1 An namin nadan wadah ad lagud ya limmun Apu Dios.

Ya dadiyen limmunay atigan nan ongal an abalinana ya anabaktuna.

2 Ta hiya nan abigabigat ya ahodohodom ya ipa'pa'innilada nan la'ingna ya nan ongal nimpen abalinana.

3 Ta'on on adida humapit

4 mu nan a'atday mangipa'innila hi anabaktun Apu Dios hi abobboble.

Hi ad lagud di nangigopnadan Apu Dios hi iha''adan nan algo.

5 Ta tumuluh nan mawi"it an umat hinan lala'in mungkasal an mun'am'amlong ya umat hinan e mi'yabbak hi buttikan an umaptun bumtik.

6 Ta ihipunah nan tumuluwan di algo ta ingganah nan alimuhana ya wa'et pintangna on amtan an namin di tagu nan pudutna.

7 Hi Apu Dios ya ma"id ha nibahhoh nadan tuguna te pabikahonay nomnom di tagu.

Ya madinoltan mangunud te nan agge nanomnoman ya mabalin an manomnoman.

8 Ya nipto' hanadan tugun Apu Dios te hanadan mangunud i datuwe ya mipa'amlongda.

Ya paphodonay punnomnom di tagu.

9 Ot maphod on hi Apu Dios di dayawon di tatagu hi ingga'inggana.

Te an namin nadan tuguna nimpe ya nipto' ya ma''id ha pangipangngelana.

10 Ta na'ballolda mu hay balitu'.

Ya onha ipaddung hi makan ot inlumlumiihda mu hay danum di iyukan.

11 Datuwen tugunmu Apu Dios di mangipaphod hi pangat'un baalmu.

Ot innila' an waday gun'udo' an mangunud i datuwe.

12 Hay tagu ya palpaliwana on numbahul.

Ot hanat pakawanona' bahan Apu Dios hinadan numbahula' an agge' inatta.

13 Ya hanat boddangana' ta adi' aton nadan innila' an pumbahulan ya hanat bokon datuwey mun'onan hi nomnom'u.

Ta wan ma''id ha ato' hinadan adi maphod.

14 Ya boddangana' ta hanadan miyunnudan hinadan pohdom di nanongnah nomnomnomo' ya haphapito'.

Te he"a Apu Dios di mangih'ihwang i ha"on ya he"a nan paddungnay doplah an ihi"uga'.