1 Mun'am'amlong ami an mangikankantah pundayawmi ya punhanaanmi i he"a Apu Dios an na'abbaktu.

2 Ta amawmawi"it ya ahodohodom on ikankantami nan munnananong an pamhodmu ya nan a'atmu an adim ibahhoy imbagam hi atom.

3 Ta mungkankanta ami an idihhanmi an ipagangoh nan harp ya lira.

4 Mun'am'amlonga' Apu Dios an gapuh nadan inatmu ta hiya nan ikankanta' di pun'amlonga'.

5 Ya an namin nadan ato'atom Apu Dios ya ipa'innilanay anabaktum.

Ya naligat an ma'awatan nan wah nomnommu.

6 Ot hanan tagun paddungnay ma''id ha nomnomna ya adina ma'awatan

7 an hanadan adi maphod di pangatda ya umatdah nan holo' an mangintuttubu te diday kumakaddangyan mu hay umudi ya madadagdah inggana.

8 Mu he''a Apu Dios ya mun'ap'apu'a hi ingga'inggana.

9 Ta ma"id ha bahhonan abakom nadan binuhulmu an adi maphod di pangatda ta miwakatda.

10 Mu ha"on'e Apu Dios ya indattana' hi bikah'u an umat hi bikah nadan ma'ilom an animal.

Ya mun'am'amlonga' te winagahana'.

11 Tinigo' di nangabakam hinadan binuhul'un adi maphod di pangatda ya dingngol'uy tukukdan ahililili.

12 Hanadan umun'unud i Apu Dios ya pumhod di nitaguwanda ta umatdah nan kayiw an palma onu sedar hinadan billid an nungngadan hi Lebanon

13 an nitanom hinan way Templo an mangintuttubu.

14 Ta ta'on on mabayag ya mangimbubbungada ya mangintuttubuda ta umatdah nan pi'ittanom an munlangtay tubuda.

15 Ta hituwey ohan mangipatigo an hi Apu Dios ya nipto' di pangatna.

Ya hiya nan umat hinan doplah an nahamad hi ihi"ugan ya ma"id ha alyon hi mihallay pangatna.