1 Hi Apu Dios an ongal di abalinana ya ay'ayyaganan namin di tataguh tun luta an mihipun hi tuluwan di algo ta ingganah alimuhan di algo.

2 Ya hiya an Dios ya nunhigla nan binangna hidih nan ma''aphod an boble an ad Zion.

3 Ya hitun umaliyana ya ma'attigo te waday malanglanggiyab an apuy hi hinangngabna.

Ya nunhigla han puwo' hi nunlini''odana.

4 Ya ibaganah nadan wah ad abunyan ya nadan tatagun nipto' di pangatdah tun luta ta tigonday punhumalyaanah nadan tataguna

5 an alyonay, Amungonyu nadan tatagu' an mangun'unud i ha"on.

Te dida nan nangali hi unudona' i dida hidin nangidawatandah i'nongdan ha"on.

6 Ya dadiyen wah ad abunyan di mangipa'innila an nipto' di punhumalyan Apu Dios hinadan tatagu.

7 Ot alyonay, Da'yun tatagu' an tinanud Israel ya hanat donglonyu tun ibaga' an numbahul ayun ha"on an Dios an dayawonyu.

8 Mu bokon hanadan i'nongyun ha"on di gapunah bumungota' i da'yu.

9 Te adi' mahapul hanadan baka ya gulding an i'nongyun ha"on an malpuh nadan halunyu.

10 Te ta'on on hanadan animal hinan muyung ya nadan bakah nadan nabillid ya ha''on tuwaliy ud bagi

11 an ta'on on hanadan hamuti.

Te an namin di waday yahyahnan wahtun luta ya ha"on di ud bagi.

12 Ot onha na'agangana' ot adi gahin hi ibaga' i da'yu

Te ha''on nimpey ud bagih tun luta ya an namin nadan wadahtu.

13 Ya adi' anon di baka ya adi' inumon di dalan di gulding.

14 Ot hay nahamad hi i'nongyun ha''on an nabaktun Dios ya hanan punhanaanyu ya hay pangatanyu hinadan insapatayun ha"on.

15 Ot wada'ey punligatanyu ya ihwang da'yu ta wan ha''on di dayawonyu.

16 Mu hanada'en adi maphod di pangatda ya alyon Apu Dios i dida di, Ma"id ha hilbin nan eyu uhu'uhuhon nadan tugun'u ya nadan tudtudu'.

17 Te da'yu'e ya adiyu damdama pohdon an mitudduwan ya ngohayonyu nadan ibaga' hi atonyu.

18 Ya wa'e ha tinigoyuh mangako on na'na'yat ayu.

Ya atbohdin midmiddum ayuh nadan mumpunluktap.

19 Ya hanadan adi maphod di pinpinhodyun haphapiton ya impa'inghayun lumayalayah.

20 Ya amod onyu tanumtumbu'on nadan ibbayu ya dakol di ipabahulyun dida.

21 Ta hiya danaey impa'inghayu.

Mu gapu ta pamaag'uy dindinong ya hay punnomnomyu ya umata' i da'yu.

Mu ad uwani ya ihingal da'yun ha''on ya ibaga' nadan bahulyu.

22 Ot da'yun nangiwalong an mangun'unud i ha''on an Dios ya hanat igongahanyu tun ibaga'.

Te onha inaynayunyun mungngohen ha"on ya ma"id ha bahhonan dadagon da'yu ya ma"id ha namnamaonyuh mangihwang i da'yu.

23 Mu wa'et un'unudonyu nadan tugun'u ya ihwang da'yu.

Ya hay umipa'amlong i ha"on ya hi'on inaynayunyun munhana i ha"on.