1 He''a Apu Dios di paddungnay ihi''uga' ot hanat adim bahan iyabulut an ma'abaka' ta adiya' mibabain.

2 Ot he''a an nipto' di pangatna ya donglom bahan di dasal'u ta boddangana' ta mihwanga'.

3 Te he''a nimpey paddungnay doplah an e' ihi"ugan ya he"a nan paddungnay nahamad an binattun alad an manandi i ha"on.

4 Ot hanat ihwanga' hinadan mun'abubungot ya adi maphod di pangatda.

5 Te nihipun hi a'unga' ya he''a tuwali an na'abbaktun Dios di nangidinla' hi nitaguwa'.

6 Ya nihipun tuwalih din awada' hi putun ina ya he"ay nangipanapto' i ha"on.

Ta hiya nan he"ay dayawo' hi inggana.

7 Ta hantun nitaguwa' di pangiyunnudan di udum te tinitinigoda an he"ay nangipanapto' i ha''on.* 71:7 Hay alyon di udum ya tumakutda an gapuh nadan tintinnigodan na'at i ha"on.

8 Ta hiya nan abigabigat ya he"ay daydayawo' ya hay amaphodmu ya anabaktum di haphapito'.

9 Ot hanat adiya' bahan iwalong hi ad uwanin na'amammaa' ya kimmapuya'.

10 Te nadan binuhul'u ya hanahapitonda hi'on nganney atondan mamate i ha"on.

11 Te alyonday ingnganuya' mo anun he"a Apu Dios ta hiya nan tiliwona' anu ot ma"id ha bumoddang i ha"on.

12 Ot hanat adiya' bahan taynan Apu Dios ya immali'aot ta boddangana'.

13 Ta hanadan ihikna an mamate i ha"on ya diday ma'abak ta madadagda ta mibabainda.

14 Mu ha''on'e ya nanongnan mundinola' i he"a ta hiya nan iyal'ala' an mundayaw i he''a.

15 Ta ma"id ha dindinong'un mangibanagbaggah amaphodmu ya nadan atom an mangihwang hi tatagu an ta'on on dakol nadan adi' ma'awatan hinan a'atmu.

16 Ot dayawon da'a an na'abbaktun Dios.

Ya ipa'innila' nadan dakol an maphod an ina'inatmu ta atiganan nipto' di pangatmu te ma"id ha udum hi umat i he"a.

17 Nihipun hi a'unga' ya intudduwana' i he"a ta hiya nan inaynayun'un mangipa'in'innilah a'atmu.

18 Ot hanat adiya' bahan iwalong Apu Dios an ta'on ona' ma'amamma ta ma'ubanana' ta way ato' an mangibagah nan ongal an abalinam hinadan mun'atanudan.

19 Hanan ongal an abalinam ya amaphodmu Apu Dios ya adi malukud an umat hi dinawwin di ad lagud.

Ya ma"id ha udum hi umat i he"a.

20 Ot ta'on hi inyabulutmuy dakol an nunligata' mu madinola' damdama an paphodom di nitaguwa' ta ta'on ona' mun'atte'atte ni' mu aggem inyabulut an mateya'.

21 Ya innila' an alubyagona' ya boddangana' ta mundongola' bo an umat handi.

22 Ot dayawon da'a an ma"aphod an Dios an dayawonmin tinanud Israel.

Te ma''id ha ibbahom hinadan ibagam.

Ot hinan pangikantaa' hi amaphodmu ya ipagangoh'u nan lira ya harp.

23 Ya olto' an mangikanta hi pundayaw'un he"a te he"ay nangihwang i ha"on.

24 Ta adi' idinong an mangipa'in'innilah amaphod di pangatmu.

Te hanadan ihikna an mamaten ha"on ya nibabaindah nangatmu te pamaag ya aggeda innilay atonda.