6
Nan Ipabahol Apo Dios ad Israel hi Kulti
Hay Mun'ihtiguh Kulti
1 Ya ha"in an hi Micah ya inali' di,
“Donglon tu'u nan ipabahol Apo Dios ay ditu'un holag Israel ti inalinay,
Mundadaan ayun holag Israel ta ipa'innilayuy pambalyun Ha"in hi kulti
ta paddungnay ihtiguan nan aduntuduntug ya nan dudunduntug nan alyonyu.
2 At da'yun aduntuduntug ya donglonyu nan ipabahol'un Dios hinan holag Israel,
ya middum ayun nipabunan tun lutan adi mapogpog
* ti idiklamu' nan tatagu'.”
Hi Apo Dios di Mahhun an Humapit hi Kulti
3 Ya inalin Apo Dios di,
“Mahhuna' an humapit hi kulti, ya alyo' di,
Da'yun tatagu', ngadan di inat'uh nappuhin da'yu?
Undan pinaligat'u da'yu?
Agayu ta tabolona'!
4 Ha"in di nangekak ay da'yud Egypt,
ya binaliwa' da'yuh din nahbutanyuh di.
Ya la'tot ya hennag'u da Moses ay Aaron, ya hi Miriam goh ta impangulu da'yu.
5 Da'yun tatagu' ya nomnomonyu din aat di ninomnom Balak an alid Moab hi atonan da'yu
ya nan nambal Balaam an hina' Beor.
† Ya nomnomonyu goh din na'na'at hinan dalan an nete"ah nan siudad ad Shittim
‡ ta engganad Gilgal
§ ta innilaonyuy aat di nahamad an inat'un Dios an namaliw ay da'yu!”
* Nan i'Israel di Mehnod an Humapit hi Kulti
6 Ya nan holag Israel di mehnod an humapit hi kulti,
ya inalidan Apo Dios di,
“Hay e'nongmi mah ay He"an wad abuniyan hinan umuymi pundayawan ay He"a?
Mabalin nin an hay uyaw an bakan ohay tawonay idatmih Onong an Moghob?
7 Mu undan nin umamlong'ah unmi idat an e'nong di linibuh nan buta'al an kalnilu
ya nan do'ol an lanan olibo an umat hinan do'do"ol an wangwang?
Ya umamlong'a mah hi unmi e'nong nan pangpangullun imbaluymi ta way a'aliwan di baholmi?”
† Hi Micah di Mehnod an Humapit hi Kulti
8 Ya ha"in an hi Micah di miyatlun humapit hi kulti,
ya tabolo' nan i'ibba' an holag Israel an alyo' di,
“Da'yu ya adi ahan umat hinay panapityu
ti hi Apo Dios ya impa'innilanan ditu'un tatagu nan ma"aphod hi aton tu'u!
Ya umat hituy pohdonah aton tu'u:
Mahapul an nan makulug di aton tu'u,
ya mahapul an minaynayun di pamhod tu'un Apo Dios ya hinan tatagu,
ya mahapul an impa'ampa tu'uy odol tu'u ta nan pohdon Apo Dios di aton tu'u!”
Hi Apo Dios di Mehnod an Humapit hi Kulti
9 Ya hi Apo Dios di mehnod an humapit hi kulti ta ituluynan idiklamu nan tatagunan alyonay,
“Da'yun tatagud Jerusalem ya donglona' hi un ayu nanomnoman
ti honogo' ay da'yu nan i'Assyria ta diday manuplit ay da'yu,
‡ at ihamadyu ta Ha"in di ita'otyu!
10 Mu un'u dan aliwan nan nangatyun tatagu'
an hay nalpuh nan kinulukyu
ya nan nibahhaw an kiluanyuy immadangyananyu?
11 Ti undan aliwa' di bahol nan tagun mungkumildun
mangusal hinan adi makulug an halub ya nan kiluan?
12 Ya mabubungot goh udot nan adadangyan ay da'yu,
ya an amin ayun iJerusalem ya impa'enghayun munlayah!
13 At hiyanan ad ugwan ya ete"a' an mummoltan da'yu
ta mun'a'ubah ayu an dumalat nan baholyu!
14 Ya ta"on hi un ayu mangamangan mu adi ayu mabmabhug,
at huminahinaang ayu damdama.
Ya ta"on hi un way italeponyu mu mi'id an ma'u"ubah damdama
ti nan italeponyu ya hiyay hamhamon nan umalin mi'gubat ay da'yu!
15 Ya muntanom ayu ay mu bo'on da'yuy mangngal hi bungana,
ya mumpugah ayu ay hinan olibo mu bo'on da'yuy mangusal hinan lana,
ya mun'iwa' ayu ay hi greyp mu bo'on da'yuy manginum.
16 Ya manu ay ma'at hana ti inyunnudyuh din na"appuhin ugalin din Alin hi Omri,
§ ya nan imbaluyna an din Alin hi Ahab,
* ya din tutulangna goh.
† At hiyanan moltao' da'yu ta mabainan ayu an hinhannulon da'yu,
ya ngohoyon da'yun amin hinan tatagu.”