1 Apu Dios, hanat boddangana' bahan te ma"id ahan ha abalina'.

2 Ha"on an baalmu ya na'unuda' i he"a ot hanat ihwanga' bahan te he"ay pundinola'.

3 Iyal'algo' an dumasadasal ot hanat hom'ona' bahan.

4 Ta pa'amlongona' an baalmu te he"a ya abuh han pun'amlonga' an dayawon.

5 Te he''a Apu Dios ya maphod di pangatmu ya nundadaan'an mamakawan hi bahulmi.

Te nunhiglay pamhodmu hinadan mumpahmo' i he"a.

6 Ot hanat donglom bahan Apu Dios tun dasal'u an pumpahpahmo'a' i he''a.

7 Hinan punligata' ya he"ay pumpahmo'a' te innila' an boddangana'.

8 Hi an namin nadan dios an dayawon nadan wah udum hi boble ya ma"id ha nipaddungandan he"a te adida abalinan an aton nadan abalinam.

9 Ta hiya nan an namin nadan limmum an tatagu an wah abobboble ya umalida ta mumpada''uldan he''a ya ipa'inniladay anabaktum an Dios.

10 Te he''a tuwali nan nabaktu ya ongal di abalinanan Dios an ma"id ha udum.

11 Ot hanat ituddum i ha''on nan pohdom hi ato' ta hanadan nipto' an tudtudum di nanongnah un'unudo'.

Ya he''ay inaynayun'un punhilbiyan.

12 Ya ato' an namin di abalina' an mundayaw i he"a Apu Dios ta nan anabaktum di ipa'in'innila' hi inggana.

13 Te he''a ya ongal di pamhodmun ha''on te inihwanga' hinan e''ot atayan.

14 Hanadan mumbaktu ya mun'abubungot an tatagu an ma"id ha pangibilangdan he"a ya nundadaandan mi'gubat te pinhoddan patayona'.

15 Mu he''a Apu Dios ya ongal di homo'mu ya ulem.

Ya adi hi kittang on bimmungot'a te munnananong nan pamhodmu ya pangipapto'mu.

16 Ot hom'ona' bahan ta ihwanga' ya pabikahona' ta way ato' an munhilbin he"a an umat hi inat ina.

17 Ot hanat ipatigom Apu Dios ha panginnilaa' hinan amaphodmun ha''on ta wan tigon'en nadan mi'buhul i ha"on ya bumainda te he''ay nangihwang i ha"on ya he''ay nun'alubyag i ha"on.