1 Pinpinhod'uh Apu Dios te donglonay dasal'u ya nan pumpahpahmo'a' i hiya.

2 Ta hiya nan hiyay pumpaboddanga' hi inggana.

3 Te wada han alyo' on mateya' ta nunhiglay takut'u ya minomnomana'

4 ot mumpahmo'a' i Apu Dios ta ihwanga' i hiyah ate.

5 Ya immannung peman an ongal di pamhodna ya homo'na.

6 Te boddangana nadan mahmo' an umat i ha"on an hidin mun'atte'atteya' ya inihwanga' i hiya.

7 Ot alyo' hi nomnom'uy, Madinola' te ongal di pamhod Apu Dios i ha"on.

8 Te inihwanga' hi ate ya pinogpogna nadan punligata' an mangipaluwa i ha"on.

Ya aggena inyabulut an abakona' hinadan binuhul'u.

9 Ot ad uwanin amatagu' ya pohdo' an hi Apu Dios di nanongnah unudo'.

10 Ta'on tuwalih on hidin nunhiglay punholholtapa' ya nanongna an hiyay pundinola'.

11 Te hidin nunhigla nimpey inomnoma' ya inali' di, Ma"id ha taguh mabalin hi pundinolan te ammuna tuwalih Apu Dios an mabalin an pundinolan

12 Dakol di inat Apu Dios i ha"on hi iphoda'.

Ot nganne nin pibo ha mabalin hi idawat'u i hiya?

13 Nomnomnomo' an iye' ha ma'inum ta midawat hi punhanaa' i hiya hi nangihwanganan ha"on.

14 Hay pangata' ituwe ya hinan a'am'amunganmih nadan ibba' an tataguna.

15 Innila' an nunhiglay ena umukayungan hi'on waha mateh nadan tataguna.

16 Ha"on an baalmu Apu Dios ya munhilbiya' i he"a an umat hi inat din hi ina te inihwanga' i he"a.

17 Ya mundasala' i he"a ya idawat'u nimpe nadan midawat hi punhanaa' i he"a.

18 Ya hay pangata' nimpe ituwe ya hinan a'am'amunganmih nadan ibba' an tatagum

19 hidih nan way Templo hi ad Jerusalem.

Madayaw hi Apu Dios.