1 Apu Dios, he"ay dayawo' ot hanat donglom bahan di dasal'u.

2 Te nunhiglada tayya tudan ma'layyah an tatagu an dakol di layah hi ipabahuldan ha"on.

3 Ya dakol di ibagadah pamahbahdan ha''on an ta'on on ma"id ha bahul'un dida.

4 Ta'on on ipatigo' di naminhod'un dida mu apyanan ahiwawana' i dida mu adiya' damdama umengle an mangidasadasal i dida.

5 Maphod di pangat'un dida mu apyanan adi maphod di pangatdan ha"on.

Ya ipatigo' di pamhod'un dida mu apyana nimpe an ahiwawana' i dida.

6 Ot maphod nin Apu Dios hi'on waha piliyom i ha mapihhuwan an huwis hi munhumalya i dadiyen binuhul'u ya pinto'mu ha ma'layyah an tagun mangidalom i hiya.

7 Ya hanat humalyaonda'e ya mibaga an numbahul ya hanat ta'on on nan dasalna an pangita'dognah adolna ya mimamah numbahulana.

8 Ya hanat adi madne ya mapogpog di pi'taguwana ta wan waday mihukkat hinan sa'adna.

9 Ta mapuhig nadan imbabalena ya mabaluh ahawana.

10 Ya hanat mipalah'undah nadan imbabalena hinan nadadag an nunhituwanda ta eda humanawhawwangan an e umanod'oddoh anonda.

11 Ya hanat pun'alan nadan immutangana nadan nabalol an wadan hiya.

Ya hanat hanadan hintaguwan di mangalah nadan nablayana.

12 Ya hanat ma''id ha mammo' i hiya ya ta'on on hanadan napuhig an i'imbabalena.

13 Ta ma''id ha mabatih nadan imbabalena ta lo'tat ya ma"id ha uggan mabong'al i didan pamilya.

14 Ya hanat adim pakawanon nadan bahul di a'ammodna.

15 Ot hanat adim linglingon Apu Dios di numbahulandan himpamilya ta lo'tat ya ma"id nimpe ha uggan mabong'al i dida.

16 Te ma''id ahan ha homo' diyen taguh ibbanan tagu te paligatona on impapatena nadan nun'awotwot ya nadan mahmo' an tatagu.

17 Ya impa'inghanan mun'idut.

Ot hanat mumbangngad i hiya nadan idutna.

Ya ma"id tuwali ha oha ni'moh tagu hi winagahana.

Ot hanat adim mo wagahan.

18 Te hay idut di nun'onan hi nomnomna an ay limmamut hi adolna.

Te dadiyey nadadawoh ibagana an paddungnay liting onu lana an itmog di adolna.

19 Ot hanat dadiye nimpen idutna ya mibangngaddan hiya ta dadiyey ay mibalikis an mili'woh i hiya.

20 Ta hanadan hihimlonan ma'at i ha"on ya hiyay a'atana.

21 Mu ha"on'e ya hanat boddangana' ta ihwanga' ta mipatigoy anabaktum ya pamhodmun Dios.

22 Te nunhigla tayyan maligligatana' ya mahmo'a' ta hiya nan ma'ahhapul'uy boddangmu.

23 Te umata' mo ahan tee hi a"o an tuwen mama"id onu ba'atong an nalakan ma'abul.

24 Te kimmapuy di adol'u hi nun'ulata' ta teen na'appiguta' ta ma'attigoy tungal'u.

25 Ta tinigowa"eh nadan binuhul'u on munwigwigiwigda on nginihngihilana'.

26 Ot hanat gapuh nan ongal an pamhodmu ya boddangana' bahan.

27 Ta wan innilaonda an he"ay bumoddang i ha"on.

28 Ot ta'on on idutana' hinadan binuhul'u mu wagahana' i he"a ya ta'on on umalidan mangubat i ha"on mu mibabainda te diday ma'abak ta wan ha"on an baalmuy mun'am'amlong.

29 Ta mibabaindah ingga'inggana.

30 Mu ha''on'e ya nanongnay punhanaa' ya pundayaw'un he"a Apu Dios hinan a'am'amungan di tatagum.

31 Te he''a ya nundadaan'a an mamoddang hinadan mahmo' an tatagu.

Ta ihwangmu dida hinadan naminhod an mamate i dida.