3
Hanan Nahamad An Ulen Apu Dios
1 Ha"on an nangitudo' ituwe ya pinanatna' di ligat an gapuh bungot Apu Dios.
2 Te paddungnay impanguluwa' hinan munhihillong ot padallanona' hidi.
3 Ya nunhigla tun punligata' te paddungnay agaggaon hinuplita'.
4 Ta ay tayya naguduguduy tungal'u ya aya' na'amamma.
5 Ta nunhiglay hakit di nomnom'u an gapu i datuwen holholtapo'.
6 Te aya' e inha"ad i hiya hinan munhihillong an lubu'an di nun'a'ateh nabayag.
7 Ya ma"id bo udot ha ato' an e bumtik te paddungnay binangkilingana'.
8 Ya ta'on ahan ona' mumpahpahmo' an mumpaboddang i Apu Dios mu adina damdama donglon nan dasal'u.
9 Ya ayna hinawanan i ha natping hi batu nan awo' ta ma"id ha ato' an bumahhel.
10 Ta hay punli'na' ya hi Apu Dios ya umat hinan atatakut an bear onu nan layon an numbota' i ha"on hinan awon.
11 Ta paddungnay dimpapa' ot guyuguyudona' ot hillehilleyonay adol'u ot ahiya' taynan.
12 Ya paddungna boy immali ot idongdongnan ha"on nan napaud an panana
13 an nun'alana nadan papan ot pumpanaa' ta numpangahalomdah adol'u.
14 Ta ngihngihilana' hinadan ibba' an tatagu on inyal'algodan mangitaltalyah pamihuldan ha"on.
15 Ta nunhiglay nunligata' an paddungnay impa'inumana' i Apu Dios i han ma'apa"it.
16 Ya paddungna boy nun'ilaita' hinan pito' on nun'itimoga' hinan batu ta nun'apugupug di boba'.
17 Ta gapu i datuwen na'at i ha"on ya ma"id mo ha poto' di nomnom'u an agge' mo innilay a'at di linggop.
18 Ta alyo' hi nomnom'uy, Ma"id mo ahan ha abalina' ya adi' mo namnamaon di e pamoddangan Apu Dios i ha"on.
19 Te nomnomnomo"e nadan nunligata' ya nan nidawwiya' hinan numboblaya' on mahkit ahan hi e' punnomnoman.
20 Ya nunhiglay e' umukayungan.
21 Mu immali'e damdama nan maphod an punnomnom'u on nalmuy dinol'un Apu Dios.
22 Te ma"id ha pogpog di ulena ya adi maluman nan munnananong an pamhodna
23 an paddungnay baluh abigabigat. Te an namin di ibagana ya adina ibahhon aton.
24 Ta hiya nan alyo' hi adol'uy, Hi Apu Dios ya ammunay mahapul'u ot hiya ya ammunay pundinola'.
25 Te maphod di atonah nadan mangidinol ya mundayaw i hiya.
26 Ot maphod on anusan ta'un mannod hinan boddang Apu Dios.
27 Ta ihipun ta'u hinan a'unga ta'u an mangipa'ingha an mangitpol hi punligatan.
28 Ta wa'e ha ligat ya namaag ya dindinnongan ta'u ya inyukod ta'un Apu Dios.
29 Te hiya'ey pangiyukodan ya boddangan ditan hiya.
30 Ta ta'on hi tampu'on dita'uh nadan binuhul ta'u on pinadngolan dita'u ya namaag ya inhulug ta'u.
31 Ot hi Apu Dios ya ongal di homo'na an adi dita'u inganuy i hiya hi inggana
32 an ta'on on iyabulutnay punligatan ta'u mu hom'on dita'u damdama an miyunnudan hinan adi maluman an ongal an pamhodna.
33 Te hi Apu Dios ya adina pun'amlongan nan e ta'u punligatan ya inomnoman
34 an umat hinan e ta'u apaligatan hi baludan
35 onu nan adi a'atan nan pohdon Apu Dios an ma'at i dita'u.
36 Ya adina bo pun'amlongan hi'on kulukon dita'uh kasu.
37 Mu ta'on on athidi ya gahin on hi Apu Dios damdamay mangiyabulut on ahi mabalin an ma'at.
38 Te mabalin an iyabulutna an ma'at nadan maphod ya ta'on on nadan adi maphod.
39 Ot adi ta'u munlili hi'on nadusa ta'u an gapuh nadan numbahulan ta'u.
40 Ot daan mo ta nomnomon ta'u tun pangat ta'u ta ibangngad ta'un mangun'unud i Apu Dios.
41 Ta iyukod ta'un namin di nitaguwan ta'u i hiya ta alyon ta'uy,
42 Abulutonmin numbahul ami i he"a te nginhe da'a ta hiya nan agge da'mi pinakawan i he''a.
43 Ta gapuh bungotmu ya ay da'mi inunu'unud hinadan nangayanmi on numpatem di udum i da'mi an ma"id ha homo'mu.
44 Ya paddungnay nipa"e'ah nan ma"uktul an bugut ta adim donglon di dasalmi.
45 Ya inyabulutmu bo udot an hay panigon di tataguh udum an boble i da'mi ya ay ami ginalut an ma"id ha hilbina.
46 Ta pinanadngolan da'mi on bina'bain da'mih nadan binuhulmi.
47 Ta nunhiglay takutmi an paddungnay nabitu ami te nunhigla tun punligatanmi ya hay emi nadadagan.
48 Ta nunhiglan umanayyuhan di luwa' an gapuh nadadagan nadan ibba' an i Judah.
49 Ta lumuwaluwaa'
50 ta ingganay uhdungan da'mi i Apu Dios ta hom'on da'mi.
51 Te tinigo"e nan inat nadan binuhulmih nadan tataguh ad Jerusalem* 3:51 Hinan alyonah tataguh ad Jerusalem ya hay alyon di udum ya nadan binabai hi ad Jerusalem. on nunhiglan minomnomana'.
52 Ta aya' tayya hamuti an eya' huluhuluwon hinadan binuhulmi an ta'on on ma"id ha gapuna.
53 Ya paddungnay inuhbunga' hinan bitu ot tongabondah batu.
54 Ya mun'aphung nan bitu ta nalimuy ulu' ta alyo' ot ona' mate.
55 Mu numpaboddanga' i Apu Dios hi awada' hi dallom nan bitu.
56 Ta inali' i hiya di, Hom'ona' bahan. Ya timbalna
57 ot alyonay, Adi'a tumakut.
58 Ot boddangana' peman i Apu Dios ot ihwanga' hi ate.
59 Ot alyo' di, Innilam Apu Dios nadan adi maphod an nangatda i ha"on. Ot daan mo bahan ta iballohmu ta dusaom pibo dida.
60 Te innilam an nunhiglay bungotda i ha"on ya innilam an namin nadan ninomnomdan aton i ha"on an adi maphod.
61 Ya dingngolmu nadan namadngopadngoldan ha''on ya an namin nadan ninomnomda nimpen aton i ha"on an adi maphod.
62 Te namaaggon ingkutkutyamday pama"ihdan ha"on ya ngodongodowana'† 3:62 Hay pangalin di udum hinan nginodongodowana' ya inutu'utubana'. bo udot i didah abigabigat.
63 Ya undan adim donglon an ihipundah nan mawi"it ta ingganah nan mahdom an mangitanaltalyah pamihuldan ha"on.
64 Ot hanat paligatom pibo dida ta miyunnudan hinan adi maphod an ato'atonda.
65 Ta punhiglaom di eda punligatan.
66 Ta pumpudugmu pibo didah bungotmu ya nundadagmu dida.