1 Munhana ta'un Apu Dios te hiya ya maphod di pangatna.

Ya munnananong di pamhodnan dita'u.

2 Ot an namin ta'un tinanud Israel ya hanat alyon ta'u di, Immannung an munnananong di pamhod Apu Dios.

3 Ya ta'on on da'yun padin Apu Dios ya hanat alyonyuy,

Immannung peman an munnananong di pamhod Apu Dios.

4 Ta an namin ta'un mundayaw i Apu Dios ya alyon ta'uy, Immannung peman an munnananong di pamhod Apu Dios.

5 Hidin nunhiglay punholholtapa' ya numpahmo'a' i hiya ya dingngolnay dasal'u ot boddangana'.

6 Ot gapu ta hiyay nanongnan bumoddang i ha''on ya adiya' tumakut an ta'on on nganney aton di tatagun ha"on.

7 Te madinola' an gapuh boddang Apu Dios ya ma'abak nadan binuhul'u.

8 Ta hiya nan udu'dulnay hi Apu Dios di pundinolan ta bokon hay tatagu.

9 Udu'dulna nimpey hiyay pundinolan ta bokon hanadan ap'apuh tun luta.

10 Te ta'on on lini''ub da'mi hi dakol an binuhulmin nalpuh abobboble ya inabakmi dida an gapuh nan abalinanmi an indat Apu Dios.

11 Ot ta'on nimpeh on athidin lini''ub da'mi i dida mu inabakmi dida an gapuh boddang Apu Dios.

12 Ta ta'on onda ay iyukan an nili'woh i da'mi ya nalakay nangabakanmin dida an gapu nimpeh nan abalinanmi an indat Apu Dios ta nun'a'ateda an umatdah nan holo' an ni'bagan nagbu.

13 Manu te inlaputdan ni'gubat ta ay ami ma'abak mu gapuh boddang Apu Dios ya agge da'mi inabak.

14 Te hiyay mangmangdat hi bikah'u ya abalina' ta nihwanga'.

15 Ot deen madngol di kantan nadan ibba' an mangun'unud i Apu Dios hidih nan kampuda.

Te nunhiglay amlongda hi nangabakanmih nadan binuhulmi an alyonday, Ongal di abalinan Apu Dios an mamoddang i dita'u.

16 Ta gapuh boddang nan ongal di abalinanan Dios ya nangabak ta'u.

17 Maphod ta aggeya' ni' nate ta wan ipa'innila' datuwen inat Apu Dios.

18 Ta ta'on on nunhiglay nundusana ni' i ha"on mu maphod ta aggena inyabulut an mateya'.

19 Ot ibughulyu nan Templo ta wan e' dayawon hi Apu Dios.

20 Nan Templon Apu Dios ya ammuna nadan mangun'unud i hiya hi mabalin an hunggop hidi.

21 Ot munhanaa' i Apu Dios hi nangngolanah dasal'u ot ihwanga'.

22 Waday nibaga an alyonay, Hanan batu an agge pinhod nadan mangapyah balen usalon ya onnot on hidiye otahan nan nahamad hi pangipabunan hi bale.

23 Hi Apu Dios di nangat ituwe ya umipa'amlong i dita'uh tuwen inatna.

24 Ta hituwen algoy nangipatiganah nangabakana ot hanat mun'am'amlong ta'u.

25 Ya hanat inaynayunmun mangihwang i da'mi Apu Dios ya wagaham an namin di atonmi.

26 Ot mipa'amlong nan tagun umalin mundayaw i he"a Apu Dios.

Ya ta'on on da'min wahtun pundayawan i he"a ya dayawon da'a an Ap'apu.

27 Hanan Dios an Ap'apu ta'u ya maphod di inatnan dita'un tataguna.

Ot hanat mapong ta'uh tubun di palma ta mun'am'amlong ta'un munli'li''odan hinan pangidawatan hi mi'nong.

28 He''a Apu Dios di daydayawo' ya he''ay punhanaa'.

Ya e' ipa'pa'innila nan anabaktum an Dios.

29 Ot hanat an namin ta'u ya munhana ta'un hiya te hiya ya maphod di pangatna.

Ya munnananong di pamhodnan dita'u.