞌ u 20 Nital tiꞌ u txuqꞌtxunchil tiꞌ visotz qꞌu yeꞌxtxojla chaj txumbꞌal utz, tiꞌ vixeꞌt vibꞌantu u tijleꞌm u Jesuus tu u vatz amlika txꞌavaꞌ tu 1,000 yaꞌbꞌ.

13) 21.1—22.5 Nital tiꞌ u tenam Jerusaleen vaꞌl kuꞌl tu Amlika.

14) 22.6-21 Tu tek itzojpebꞌal, nitꞌoyon u Jesuus utz, nitaqꞌ nimal ikꞌuꞌl qꞌu niman tetz.

QꞌU KAM IBꞌAXABꞌSA IKꞌUCHAXU TIOXH TU U XHAN (Apocalipsis)

Viqꞌilal qꞌu sikꞌlen tetz u uꞌ tzaꞌ

1 Aꞌ qꞌu kam ikꞌuch u Tioxh tu u Jesucristo tzaꞌ, qꞌuꞌl saꞌtexhuchi. Ech satootzaji qꞌu niman tetz. Aatz u talax iꞌan u Jesuus, aꞌ ichaj maꞌl u aanjel xeꞌ u Xhan, u taqꞌonom, ul tal te. 2 Tan aatz u Xhan, paxsanich nal tetz u yolbꞌal Tioxh vaꞌl ichuska u Jesuus. Ech aꞌ nialon kajay qꞌu kam qꞌuꞌl tila. 3 Chiꞌbꞌebꞌal tetz qꞌu aanima qꞌuꞌl nisikꞌlen utz, niabꞌin u yolbꞌal Tioxh vaꞌl bꞌaxabꞌsamal talaxeꞌ tzaꞌ utz; ninima qꞌu kam tzꞌibꞌamalka. Tan ninajabꞌ u tiempo aas satzojpi.

Viqꞌilal bꞌen juj tanul qꞌu niman tetz u Jesuus tu Aasia

4 In Xhan, nuntzꞌibꞌa opon qꞌu yol tzexeꞌ tzaꞌ, juj tanul ex niman tetz u Jesuus atilex tu jujvaꞌl qꞌu tenam tikuenta Aasia.* Taqꞌ koj vibꞌaꞌnil u Tioxh sete. Utz at koj u paas tetaanima, vaꞌl nitaqꞌ u Tioxh, Tioxh tetz oꞌte, tetz cheel utz, tetz taabꞌaꞌbꞌen. Aꞌ imol nitaqꞌeꞌ jujvaꞌl u Tioxhla Espiiritu atil vatz u chꞌuxhlebꞌal tetz qꞌesala. 5 Utz aꞌ imol u Jesucristo, u txakbꞌaꞌn tetz inujul qꞌu kam ilel taqꞌo. Ayaꞌ vaꞌl taꞌxh maꞌl aas bꞌaxa qꞌaav itzꞌpinaj xoꞌl qꞌu kamnaj. Aꞌ u mam qꞌesala vaꞌl paalchu vatz kajay qꞌu ijlenal tu u vatz amlika txꞌavaꞌ. Tan vetiꞌan tii qiꞌ. Vetichitpuꞌoꞌ tu qꞌu kupaav tu vikajal el qiꞌ. 6 Vettaqꞌbꞌenoꞌ ikꞌaol imeꞌal kꞌatz u Tioxh, viTat utz, vettaqꞌbꞌenoꞌs oksan yol siatz. Ech saꞌaqꞌax itechalil. Utz saꞌaqꞌax iqꞌesalail bꞌenamen, ech koꞌxh ibꞌenaꞌ. Aꞌi.

7 Ech abꞌitaj tan, tul Jesuus tu sutzꞌ. Utz kajay aanima siꞌilon. Antu siꞌilon qꞌuꞌl iꞌan chiꞌ ikꞌuꞌl tiꞌ. Utz jatvatzul qꞌu aanima atil tu u vatz amlika txꞌavaꞌ tzaꞌ, toj nal motx txumunoj tan, yeꞌt motx inima. Aꞌi echi.†

8 —In viXeꞌtebꞌal utz, in viYaꞌtebꞌal.— Chu u kuBꞌaal, u Mam Tioxh tetz oꞌte, tetz cheel utz, tetz taabꞌaꞌbꞌen.‡

U visioon til u Xhan tiꞌu techalla tatin u Jesuus

9 In Xhan niman tetz u Jesuus setuchꞌ. Ela nikupaal tu tzaꞌl; ela nikuchꞌia viQꞌesalail u Tioxh. Utz txaypꞌin tiꞌ u yolbꞌal Tioxh, tiꞌ ipaxsal itziiul vinujul, ayaꞌ u Jesucristo. Ech txaypinajichꞌin tu u sepkin txꞌavaꞌ Patmos nikꞌa mar. 10 Utz aatz iꞌan tu maꞌl u ilanbꞌal qꞌii, tiira atich u Tioxhla Espiiritu sunkꞌatza. Ech vabꞌi maꞌl u yol tiꞌ unqul. Techal iqetuneꞌ, echaꞌ trompeta. 11 Tal ve ech tzaꞌ: —In vibꞌaxa utz, in viyaꞌtebꞌal. Pek aatz cheel, tzꞌibꞌa tu uꞌ kajay qꞌu kam niileꞌ naabꞌi. Utz aqꞌ bꞌen xeꞌ juj tanul qꞌu niman tetz u Jesuus tu qꞌu tenam tikuenta Aasia. Ayaꞌ qꞌuꞌl tzaꞌ: u Eefeso, u Esmirna, u Peergamo, u Tiatira, u Sardis, u Filadeelfia utz, tuchꞌ u Laodicea.— Texhtuꞌ.

12 Uncheeꞌ unpilqꞌu tek vibꞌ tiꞌ isajileꞌ abꞌil vaꞌl nichqꞌilanin. Utz vil jujvaꞌl tatibꞌal txijtxubꞌal, bꞌaꞌnla qꞌan chꞌichꞌ.§ 13 Utz atich maꞌl u aanima tixoꞌl jujvaꞌl u tatibꞌal txijtxubꞌal tziꞌ, echaꞌ u Kꞌaola tiloneꞌ vaꞌl bꞌennaj koꞌn aanima. Yaꞌnaj kuꞌl u toksaꞌm xeꞌaj tajan. Utz paalnaj vaꞌt penkin bꞌaꞌnla qꞌan chꞌichꞌ vatz taanima.* 14 Aatz viviꞌ tuchꞌ qꞌu xiꞌl iviꞌ, tiira poloxh saj. Echaꞌ puykin saj laana utz, echaꞌ tilon saj bꞌatz. Aatz qꞌu bꞌaqꞌ iatz, echaꞌ xamal. 15 Aatz qꞌu tajan, echaꞌ tzꞌuꞌkin qꞌan chꞌichꞌ vaꞌl toojaneꞌ aas anal teluꞌl tu tzaqꞌebꞌal chꞌichꞌ. Utz aatz ijeꞌ iviꞌ tiyoloneꞌ, echaꞌ ijelun chukchaj mam nimaꞌ. 16 Aatz tu sebꞌal iqꞌabꞌ, atich jujvaꞌl txꞌumiꞌl. Utz aatz titziꞌ, niteluꞌl maꞌl u espada, kaꞌl tee. Aatz vivatz, techal ikꞌajoneꞌ, echaꞌ ikꞌajon u qꞌii tziꞌ aas aqꞌel iviꞌ.

17 Ech taꞌxh vila, yakich xhalkꞌojkuꞌin vatz tajan, ech tek in kamnaj. Ech taqꞌ jeꞌ u sebꞌal iqꞌabꞌ vibꞌa. Ikanin utz, tal ve ech tzaꞌ: —Yeꞌ koꞌxh xoꞌvaxh. Tan in viXeꞌtebꞌal utz, in viYaꞌtebꞌal. 18 In vaꞌl kamin, loqꞌ itzꞌlelin cheel. Utz bꞌenqꞌii bꞌensaj tek vatineꞌ. Aꞌi. Ayeꞌn u laave tunqꞌabꞌ tetz u kamchil utz, tetz u choobꞌal paav.

19 Pek tzꞌibꞌa qꞌu kam vetiilluka, qꞌu kam niil cheel tzaꞌ utz, tuchꞌ qꞌu kam qꞌuꞌl siil tiꞌ qꞌu kam tzaꞌ. 20 Aatz u tokebꞌal jujvaꞌl qꞌu txꞌumiꞌl qꞌuꞌl vetiil tunsebꞌal, ayaꞌ qꞌu aanjel tetz jujvaꞌl qꞌu niman vetz. Utz aatz u tokebꞌal jujvaꞌl u tatibꞌal txijtxubꞌal vaꞌl bꞌaꞌnla qꞌan chꞌichꞌ, ayaꞌ juj tanul qꞌu niman vetz.— Texh ve.

*1:4 Aatz vaꞌl ikuenta Aasia nital tzaꞌ tziꞌ, Turquia tek ibꞌii cheel.

†1:7 Choktaj u Zacarias 12.10.

‡1:8 Aatz u yol “viXeꞌtebꞌal” nital tzaꞌ, ayaꞌ u yol “alfa” tu griego. Utz aatz u yol “viYaꞌtebꞌal” nital tzaꞌ, ayaꞌ u yol “omega” tu griego.

§1:12 Aatz u jujvaꞌl tatibꞌal txijtxubꞌal nital tzaꞌ, ayaꞌ vaꞌl nital u Leviitico 24.1-4. Maꞌl koꞌn tajan atile, pek jujvaꞌl viviꞌ. Aatz junun qꞌul iviꞌ tziꞌ, jolol julkin tuul. Tan aꞌ nichkuꞌk u aseite tuul, u taꞌl olivo vaꞌl nichtoyveꞌ.

*1:13 Aatz u penkin bꞌaꞌnla qꞌan chꞌichꞌ tziꞌ. Qitzbꞌalich xeꞌaj uul. Nichibꞌanbꞌe vinaj tuchꞌ ixoj. Echaꞌ sincho nitxakunku tu qꞌu vinaj utz, echaꞌ kꞌalbꞌal nitxakunku tu qꞌu ixoj. Atia tzꞌuꞌm vichiꞌl; atia bꞌuꞌj. Jat vatzulich koꞌxh iveeteꞌ. Pek aatzich u tetz u Jesuus vaꞌl paalnajich vatz taanima tziꞌ utz, bꞌaꞌnla qꞌan chꞌichꞌ vichiꞌl. Aꞌ tokeꞌ aas tetz mam qꞌesala.