1 Madayaw hi Apu Dios.

Ta hiya nan munhana ta'u i hiya an gapuh nan amaphodna ya nan munnananong an pamhodna.

2 Ya ma"id ha taguh abalinanan uhuhon an namin nadan nakaskasda'aw an ina'inatna.

3 Ot mipa'amlong nadan tataguna an manginaynayun an mangat hinadan nipto' an pangat.

4 Ot adiya' bahan linglingon Apu Dios hitun pamoddangam hinadan tatagum an nibalud ta ta'on on ha''on ya ihwanga'.

5 Ta wan tigo' di pumhodan di pi'taguwanmin pinto'mun tatagum ta wan mi'yam'amlonga' i dida ya midduma' i dida an mundayaw i he"a.

6 Abulutonmi an numbahul ami te adi ahan maphod nadan ina'inatmi an umat ami damdama i handidan a'ammodmi.

7 Te hidin awadandah ad Egypt ya adida nomnomnomon nan ulem i dida ya ta'on on hanadan dakol an inatmun milagro.

Ta nginhe da'a i dida hidin nipotto'dah nan baybay an mumbolah.

8 Mu ta'on on athidi ya inihwang damdaman Apu Dios dida te hiyay imbagana tuwali.

Ya ta wan ma'innilaan di atagutagu an hiya ya ongal di abalinana an Dios.

9 Te ammunay himmapitana ya nunhi"an nan liting hidih nan baybay an mumbolah ot magananan ay lutah nan agge naboblayan ta nangi'wandan immagwat.

10 Ta inihwangna didah nadan binuhulda.

11 Mu hanada'en binuhulda ya nun'a'altingda an ma"id ha ta'on hi ohah nihwang.

12 Ta i diye ya patiyonda mohpe nadan imbagan Apu Dios ta ikankantada mohpey pundayawdan hiya.

13 Mu agge bo nadne ya lininglingda dadiyen inat Apu Dios ta dida on inatday pinhoddan aton an adida haddon di ipa'innilanah atonda.

14 Te hidin awadandahdih nan agge naboblayan ya hay anonda ahan di nonomnomonda ta pinanatnaday abalinana an Dios.

15 Ot idat Apu Dios nadan ibagada mu impatnudna han pumaten dogoh ta dakol di nun'a'aten dida.

16 Ya i diyen awadandahdih nan agge naboblayan ya nunhiglay amohda i Moses ya ta'on on hi Aaron an pinto' Apu Dios hi padi.

17 Ta hiya nan natommang nan luta ot ma'uhbung hi Datan ya hi Abiram an didah nadan pamilyada an gapu i diyen inatda.

18 Ya wada bo han apuy ot pu'ulana nadan udum an adi maphod di pangatda.

19 Ya hidi bon nipto'dah nan billid hi ad Sinai* 106:19 Hay ohah ngadan diyen billid ya Horeb ya nangapyada i han balitu' an ing'ingoh di baka ot hiyay dayawonda.

20 Ta hiya nan ingnganuy nan na'abbaktun Dios dida.

Ot han ing'ingoh di bakan mangan hi holo' di dayawonda.

21 Ta lininglingda nadan dakol an inat Apu Dios an nangihwang i dida hi awadandah ad Egypt

22 ya ta'on on nan milagro an inatnah din nipotto'dah nan baybay an mumbolah.

23 Ta gapuh bungotna ya alyonay dadagona dida.

Mu gapu ta numpahmo' hi Moses an pinto'nan baalna ya aggena dinadag dida.

24 Indani mo ahan ya timmakutda ta adida pohdon an umeh nan maphod an boble an alyon Apu Dios hi idatnan dida te ma"id ha dinoldah nadan imbagana.

25 Ta ahingongododahdih nan nun'allunganda ya adida unudon nadan imbagana hi atonda.

26 Ta hiya mo nan imbagan Apu Dios an patayona didahdih nan agge naboblayan

27 ya inwakatna nadan imbabaleda hi abobboble ta hidiy atayanda.

28 Ya hidi bo udot an wadadah ad Peor ya eda niddum hinadan tatagu an mundayaw i Baal ot mi'mi"andah nadan nidawat i dadiyen ma"id ha linnawadan dios.

29 Ta nunhiglan impabungotdah Apu Dios an gapu i dadiyen adi ahan maphod an ato'atonda.

Ta hiya nan impa'alin Apu Dios han nunhiglan dogoh ta dakol di nate i dida.

30 Ta ingganaot dusaon Pinehas nadan numbahul ot ahi mohpe duminong hidiyen dogoh.

31 Ta ingganah ad uwani ya adi linglingon di tataguh diyen maphod an inat Pinehas.

32 Ya hidi bon awadandah nan way obob an nungngadan hi Meribah ya impabungotda boh Apu Dios.

Ta dida mannot di gimmalat hi numbahulan Moses.

33 Te gapuh nungngohayandah nan Espiritun Apu Dios ya impaboholdah Moses ta waday nibahhon imbagana.

34 Ya imbahhoda bo nan imbagan Apu Dios an patayonda nadan tatagun numpunhituh nadan boblen idatnan dida.

35 Ot mi'yahawada bo udot nadan linala'i hinadan binabaihdi ot ma'ma'yatda hinadan adi maphod an ato'atonda.

36 Ta paddungnay naknada te eda nundayaw hinadan iniphod di tagun dayawon dadiyen bimmoble.

37 Ta ta'on bo udot on hanadan imbabaleda on ini'nongda i dadiyen diosda an didimunyu.

38 Ta gapuh nan dalan dadiyen u"ungan immayuh an ini'nongda i dadiyen dayawon nadan i Kanaan ya mibilang moh nalugit hidiyen boble.

39 Ta ta'on moh on dida ya mibilangdah nalugit i diyen inatda.

Te paddungnay nunluktapda te inwalongdan mangunud i Apu Dios ot hanadan udum an dios di dayawonda.

40 Ta hiya nan nunhiglay bungot Apu Dios i dida an pinilina hi tataguna.

41 Ta hiya nan impa'abakna didah nadan binuhulda ta dadiyen binuhulda moy numbalin hi ap'apuda.

42 Ta nunhiglay namalpaligatdan dida te numbalindah baal i diyen boble.

43 Ta athidi an ta'on on agagga on inihwang Apu Dios dida mu apyanan mungngoheda ta dadiyen numbahulanday gapunah nadadaganda.

44 Mu wa'e damdama ta numpahmo'da on himmo' Apu Dios dida

45 te mipapanomnom i hiya din imbagana i handidan a'ammodmi.

Ya gapuh nan ongal an pamhodna ya himmo'na dida.

46 Ta numbalinona hi ma'ule i dida nadan binuhulda.

47 Ot hanat boddangan da'mi bahan Apu Dios ta ta'on on idanay bobleh awadanmi ya pa'anamuton da'mi ta ma'amung amih nan boblemi.

Ta wan he"a an nahamad an Dios di dayawonmi ya punhanaanmi.

48 Ot hanat hi Apu Dios an dayawon ta'un tinanud Israel di madayaw hi ingga'inggana.

Ya hanat an namin ta'un tatagu ya alyon ta'uy, Amen.

Madayaw hi Apu Dios.