1 Apu Dios, he''ay paddungnay ihi''uga'.

Ta ihwanga' bahan hinadan binuhul'u an mamudupudug i ha"on.

2 Te onha adiya' ihwang ot ma"id ha bahhonan tiliwona' i dida ta eya' patayon ya nunggududay adol'u an umat hi pangat di layon.

3 Ot hi'on waday numbahula' Apu Dios

4 an umat hi waday inat'uh adi maphod hi ibba' an maphod di nangibilangna i ha"on onu waday pinloh'uh gina'un nadan mi'buhul i ha"on an ta'on on ma"id ha gapuna

5 ya ta'on attog hi'on ipadpapa' hinadan binuhul'u an mamudupudug i ha"on.

Ta patayona' ya inwagillangday adol'uh nan luta.

6 Ot agam bahan Apu Dios ta boddangana' ta he"ay mi'hanggah nadan mun'abubungot an binuhul'u ta ipatigom di bungotmun dida.

Ta ma'innilaan hi'on ha"on onu diday numbahul.

7 Ot hanat amungom an namin nadan tatagu an ta'on on wa'ahna hi ad abunyan

8 ta humalyaom dida.

Ta wan ipa'innilam an ma''id attog ha bahul'u te ma"id ha inat'uh adi maphod.

9 He''a Apu Dios ya nipto' di pangipanuhmuh tatagu te innilam tuwaliy wah nomnommi.

Ot daan mo bahan ta padinongom nadan tatagu an mangamangat hi adi maphod.

Ya hanat palinggopom di nitaguwan nadan mangun'unud i he''a.

10 Hi Apu Dios ya paddungnay hapiyo' te hiyay mangih'ihwang hinadan na'unud i hiya.

11 Ya nipto' nimpey atonan mangipanuh hi tatagu.

Ta ma"id ha bahhonan dusaona nadan mangmangngat hi adi maphod.

12 Ot adi'e idinong nadan tatagu an mangat hi adi maphod ya haiton Apu Dios nan ispadana ya indadaana nan panana.* 7:12 Hay pangalin di udum hinan pana ya bokang ya hana'en papan ya guttiting.

13 Ta nidadaan nimpe nadan almasna ya ta'on on nadan mundalang an papan nadan panana.

14 Ot nomnomnomonyu an nan tagun adi maphod di pangatna ya numanomnom hi adi maphod hi atona ya kulukonay ibbana.

15 Mu palpaliwana damdama ya dadiyen ato'atona ya paddungnay bitu an hay adolnay bituwona.

16 Ta nadan adi maphod an ninomnomnan aton hi udum ya hiyay a'atana.

17 Munhanaa' i Apu Dios hinan nipto' an pangatna.

Ya ikankanta' di pundayaw'un hiya an na'abbaktun Dios.