9
Munchokhoh hi punnomnoman Paul khapo hi achi pamatiyan hana papadchung na an Hudju
1 A-akhi, umannung hitay alloꞌ ay chaꞌju. Ti takhuwaꞌ ay Kristo hotti achiyaꞌ munlahlah. Ipa-innilan tay konsensiaꞌ an empadchong ni Espiritu Santo an umannung hay hato ujaꞌ hapiton. 2 Hay penhod u hi allon ja tayya an munnaud an munchokhoh hitay ujaꞌ punnomnoman khapo hi achi pamatiyan hana papadchung u an Hudju ay Kristo. 3 Aa ja ha-in chi manaꞌpfat ay ni adusaan cha ay Apo Jos ta mapogpog hitay piꞌtakhuwaꞌ ay Kristo hu-unot niꞌ mapfalin ta chichay miꞌtakhu. 4 Chicha hana holag Israel an pinilin Apo Jos hi empfapfalay na. Chichay nangpatikhagwana ay ni pfinang na ja chichay khuna peꞌtotobpfalan. Chichay nangpa-innilaana hay hana urchina ja nangtuchugwana hana aton cha an mundayaw ay hija. Ja maphod hana ingkari na ay chicha. 5 Hachi nangholag ay chicha ja hachi ma-ar-ali an tatakhu chin hopapna. Ja padchung cha an Hudju hini nangholag ay ni narpugwan Kristo ay ni kinatakhu na. HiKristo chi Jos an khun mangpaptoꞌ an amin ja hijay madayaw hi ma-id pogpogna. Amen!
6 Achiꞌ allon hi ma-id chi hay inuntungpalan hachi karin Apo Jos ay chicha. Ti hini omaꞌ-atana ja achi an amin hana holag Israel ja umannung an tatakhun Apo Jos. 7 Ja achi an amin hana holag Abraham ja mipfilang cha hi empfapfalay Abraham an meꞌpfanoh hana ingkarin Apo Jos. Ti hitay chin inalin Apo Jos ay Abraham an, “Hi Isaak chi puun hana mipfilang hi holag mu.” 8 Hay penhod na an hapiton ja hana holag Isaak ja angkhay chi mipfilang hi holag Abraham, ti hi Isaak chi nituꞌkhung khapo chin ingkarin Apo Jos. Hana ayya holag ni empfalay Abraham ay ni oha an pfupfai ja achi cha mipfilang hi holag na. 9 Ti hitay chin ingkarin Apo Jos an inali na hi, “Malahin chi ohay tagwon hot tikhagwun ju hitay apfalinaꞌ ti tomoꞌkhong hi Sarah hi lala-e an empfalay ju.”* 9:9 Genesis 18:10
10-11 Ja oha khu ja nomnomon ta-o chin inalin Apo Jos chin apo ta-o an hi Isaak. Impa-innilan Apo Jos an hini atona an mumpili ay ni takhu an ekhohkhohana ja pfu-un khapo hi maphod an enat nuy an takhu. Ekhohkhohana khapo ti hinuy chi inhumang na an aton. Ti inhapfin Rebeka an ahagwan Isaak chin nun-eper an cha Jakob ay Esau, ja hi Isaak chi ama cha an chugwa. Agkhuy cha pay netoꞌkhong ja ma-id pay oh-ohha hi enat cha hi maphod wenno napukhit, 12 ja inaꞌ-allin Apo Jos ay Rebeka hi, “Hini pangpangulluwan ja epadchong nuy uchichiyan.”† 9:12 Genesis 25:23
13 Ja nitulaꞌ khu ay ni Hapit Apo Jos an allona hi, “Piniliꞌ hi Jakob an penhod u muti hi Esau ja chin-ug u.”‡ 9:13 Malachi 1:2-3
14 Un chah hay allon ta-o ja, achi magpong hi Apo Jos ti niya an pinili na hini penhod na an ekhohkhohan? Achi. 15 Kalintikhan Apo Jos an mangat ay tay, ti hitay chin inali na ay Moses an,
“Ekhohkhohaꞌ hana penhod u an ekhohkhohan,
Ja nignikhaoꞌ hana penhod u an nignikhaon.” § 9:15 Exodus 33:19
16 Hotti hitay chi panginnilaan ta-o an hini namiliyan Apo Jos ay ni ohan takhu ja agkhuy nepognad ay ni penhod nuy an takhu wenno hay maphod hi enat na, ti narpu ay ni khohkhoh Apo Jos. 17 Ja mapfalin khu an gwa hana uchumna an achi ekhohkhohan Apo Jos, amat ay ni Faraon an chin ari ad Egypt, an nitulaꞌ ay tay Hapit Apo Jos chin inalin Apo Jos ay hija an, “Enhaad u he-a hi ari ta mipatikhaw hini otong an apfalinaꞌ ay ni atoꞌ an pfumuhur ay he-a, hot munchongor hini ngachan u hi apfuglapfuglay.”* 9:17 Exodus 9:16 18 Hotti matikhaw ta-o an ekhohkhohan Apo Jos hana penhod na an ekhohkhohan ja kalintikhana khu an epapfato hini nomnom chi ohan takhu nu penhod na.
19 Unchani ja gway mangali hi, “Nu amat hina hi Apo Jos, ja achi na koma papfaholon hana tatakhu, ti umannung an un chah gway apfalinan ta-o an manukatan ay ni inhumang Apo Jos an ma-at?” 20 Achi mapfalin an amat hinay allom. Ti un ta-o takhu ja ngay kalintikhan ta-o an miꞌhullig ay Apo Jos? Amat koma ay ni pfuhi, una chah allon ay ni nangapja ay hija hi, “Anagkha ta amat hetoy im enat an nangapja ay ha-in?” 21 Achi mapfalin hini amat heto. Ti hini mangapja hi pfuhi ja ikhad hija ay ni penhod na an omaꞌ-atan ni ephod na. Mapfalin an alana hini oha an natep-or hi uklit ja ephod na hi chugwah kalahin chi pfuhi, hini aha ja pfuher an hinalitan, ja hini aha ja un angang. 22 Omaꞌ-at hina khu ay Apo Jos. Kalintikhana an mangat ay ni penhod na an aton. Podhona an ipatikhaw hini pfungot na khapo hi pfahor ja hini apfalinana an mangdusa hana tatakhu an pfimmahor. Muti inan-anuhana hana khumapo hi pfimmungtana an chicha hana nehnot chi apaꞌ-iyan cha. 23 Ti penhod na an ipa-innila hini ma-id ipadchungana an dayaw na ay chita-o an penhod na an ekhohkhohan, an eneꞌcha na an miꞌtakhu ay ni maphod an piꞌtakhuwan ad langit. 24 Ja chita-o hini allona an ekhohkhohana ti enajakhan chita-o. Ja pfu-un chaꞌmi an Hudju ja angkhay chi na-ajakhan ti midchum aju khu an Hentil. 25 Hitay chi inalin Apo Jos ay tay impatulaꞌ na ay ni profeta an hi Hosea,
“Ipfilang u hi tatakhuꞌ hana agkhuy u impfilang chin hopapna,
Ja chin nasyon an pfinuhur u ja podpodhoꞌ chicha ad ugwani.” † 9:25 Hosea 2:23
26 Ja oha khu hi impatulaꞌ ApoJos ja,
“Hay hana pfuglay an agwachaan hana tatakhu an nangarjaꞌ hi pfu-un tatakhuꞌ chicha,
Ja machakngan han arkhaw hi pangallaꞌ ay chicha hichi hi ipfilang u chicha hi empfapfalay u, ha-in an Jos an mamattakhu hi ma-id pogpogna.” ‡ 9:26 Hosea 1:10
27 Ja hachi ayya Hudju an holag Israel, ja hitay chin impadtun Isaiah hi nangarjana ay chicha chin nahop hi,
“Anong makay un amat hi pfilang chi panag hichi baybay chi pfilang ta-o an holag chi Israel, ja un ta-o tortollo an takhuwon ApoJos.
28 Ti un himpfumagkhaot ehemad Apo Jos an dusaon hana tatakhu heto lota.” § 9:28 Isaiah 10:22-23
29 Ja gwa khu hitay inalin profeta Isaiah an,
“Omaꞌ-at ta-o koma hana tatakhu ad Sodom ja ad Gomorah an dinusan Apo Jos ja na-umah cha an amin.
Muti khemmohkhoh hitay Napfagto an Jos, ja hinalimunana han tortollo ay chita-o ta achi mapogpog hitay holag ta-o.” * 9:29 Isaiah 1:9
Hini agkhuy namatiyan hachi Hudju ay Hesu Kristo
30 Hotti hitay chi penhod u an ipa-innila. Hay hana Hentil an agkhuy cha enhehemad an hingiton nu ngay aton cha an mipfilang hi magpong ay Apo Jos, ja emmat an impfilang na chicha hi magpong khapo hi namatiyan cha ay Kristo. 31 Muti hana holag Israel an nanghehemad an mangunud ay ni urchin Moses ta mumpfalin cha hi magpong hi pannig Apo Jos ja natuꞌchud cha. 32 Anagkha tugwali ta amat heto? Khapo ta nunhochor cha ay ni pangunuchan cha ay ni urchin ta mipfilang cha hi magpong hi pannig Apo Jos. Ja agkhuy cha anila an hana ipfilang Apo Jos hi magpong ja hana namati ay Hesu Kristo. Pfomopfohhor cha ay Kristo, ti amat hi pfato an humalipadchung ay chicha. 33 Hitay chin impatulaꞌ Apo Jos ay nuy Hapit na hi nangarjana hi,
“Tikhan ju, epognad u han pfato hina ad Sion an ahalipadchungan chi tatakhu,
Ja hijay mangkhah ay chicha.
Muti hana mamati ay hija ja ma-id chi hay i cha pipfapfa-inan.” † 9:33 Isaiah 28:16